କବାଟବନ୍ଧ,୧୬ା୫(ଡି.ଏନ.ଏ.): ଧର୍ମଶାଳା ତହସିଲ ଅନ୍ତର୍ଗତ ଜେନାପୁର ବ୍ରିଜ ନିକଟ ବ୍ରାହ୍ମଣୀ ନଦୀକୂଳ ପଠାରୁ ଅନୁମତି ନ ଥାଇ ବାଲି ଉଠାଣ ହେଉଛି। ଏନେଇ ନଦୀ ତଟବର୍ତ୍ତୀ ବ୍ରହ୍ମପୁର ଗ୍ରାମବାସୀ ଧର୍ମଶାଳା ତହସିଲଦାରଙ୍କୁ ଲିଖିତ ଭାବେ ଅଭିଯୋଗ କରିଛନ୍ତି। ବ୍ରହ୍ମପୁର ଗ୍ରାମଟି ସରକାରୀ ଭାବେ ବନ୍ୟା ପ୍ଲାବିତ ଅଞ୍ଚଳ ଭାବେ ଘୋଷଣା କରାଯାଇଛି। ବନ୍ୟା ସମୟରେ ସେହି ଗ୍ରାମର ସମସ୍ତ ଘର ଜଳମଗ୍ନ ହୋଇଯାଇଥାଏ। ଏହି ଦୃଷ୍ଟିରୁ ବାଲି ସୈରାତଟି ସେହି ଗ୍ରାମର ଉପରଭାଗରେ ନିର୍ଦ୍ଧାରଣ କରାଯାଇଛି। ବାଲି ଖନନ ଓ ପରିବହନ କରାଗଲେ ନଦୀର ସ୍ରୋତ ବଦଳି ଯିବ ଏବଂ କୂଳ ଲଂଘି ବହୁ ପରିମାଣର ଚାଷ ଜମି ତଥା ଘର ନଦୀର ଗର୍ଭରେ ଲୀନ ହେବା ଆଶଙ୍କା ରହିଛି। କିନ୍ତୁ ଦୁର୍ଭାଗ୍ୟ ଯେ, ରସୁଲପୁର ତହସିଲର ଯାବରା ମୌଜାର ବାଲି ସୈରାତରୁ ଉକ୍ତ ମୌଜା ଦେଇ ସରକାରଙ୍କ ତରଫରୁ ଖନନ ଓ ପରିବହନ ବ୍ୟବସ୍ଥା ଥିବାବେଳେ ଧର୍ମଶାଳା ତହସିଲ ବ୍ରହ୍ମପୁର ମୌଜା ଦେଇ ପରିବହନ କରାଯାଉଛି। ବ୍ରହ୍ମପୁର ମୌଜା ଦେଇ ବାଲି ପରିବହନକୁ ବନ୍ଦ କରା ନ ଗଲେ ଗ୍ରାମବାସୀ ରାସ୍ତାକୁ ଓହ୍ଲାଇବାକୁ ବାଧ୍ୟ ହେବେ ବୋଲି ଅଭିଯୋଗ ପତ୍ରରେ ଦର୍ଶାଇଛନ୍ତି।
