ବଅଁରପାଳ, ୨୮ା୧ (ଡି.ଏନ.ଏ.): ସମ୍ପର୍କୀୟ ଭାଇଙ୍କ ମଙ୍ଗନ ଉତ୍ସବରୁ ଫେରୁଥିବା ବେଳେ ଏକ ଟ୍ରକ୍ ଧକ୍କାରେ ଭାଇଙ୍କ ମୃତ୍ୟୁ ହୋଇଛି। ତାଙ୍କ ସହ ସ୍କୁଟିରେ ଥିବା ଦାଦା ଝିଅ ଭଉଣୀ ଗୁରୁତର ହୋଇଛନ୍ତି। ଅନୁଗୋଳ ଜିଲା ବଅଁରପାଳ ଥାନା ନିକଟରେ ଶୁକ୍ରବାର ଅପରାହ୍ନ ୪ଟାରେ ଏହି ଦୁର୍ଘଟଣା ଘଟିଛି। ମୃତକ ହେଲେ ବଉଳିଗଡ ଗ୍ରାମର ସୁଧାଂଶୁ ଶେଖର ସାହୁ (୨୦)। ଗୁରୁତର ହୋଇଥିବା ଭଉଣୀ ହେଲେ ମିକି ସାହୁ (୧୮)।
ସୂଚନା ଅନୁଯାୟୀ, ବଅଁରପାଳ ବଉଳିଗଡ ଗ୍ରାମର ଅବନୀ ସାହୁଙ୍କ ଝିଅ ମିକି ଓ ଶ୍ରୀକାନ୍ତ ସାହୁଙ୍କ ପୁଅ ସୁଧାଂଶୁ ଶେଖର ଅପା ପୁଅ ଭାଇଙ୍କ ମଙ୍ଗନ ଉତ୍ସବରେ ଯୋଗଦେଇ ତାଳଚେରରୁ ଫେରୁଥିଲେ। ଉଭୟ ସ୍କୁଟି (ନଂ. ଓଡି୧୯ଭି- ୫୧୧୬)ରେ ବଅଁରପାଳ ଥାନା ନିକଟରେ ହୋଇଥିବା ବେଳେ ତାଳଚେର ପାର୍ଶ୍ୱରୁ ଆସୁଥିବା କୋଇଲା ବୋଝେଇ ଟ୍ରକ୍ (ନଂ. ଓଡି ୦୯କେ- ୮୦୪୫) ସେମାନଙ୍କୁ ଧକ୍କା ଦେଇଥିଲା। ଖବରପାଇ ପୋଲିସ ପହଞ୍ଚି ସ୍ଥାନୀୟ ଲୋକଙ୍କ ସହାୟତାରେ ଉଭୟଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟକୁ ପଠାଇଥିଲା। ତେବେ ଅବସ୍ଥା ସଙ୍କଟାପନ୍ନ ଥିବାରୁ ଉଭୟଙ୍କୁ ଡାକ୍ତର କଟକ ରେଫର କରିଥିଲେ। କଟକର ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ସୁଧାଂଶୁଙ୍କ ମୃତ୍ୟୁ ହୋଇଥିବା ସୂଚନା ମିଳିଛି। ଏ ସମ୍ପର୍କରେ ବଅଁରପାଳ ଥାନା ଅଧିକାରୀ ନରେଶ ସାହୁ କହିଛନ୍ତି, ପୋଲିସ ଦୁର୍ଘଟଣାଗ୍ରସ୍ତ ଗାଡ଼ି ଜବତ କରିବା ସହ ନଂ. ୪୩/୨୩ରେ ଏକ ମାମଲା ରୁଜୁ କରି ତଦନ୍ତ ଚଳାଇଛି।
