ଝାରସୁଗୁଡ଼ା ଅଫିସ/ବ୍ରଜରାଜନଗର (ଡି.ଏନ.ଏ.),୨୪।୮:
ଝାରସୁଗୁଡ଼ା ଜିଲା ବ୍ରଜରାଜନଗରର ଦୁର୍ଦ୍ଦାନ୍ତ ଅପରାଧୀ ସୋନୁ ଘୋଷ ଜେଲ୍ରୁ ମୁକୁଳିବା ପରେ ସହଯୋଗୀଙ୍କ ସହିତ ମିଶି ସୋମବାର ସନ୍ଧ୍ୟାରେ ଡକାୟତି ଯୋଜନା କରୁଥିବାବେଳେ ପୋଲିସ ଏହାକୁ ପଣ୍ଡ କରିଛି। ବ୍ରଜରାଜନଗର ପୋଲିସ ସୋନୁଙ୍କ ସମେତ ୫ ଅଭିଯୁକ୍ତଙ୍କୁ ଗିରଫ କରି ମଙ୍ଗଳବାର କୋର୍ଟ ଚାଲାଣ କରିଛି। ଗିରଫ ଅନ୍ୟ ୪ ଅଭିଯୁକ୍ତ ହେଲେ ରାମପୁର କୋଲିଆରିର ସନ୍ତୋଷ ବିଶ୍ୱାଳ (୩୦) ଓରଫ (ଜିତୁ), ରାମପୁର ବିହାରୀପଡାର ଧନଞ୍ଜୟ କିଷାନ (୨୭), ଅଭୟପୁରର ଚରଣଜିତ ସିଂହ (୨୩) ଓରଫ ହାପି ଓ ବାସୁପାଲି ଗ୍ରାମର ଦୀନେଶ ସେନାପତି(୨୩)। ସନ୍ତୋଷଙ୍କ ନିକଟରୁ ପୋଲିସ ଏକ ବନ୍ଧୁକ ସହିତ ୪ରାଉଣ୍ଡ ଗୁଳି ଜବତ କରିଛି। ଏ ନେଇ ପୋଲିସ ଆଇପିସି ଦଫା ୟୁ/ଏସ୍ ୩୯୯, ୪୦୨, ୨୫ଆର୍ମ ଆକ୍ଟରେ ମାମଲା (ନଂ୨୫୨/୨୨) ରୁଜୁକରି ତଦନ୍ତ ଚଳାଇଛି। ଗିରଫ ଅଭିଯୁକ୍ତଙ୍କ ମଧ୍ୟରେ ଚରଣଜିତଙ୍କୁ ଛାଡିଦେଲେ ଅନ୍ୟମାନଙ୍କ ନାମରେ ବିଭିନ୍ନ ଥାନାରେ ଏକାଧିକ ମାମଲା ରହିଥିବା ଏସ୍ଡିପିଓ ଗୁପ୍ତେଶ୍ୱର ଭୋଇ କହିଛନ୍ତି।
ପୋଲିସ୍ ସୂତ୍ରରୁ ପ୍ରକାଶ ଅପରାଧୀ ସୋନୁ ଘୋଷ ବିଭିନ୍ନ ସଙ୍ଗିନ ମାମଲାରେ ସମ୍ପୃକ୍ତ ରହିଥିବାବେଳେ ପୋଲିସ ତାଙ୍କୁ ଏନ୍ଏସ୍ଏରେ ଗିରଫକରି କୋର୍ଟ ଚାଲାଣ କରିଥିଲା। ସେ ଜେଲ୍ରେ ବିଚାରାଧୀନ କଏଦୀ ଭାବେ ସଜା କାଟୁଥିବାବେଳେ ୧ସପ୍ତାହ ତଳେ ଜେଲ୍ରୁ ମୁକୁଳିଥିଲେ ା ସନ୍ତୋଷ ବିଶ୍ୱାଳ ମଧ୍ୟ ଜେଲ୍ରୁ ମୁକୁଳିଥିଲେ। ଏମାନେ ଅପରାଧମୂଳକ କାର୍ଯ୍ୟ ଘଟାଇବା ଆଶଙ୍କାକରି ପୋଲିସ୍ ଏମାନଙ୍କ ଉପରେ ତୀକ୍ଷ୍ଣ ନଜର ରଖିଥିଲା। ସହଯୋଗୀଙ୍କ ସହ ମିଶି ସୋନୁ ସୋମବାର ସନ୍ଧ୍ୟାରେ ରାମପୁର ଫାଣ୍ଡି ଅନ୍ତର୍ଗତ କୁଦପାଲି ଜଙ୍ଗଲ ମଧ୍ୟରେ ଅସ୍ତ୍ରଶସ୍ତ୍ର ଧରି ଲଖନପୁର କୋଇଲାଖଣି ଅଞ୍ଚଳରେ ଡକାୟତି ଯୋଜନା ଚଳାଇଥିଲେ। ବିଶେଷ ସୂତ୍ରରୁ ଖବରପାଇ ଏସ୍ଡିପିଓ ଭୋଇଙ୍କ ନେତୃତ୍ୱରେ ଏକ ପୋଲିସ୍ ଟିମ୍ ଉକ୍ତ ଜଙ୍ଗଲ ଉପରେ ଚଢାଉକରି ସୋନୁଙ୍କ ସମେତ ୪ଜଣଙ୍କୁ ଗିରଫ କରିବାରେ ସଫଳ ହୋଇଥିଲେ। ଅନ୍ୟ ୨ଜଣ ଘଟଣା ସ୍ଥଳରୁ ଫେରାର ହୋଇଯାଇଥିଲେ। ପରେ ଫେରାର୍ ୨ଜଣଙ୍କ ମଧ୍ୟରୁ ଅଭିଯୁକ୍ତ ଦୀନେଶଙ୍କୁ ଓରିଏଣ୍ଟ ଥାନା ଅଞ୍ଚଳରୁ ପୋଲିସ୍ ଗିରଫ କରିଛି। ଅନ୍ୟ ଜଣେ ଫେରାର୍ ଅଭିଯୁକ୍ତଙ୍କୁ ବହୁଶୀଘ୍ର ଗିରଫ କରାଯିବବୋଲି ଏସ୍ଡିପିଓ ଭୋଇ କହିଛନ୍ତି। ସୂଚନାଯୋଗ୍ୟ ବ୍ରଜରାଜନଗରର ୨ଗୋଷ୍ଠୀ ମଧ୍ୟରେ ବିବାଦ ଦେଖାଦେବା ପରେ ଗୁଳିକାଣ୍ଡ ଘଟି ଗୋଟିଏ ପରେ ଗୋଟିଏ ମୁଣ୍ଡ ଗଡିଥିଲା ା ଏଥିରେ ସମ୍ପୃକ୍ତ ୨ଗୋଷ୍ଠୀର ଅଭିଯୁକ୍ତଙ୍କୁ ପୋଲିସ୍ ଗିରଫକରି କୋର୍ଟ ଚାଲାଣ କରିଥିଲା ା ଉଭୟ ଗୋଷ୍ଠୀର ଅଭିଯୁକ୍ତ ଏବେ ଜେଲ୍ରୁ ମୁକୁଳିଥିବାବେଳେ ପୁଣି ପୂର୍ବ ଶତ୍ରୁତାକୁ ନେଇ ୨ଗୋଷ୍ଠୀ ମଧ୍ୟରେ ମୁହାଁମୁହିଁ ଆଶଙ୍କା କରି ପୋଲିସ୍ ସତର୍କ ଦୃଷ୍ଟି ରଖିଥିଲା।
