ବାଲେଶ୍ୱର ଅଫିସ,୭।୬ବାହାନଗା ରେଳ ଦୁର୍ଘଟଣା ପରେ ନିକଟସ୍ଥ ଚାଷ ଜମିରେ ଖଣ୍ଡବିଖଣ୍ଡିତ ବଗି ଗୁଡ଼ିକ ରଖାଯାଇଛି। ଏହା ଦ୍ୱାରା ଚଳିତ ବର୍ଷ ଏହି ଜମିରେ ଚାଷ ହୋଇ ନ ପାରିବା ଆଶଙ୍କା କରି ଜଣେ ଜମି ମାଲିକ ପ୍ରଶାସନକୁ କ୍ଷତିପୂରଣ ମାଗିଛନ୍ତି। ମୋ ଜମି ନଷ୍ଟ କଲ କ୍ଷତିପୂରଣ ଦିଅ ବୋଲି ସେ ଦାବି କରିବା ଚର୍ଚ୍ଚାର ବିଷୟ ହୋଇଛି।
ସୂଚନା ଅନୁଯାୟୀ, ଗତ ୨ ତାରିଖ ରେଳ ଦୁର୍ଘଟଣା ପରେ ଟ୍ରେନ୍ର ବଗିଗୁଡ଼ିକ ଏଣେତେଣେ ହୋଇ ଛିଟ୍କି ପଡ଼ିଥିଲା। ରେଳ ବିଭାଗ ପକ୍ଷରୁ ଉଦ୍ଧାର କାର୍ଯ୍ୟ ସମୟରେ ବଗିଗୁଡ଼ିକୁ ବାହାର କରାଯାଇ ନିକଟସ୍ଥ ଚାଷ ଜମିରେ ରଖାଯାଇଥିଲା। ଏପରିକି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଉକ୍ତ ଚାଷ ଜମି ଉପରେ ନିର୍ମିତ ଅସ୍ଥାୟୀ ହେଲିପ୍ୟାଡ୍ରେ ହେଲିକପ୍ଟର ଯୋଗେ ଓହ୍ଲାଇ ଘଟଣାସ୍ଥଳକୁ ଯାଇ ସ୍ଥିତି ସମୀକ୍ଷା କରିଥିଲେ। ଏହି ଦୁର୍ଘଟଣା କେବଳ ରାଜ୍ୟ ନୁହେଁ ବରଂ ବିଶ୍ୱ ପାଇଁ ଏକ ବଡ଼ ଦୁଃଖଦ ଘଟଣା ଭାବେ ପରିଗଣିତ ହୋଇଛି। ଏନେଇ ରାଜ୍ୟଠାରୁ ଆରମ୍ଭ କରି ସାରା ବିଶ୍ୱବାସୀ ସ୍ଥାନୀୟ ଲୋକ ସହଯୋଗ ଓ ଜିଲାପ୍ରଶାସନର ତ୍ୱରିତ୍ ଉଦ୍ଧାର କାର୍ଯ୍ୟକୁ ପ୍ରଶଂସା କରିଛନ୍ତି। ଏଭଳି ଦୁଃଖଦ ପରିସ୍ଥିତି ଭିତରେ ମଧ୍ୟ ଉକ୍ତ ଅଞ୍ଚଳର ଜମି ମାଲିକ ଭବେନ୍ଦୁ ଶେଖର ଉପାଧ୍ୟାୟ ପ୍ରଶାସନ ବିରୋଧରେ ଅଭିଯୋଗ କରିଛନ୍ତି। ତାଙ୍କ ଜମିରେ ରେଳ ବଗି ଓ ମୃତଦେହ ଗଦା ହୋଇଥିବାରୁ ଚଳିତବର୍ଷ ଚାଷ କାର୍ଯ୍ୟ ହୋଇ ନ ପାରିବା ସେ ଆଶଙ୍କା ବ୍ୟକ୍ତ କରିଛନ୍ତି।
ସେ କହିଛନ୍ତି ଯେ, ରେଳ ଲାଇନ କଡ଼ରେ ତାଙ୍କର ସାଢ଼େ ୬ ଏକର ଜମି ରହିଛି। ଯେଉଁଠି ଦୁର୍ଘଟଣା ରାତିରେ ଯାତ୍ରୀମାନଙ୍କୁ ଉଦ୍ଧାର କରାଯିବା ସହ ମୃତଦେହ ରଖା ଯାଇଥିଲା। ଏଥିସହ ବଗି ରେଳ ଲାଇନରୁ ହଟାଇ ତାଙ୍କ ଜମିରେ ରଖା ଯାଇଛି। ଯାହାକୁ ନେଇ ସେ ଅସନ୍ତୋଷ ପ୍ରକାଶ କରିଛନ୍ତି। ସାଢ଼େ ୬ ଏକର ଚାଷ ଜମିରେ ଏବେ ଚାଷ କାର୍ଯ୍ୟ କେମିତି ହେବ। ଏବେ ଟ୍ରେନ ଲାଇନ ମରାମତି ଚାଲିଥିବା ବେଳେ ଯାହାସବୁ ଅଦରକାରୀ ଲୁହା ଖଣ୍ଡ ବାହାରୁଛି ସେସବୁକୁ ତାଙ୍କ ଚାଷଜମିରେ ଫିଙ୍ଗା ଯାଉଥିବା ନେଇ ସେ ଅଭିଯୋଗ କରିଛନ୍ତି। ଯେଉଁଠି ମୃତଦେହ ପଡ଼ିଥିଲା ସେହି ଜମିରେ ଚାଷ କେମିତି ହେବ ଏବଂ ସେଠାରେ ଥିବା ଭଙ୍ଗାରୁଜା ବଗି ଗୁଡିକ କେବେ ଉଠିବ ବୋଲି ଭବେନ୍ଦୁ ପ୍ରଶ୍ନ କରିଛନ୍ତି। ଏଥିସହ ତାଙ୍କ ଜମିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓହ୍ଲାଇବା ନେଇ ସେ ଖୁସି ବ୍ୟକ୍ତ କରିଥିବା ବେଳେ ତାଙ୍କ ଜମିରେ ଉଦ୍ଧାର କାର୍ଯ୍ୟ ବେଳେ ଯାହା ସବୁ ହୋଇଥିଲା ତାହାକୁ ନେଇ ସେ କୌଣସି ପ୍ରତିକ୍ରିୟାଶୀଳ ନୁହଁନ୍ତି ବୋଲି କହିଛନ୍ତି।
