ଭୁବନେଶ୍ୱର,୧୨।୫(ବ୍ୟୁରୋ): ଜୁନ ମାସରେ ସାଧାରଣତଃ ଓଡ଼ିଶାକୁ ଦକ୍ଷିଣ ପଶ୍ଚିମ ମୌସୁମୀ ଆଗମନ ହୋଇଥାଏ। ମେ’ ମାସ ଚାଲିଥିବାବେଳେ ମୌସୁମୀ ପୂର୍ବରୁ ସହରାଞ୍ଚଳରେ କିପରି ଜଳବନ୍ଦୀ ଓ କୃତ୍ରିମ ବନ୍ୟା ସ୍ଥିତିକୁ ଏଡାଯିବ, ସେନେଇ ଗୃହ ଓ ନଗର ଉନ୍ନୟନ ବିଭାଗ ଆକ୍ସନପ୍ଲାନ ପ୍ରସ୍ତୁତ କରିଛି। ରାଜ୍ୟ ପୌର ପ୍ରଶାସନ ନିର୍ଦ୍ଦେଶକ ସଂଗ୍ରାମଜିତ ନାୟକ ଏ ନେଇ ଗୁରୁବାର ସମସ୍ତ ମ୍ୟୁନିସିପାଲ କମିଶନର, ମ୍ୟୁନିସିପାଲ କର୍ପୋରେଶନ, କାର୍ଯ୍ୟନିର୍ବାହୀ ଅଧିକାରୀଙ୍କ ସମସ୍ତ ମ୍ୟୁନିସିପାଲିଟି ଓ ଏନ୍ଏସିକୁ ଚିଠି ଲେଖିଛନ୍ତି। ମୌସୁମୀ ପୂର୍ବରୁ ଜଳବନ୍ଦୀ ଓ କୃତ୍ରିମ ବନ୍ୟା ସ୍ଥତି ଏଡାଇବା ଲାଗି ଆଗୁଆ ପଦକ୍ଷେପ ନେବାକୁ ନାୟକ ନିର୍ଦ୍ଦେଶ ଦେଇଛନ୍ତି। ମୁଖ୍ୟତଃ ସହରାଞ୍ଚଳରେ ଥିବା ସମସ୍ତ ଡ୍ରେନ ସ୍ଥିତି ଯାଞ୍ଚ କରିବା ସହ ଚୋକ୍ ଥିବା ଡ୍ରେନର ପୁନଃ ସଂଯୋଗ ଓ ସଫେଇକୁ ଗୁରୁତ୍ୱ ଦେବାକୁ ନିର୍ଦ୍ଦେଶ ଦିଆଯାଇଛି। ସେହିପରି ରାସ୍ତାକଡ଼ରେ ଥିବା ମ୍ୟାନହୋଲ ଓ ମୁକୁଳା ଡ୍ରେନ ସ୍ଥଳ ଚିହ୍ନଟ କରି ଏହାକୁ ତୁରନ୍ତ ବନ୍ଦ କରିବାକୁ କୁହାଯାଇଛି। ଯେଉଁ ସ୍ଥାନରେ ମରାମତି ନ ହୋଇପାରୁଛି, ସେଠାରେ ଲୋକଙ୍କ ସଚେତନତା ଲାଗି ବ୍ୟବସ୍ଥା କରିବା, ସେହିପରି ଡ୍ରେନରେ ପଡୁଥିବା ନିର୍ମାଣାଧୀନ ବର୍ଜ୍ୟ ଲାଗି ଡ୍ରେନ ଜାମ ହେଉଥିବାରୁ ନିୟମିତ ରାସ୍ତାକଡରେ ଥିବା ଡ୍ରେନର ସଫେଇକୁ ଗୁରୁତ୍ୱ ଦେବା, ସଫେଇ ପରେ ଯେପରି ପୁନଃ ଉକ୍ତ ସାମଗ୍ରୀ ଡ୍ରେନ୍କୁ ନ ଆସେ ସେଥିପ୍ରତି ବିଶେଷ ଧ୍ୟାନ ଦେବା, ଜଳବନ୍ଦୀ ଓ ତଳି ଅଞ୍ଚଳ ଚିହ୍ନଟ କରି ଆପାତକାଳୀନ ସ୍ଥତିରେ ଜଳ ନିଷ୍କାସନ ବ୍ୟବସ୍ଥା କରିବାକୁ ପମ୍ପ ସେଟ ଲଗାଇବା, ଡ୍ରେନ ଉପରେ ଥିବା ଜବରଦଖଲ ହଟାଇବା ସହ ଜବରଦଖଲକାରୀଙ୍କ ବିରୋଧରେ ଆଇନଗତ ପଦକ୍ଷେପ ନେବାକୁ ନିର୍ଦ୍ଦେଶ ଦିଆଯାଇଛି। ସେହିପରି ମୌସୁମୀ ସମୟରେ ଜଳବନ୍ଦୀ ଲାଗି ପାଣି ଜମିବା ଫଳରେ ମ୍ୟାଲେରିଆ, ଡେଙ୍ଗୁ ଏବଂ ଜାପାନିଜ ଏନ୍ସେଫାଲାଇଟିସ ଏବଂ ଜଳ ଦ୍ୱାରା ବ୍ୟାପୁଥିବା ଅନ୍ୟ ରୋଗ ହେବା ଆଶଙ୍କା ରହିଛି। ତେଣୁ ଏଥିପ୍ରତି ଧ୍ୟାନ ଦେବା ସହ ଜଳବନ୍ଦୀ ଅଞ୍ଚଳରେ ପରିମଳ ବ୍ୟବସ୍ଥାକୁ ସ୍ବତନ୍ତ୍ର ଭାବେ ଗୁରୁତ୍ୱ ଦେବାକୁ କୁହାଯାଇଛି।
ମୌସୁମୀ ସମୟରେ ସହାୟତା ଲାଗି ୨୪ଘଣ୍ଟିଆ କଣ୍ଟ୍ରୋଲ ରୁମ କାର୍ଯ୍ୟକାରୀ କରାଇବା, କମିଶନର ତଥା ଜିଲାପାଳଙ୍କ ନେତୃତ୍ୱରେ ଜଳବନ୍ଦୀ ସମୟରେ ନିୟମିତ ବୈଠକ କରିବା, ଜଳବନ୍ଦୀ ସମୟରେ ସମସ୍ତ ଲାଇନ ବିଭାଗ ସହ ସମନ୍ବୟ ରଖି ସ୍ଥିତିର ମୁକାବିଲା କରିବା ଲାଗି କୁହାଯାଇଛି। ପ୍ରଥମଥର ୱାର୍ଡର ଲୋକପ୍ରତିନିଧି (କର୍ପୋରେଟର) ଓ ୱାର୍ଡ କମିଟିକୁ ଜଳବନ୍ଦୀ ସ୍ଥିତି ପରିଚାଳନା କରିବାରେ ସାମିଲ କରିବାକୁ ନିର୍ଦ୍ଦେଶ ଦିଆଯାଇଛି।
