ଢେଙ୍କାନାଳ ଅଫିସ,୨୪ା୧: ଢେଙ୍କାନାଳ ଜନସ୍ବାସ୍ଥ୍ୟ ବିଭାଗରେ ଭାଇବ୍ରେଟର ବ୍ୟବହାର କରାଯାଉଥିବା କାର୍ଯ୍ୟକୁ ନେଇ ସୋମବାର ରାତିରେ ଦୁଇ ଗୋଷ୍ଠୀ ମଧ୍ୟରେ ସଂଘର୍ଷ ହୋଇଛି। ଏଥିରେ ୨ ଜଣ ଆହତ ହୋଇଥିବା ବେଳେ ଏକ କାର୍କୁ ପୋଡ଼ି ଦିଆଯାଇଛି। ପ୍ରକାଶ ଯେ, ଏହି ଭାଇବ୍ରେଟର ବ୍ୟବହାର ହେଉଥିବା କାର୍ଯ୍ୟକୁ ନେଇ ଢେଙ୍କାନାଳ ସହର ଜଗନ୍ନାଥରୋଡ୍ ଅଞ୍ଚଳର କେତେଜଣ ଯୁବକ ଏବଂ ଜୟଗୋପାଳ ସାହି ବାଜିଚୌକ ଆଦି ଅଞ୍ଚଳର କେତେଜଣ ଯୁବକଙ୍କ ମଧ୍ୟରେ ତୀବ୍ର ବିବାଦ ଲାଗିଥିଲା। ବିବାଦ ଉଗ୍ରରୂପ ନେବାରୁ ଉଭୟପକ୍ଷ ପରସ୍ପର ଉପରେ ଆକ୍ରମଣ କରିଥିଲେ। ଏହି ଘଟଣାରେ ଦୁଇଜଣ ଆହତ ହୋଇଥିବା ବେଳେ ସେମାନଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ସେହିପରି ଅରୁ ଦଳେଇଙ୍କ ଘର ଆଗରେ ରଖାଯାଇଥିବା କାରକୁ ବିରୋଧୀ ଗୋଷ୍ଠୀ ପକ୍ଷରୁ ନିଆଁ ଲଗାଇ ଦିଆଯାଇଥିଲା। ଏହାକୁ ନେଇ ସେଠାରେ ଉତ୍ତେଜନା ପ୍ରକାଶ ପାଇଥିଲା। ଖବରପାଇ ଟାଉନ ଥାନା ପୋଲିସ ପହଞ୍ଚି ତଦନ୍ତ ଜାରି ରଖିଛି। ସୋମବାର ସ୍ଥାନୀୟ ଅଞ୍ଚଳର ବରିଷ୍ଠ ଓ ମୁରବୀସମ୍ପନ୍ନ ବ୍ୟକ୍ତିଙ୍କୁ ଡାକି ଟାଉନ ଥାନା ପୋଲିସ ପକ୍ଷରୁ ଆଲୋଚନା କରାଯାଇଥିଲା। ଆଇନକୁ ହାତକୁ ନେଇଥିବା ଯୁବକମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ବୋଲି ଅଧିକାଂଶ ମତ ରଖିଥିବା ପୋଲିସ ସୂତ୍ରରୁ ପ୍ରକାଶ। ଏ ସଂକ୍ରାନ୍ତରେ ନଂ. ୫୬/୨୩ ଓ ୫୮/୨୩ରେ ଦୁଇଟି ମାମଲା ରୁଜୁ ହୋଇଛି।
