ଡେରାଡୁନ୍,୧୯।୭: ଉତ୍ତରାଖଣ୍ଡରେ ପ୍ରବଳ ବର୍ଷା ଲାଗିରହିଛି। ରବିବାର ବିଳମ୍ବିତ ରାତିରେ ବାଦଳଫଟା ବର୍ଷାରେ ତିନି ଜଣଙ୍କର ମୃତ୍ୟୁ ହୋଇଛି। ମାଣ୍ଡୋରେ ୨ ଜଣ ମହିଳା ଏବଂ ଜଣେ ଶିଶୁଙ୍କ ମୃତଦେହ ଉଦ୍ଧାର କରାଯାଇଛି। ମୃତଦେହକୁ ଜିଲା ଡାକ୍ତରଖାନାକୁ ଅଣାଯାଇଛି। ମାଣ୍ଡୋ ଗ୍ରାମରେ ବର୍ଷା ଯୋଗୁ ଏବେ ଚାରି ଜଣ ନିଖୋଜ ଅଛନ୍ତି। ପ୍ରବଳ ବର୍ଷା ହେତୁ ମାଣ୍ଡୋ, ନିରାକୋଟ, ପାନୱାଡି ଏବଂ କାଙ୍କାରାଡି ଗାଁରେ ଆବାସିକ ଘର ଭିତରକୁ ପାଣି ପ୍ରବେଶ କରିଥିଲା। ଏସ୍ଡିଆର୍ଏଫ୍ ଏବଂ ବିପର୍ଯ୍ୟୟ ପରିଚାଳନା ବିଭାଗର ଟିମ ମୃତଦେହ ଉଦ୍ଧାର କରିଥିଲେ। ସୂଚନା ଅନୁଯାୟୀ, ମାଣ୍ଡୋ ଗାଁର ୯ଟି ଘରେ ପାଣି ପ୍ରବେଶ କରିଥିଲା। ଦୁଇଟି ଘର ସମ୍ପୂର୍ଣ୍ଣ ନଷ୍ଟ ହୋଇଯାଇଥିବା ବେଳେ ଅନେକ ସ୍ଥାନରେ ଯାନବାହନ ଚଳାଚଳ ବନ୍ଦ ଥିବା ମଧ୍ୟ ଜଣାପଡିଛି।
