ନୂଆଦିଲ୍ଲୀ,୭।୫:ଦେଶର କୁସ୍ତିଯୋଦ୍ଧାମାନେ ଦିଲ୍ଲୀର ଯନ୍ତରମନ୍ତରରେ କୁସ୍ତି ମହାସଂଘର ସଭାପତି ବ୍ରିଜ ଭୂଷଣ ଶରଣ ସିଂହଙ୍କ ବିରୋଧରେ ଯୌନ ନିର୍ଯାତନାର ଅଭିଯୋଗ ଆଣି ଆନ୍ଦୋଳନ ଜାରି ରଖିଛନ୍ତି। ତେବେ କୁସ୍ତିଯୋଦ୍ଧାଙ୍କ ଆନ୍ଦୋଳନକୁ ସଂଯୁକ୍ତ କିଷାନ ମୋର୍ଚ୍ଚା ସମର୍ଥନ କରିଛି। କୁସ୍ତିଯୋଦ୍ଧାଙ୍କ ସମର୍ଥନରେ ବିକ୍ଷୋଭ ପ୍ରଦର୍ଶନ ପାଇଁ ଦେଶର ବିଭିନ୍ନ ସ୍ଥାନରୁ ହଜାର ହଜାର ଚାଷୀ ରବିବାର ଯନ୍ତରମନ୍ତରରେ ପହଞ୍ଚିବେ। ଧାରଣା ସ୍ଥଳରେ ଖାପ ପଞ୍ଚାୟତ ପକ୍ଷରୁ ମହା ପଞ୍ଚାୟତ ସଭା ହେବ।
ସୂଚନା ଅନୁଯାୟୀ, ୨ ସପ୍ତାହ ଧରି ଯନ୍ତରମନ୍ତରରେ ବିକ୍ଷୋଭ ପ୍ରଦର୍ଶନ କରୁଥିବା କୁସ୍ତିଯୋଦ୍ଧାଙ୍କ ସମର୍ଥନରେ ନିକଟସ୍ଥ ରାଜ୍ୟରୁ ଖାପ ପଞ୍ଚାୟତ ନେତା ତଥା କୃଷକ ସଂଗଠନ ସହ ଜଡିତ ବହୁ ସଂଖ୍ୟକ ଲୋକ ଧାରଣା ସ୍ଥଳରେ ପହଞ୍ଚିବେ। ଏହାକୁ ଦୃଷ୍ଟିରେ ରଖି ଦିଲ୍ଲୀ ସୀମା ଏବଂ ଯନ୍ତରମନ୍ତର ସୁରକ୍ଷା ବ୍ୟବସ୍ଥା କଡାକଡି କରାଯାଇଛି। ବିକ୍ଷୋଭକାରୀଙ୍କ ଚାରିପାଖରେ ଆରଏଏଫ, ସିଆରପିଏଫ ଏବଂ ଦିଲ୍ଲୀ ପୋଲିସ କର୍ମଚାରୀଙ୍କୁ ମୁତୟନ କରାଯାଇଛି। ଏହା ସହିତ ଦିଲ୍ଲୀ ସୀମାରେ ପ୍ରବେଶ କରୁଥିବା ଯାନବାହନଗୁଡିକର ଯାଞ୍ଚକୁ ମଧ୍ୟ କଡାକଡି କରାଯାଇଛି।
