ବନ୍ଧୁଙ୍କ ଦେହାନ୍ତ ସ୍ବପ୍ନିଳ ଗଓ୍ବାଣ୍ଡେଙ୍କ ଆଖି ଖୋଲିଦେଲା। ଟଙ୍କା ରୋଜଗାର କରି ଆରାମ ଜୀବନ ଜିଇବା ବଦଳରେ ସେ ସେବାକୁ ଆପଣାଇ ନେଲେ। ଆଇଆଇଏମ୍, ଅହମଦାବାଦ ଭଳି ଖାତିସମ୍ପନ୍ନ ଅନୁଷ୍ଠାନରୁ ଏମ୍ବିଏ ଛାଡ଼ି ଆରମ୍ଭ କଲେ ଏକ ଚକ୍ଷୁଦାନ କେନ୍ଦ୍ର। ମହାରାଷ୍ଟ୍ରରେ ଉକ୍ତ କେନ୍ଦ୍ର ଖୋଲିବା ପରଠାରୁ ସେ ଏଯାବତ ୩,୦୦୦ରୁ ଊର୍ଦ୍ଧ୍ୱ ଲୋକଙ୍କୁ ସାହାଯ୍ୟ କରି ସାରିଲେଣି। ୨୦୦୬ରେ ତାଙ୍କ ଦୃଷ୍ଟିବାଧିତ ସାଙ୍ଗ ଅବଦୁଲଙ୍କ ମୃତ୍ୟୁ ଘଟିଥିଲା। ୨୦୧୦ରେ ସେ ‘ଦିଶା ମେଡିକାଲ ଆଣ୍ଡ୍ ଏଜୁକେଶନ ଫାଉଣ୍ଡେଶନ’ ଗଠନ କରି ତା’ ମାଧ୍ୟମରେ ଦିଶା ଇଣ୍ଟରନ୍ୟାଶନାଲ ଆଏ ବ୍ୟାଙ୍କ ଖୋଲିଥିଲେ। ଏବେ ମହାରାଷ୍ଟ୍ରରେ ସେ ୫ଟି ଆଏ ବ୍ୟାଙ୍କ ଚଳାଇ ଚକ୍ଷୁ ଦାନକୁ ପ୍ରୋତ୍ସାହିତ କରୁଛନ୍ତି। ସେ ମଧ୍ୟ ହଜାର ହଜାର ଲୋକଙ୍କ ଟ୍ରାନ୍ସପ୍ଲାଣ୍ଟେଶନ ସର୍ଜରି କରାଇଛନ୍ତି । ସ୍ବପ୍ନିଳଙ୍କ ବୟସ ୨୯। ତାଙ୍କ ସଂସ୍ଥା ଏଯାବତ୍ ୧୪ ଲକ୍ଷରୁ ଊର୍ଦ୍ଧ୍ୱ ଲୋକଙ୍କୁ ଚକ୍ଷୁଦାନ କରିବା ଲାଗି ପ୍ରେରିତ କରିପାରିଛି। ୬ଲକ୍ଷ ଲୋକ ଦିଶା ମାଧ୍ୟମରେ ଚକ୍ଷୁଦାନ କରିବାକୁ ପ୍ରତିଶ୍ରୁତିବଦ୍ଧ ହୋଇଛନ୍ତି। ତାଙ୍କ ବ୍ୟାଙ୍କ ୨,୧୦୦ କର୍ନିଆ ସମ୍ପର୍କିତ ସର୍ଜରି କରିପାରିଛି। ସେ ଏବଂ ଡାକ୍ତର ଟିମ୍ ୭୭ଟି ଆଏ ବ୍ୟାଙ୍କର ଟେକ୍ନିସିଆନଙ୍କୁ ପ୍ରଶିକ୍ଷଣ ଦେଇଛନ୍ତି। ତାଙ୍କ ଟିମ୍ରେ ୨,୭୦୦ ସ୍ବେଚ୍ଛାସେବୀ ସାମିଲ ହୋଇଛନ୍ତି।
