ଆବୁଧାବି,୨।୧୦: ଚଳିତ ଆଇପିଏଲ୍ର ଶନିବାର ଦ୍ୱିତୀୟ ମୁକାବିଲାରେ ସଞ୍ଜୁ ସାମସନଙ୍କ ରାଜସ୍ଥାନ ରୟାଲ୍ସ ଟସ୍ ଜିତି ବୋଲିଂ ନିଷ୍ପତ୍ତି ନେଇଥିଲା। ବ୍ୟାଟିଂ କରିବାକୁ ଆସି ଚେନ୍ନାଇ ୨୦ ଓଭରରେ ୪ ଉଇକେଟ ହରାଇ ୧୮୯ରନ୍ କରିଥିଲା। ରାଜସ୍ଥାନ ରୟାଲ୍ସ ଆଗରେ ୧୯୦ ରନ୍ର ବିଶାଳ ଟାଗେର୍ଟ ରହିଛି।
ସିଏସ୍କେ ପାଇଁ ମାପିଚୁପି ଇନିଂସ ଆରମ୍ଭ କରିଥିଲେ ରୁତୁରାଜ ଗାଏକ୍ୱାଡ ଓ ଫାଫ୍ ଡୁ’ ପ୍ଲେସି। ୬ ଓଭର ୫ ବଲ୍ରେ ଫାଫ୍ ଡୁ’ ପ୍ଲେସି ୨୫ ରନ୍ କରି ରାହୁଲ ତେୱାଟିଆଙ୍କ ବଲରେ ଷ୍ଟମ୍ପଡ ଆଉଟ ହୋଇଥିଲେ। କିଛି ସମୟ ପରେ ବ୍ୟାଟିଂ କରିବାକୁ ଆସିଥିବା ସୁରେଶ ରାଇନା (୩) ରନ୍ କରି ରାହୁଲ ତେୱାଟିଙ୍କ ବଲ୍ରେ କ୍ୟାଚ୍ ଆଉଟ ହୋଇଥିଲେ। ହେଲେ ରୁତୁରାଜ ଗାଏକ୍ୱାଡଙ୍କ ଧର୍ଯ୍ୟପୂର୍ଣ୍ଣ ଶତକୀୟ(୧୦୧ରନ୍ ୯ ଚଉକା, ୫ ଛକ୍କା) ଇନିଂସ ଫଳରେ ଚେନ୍ନାଇ ୧୮୯ ରନ୍ କରିଛି। ରବୀନ୍ଦ୍ର ଜାଡେଜା ୩୨ରନ୍ର(୪ଚଉକା, ୧ ଛକ୍କା) ଦମ୍ଦାର ଇନିଂସ ଖେଳିଥିଲେ।
ରାଜସ୍ଥାନ ରୟାଲ୍ସର ରାହୁଲ ତେୱାଟିଆ ୩ ଉଇକେଟ ନେଇଥିବା ବେଳେ ଚେତନ ସାକାରିଆ ଗୋଟିଏ ଉଇକେଟ ହାସଲ କରିଥିଲେ।
