ମୁମ୍ବାଇ: ଭାରତ ଶୁକ୍ରବାର ଦ୍ୱିତୀୟ ପର୍ଯ୍ୟାୟ ସୁଇସ୍ ବ୍ୟାଙ୍କ ଆକାଉଣ୍ଟ ତଥ୍ୟ ଲାଭ କରିଛି। ଟିକସ ସମ୍ପର୍କିତ ସୂଚନା ଆଦାନ ପ୍ରଦାନ ଲାଗି ଭାରତ ଏବଂ ସୁଇଜରଲାଣ୍ଡ ସରକାରଙ୍କ ମଧ୍ୟରେ ହୋଇଥିବା ଚୁକ୍ତି ଅନ୍ତର୍ଗତ ଏଭଳି ସୂଚନା ମିଳିଛି। କଳାଟଙ୍କା ବିରୋଧୀ ଲଢ଼େଇରେ ଏହା ଏକ ମାଇଲଖୁଣ୍ଟ ବୋଲି କୁହାଯାଏ। ଭାରତ ସମେତ ୮୬ ଦେଶକୁ ସୁଇଜରଲାଣ୍ଡର ଫେଡେରାଲ ଟାସ୍କ ଆଡମିନିଷ୍ଟ୍ରେଶନ(ଏଫ୍ଟିଏ) ବ୍ୟାଙ୍କ ଆକାଉଣ୍ଟ ସମ୍ପର୍କିତ ସୂଚନା ପ୍ରଦାନ କରିଛି। ପ୍ରଥମ ପର୍ଯ୍ୟାୟ ଡାଟା ଭାରତ ସରକାର ୨୦୧୯ ସେପ୍ଟେମ୍ବରରେ ଲାଭ କରିଥିଲେ। ମୋଟ ୮୬ ଦେଶର ୩୧ ଲକ୍ଷ ଫାଇନାନ୍ସିଆଲ ଆକାଉଣ୍ଟ ତଥ୍ୟ ସୁଇସ କର୍ତ୍ତୃପକ୍ଷ ପ୍ରଦାନ କରିଛନ୍ତି। ଗତ ଗୋଟିଏ ବର୍ଷ ମଧ୍ୟରେ ଭାରତ ସରକାରଙ୍କ ଅନୁରୋଧକ୍ରମେ ୧୦୦ ଭାରତୀୟଙ୍କ ସୁଇସ ବ୍ୟାଙ୍କର ବିସ୍ତୃତ ତଥ୍ୟ ପ୍ରଦାନ କରିଥିଲେ। ଟିକସ ମାମଲାରେ ଏହି ତଥ୍ୟ ପ୍ରଦାନ କରାଯାଇଥିଲା। ଏହା ପୁରୁଣା ଆକାଉଣ୍ଟ ତଥ୍ୟ ହୋଇଥିବା ବେଳେ ଆକାଉଣ୍ଟଗୁଡିକ ୨୦୧୮ ପୂର୍ବରୁ ବନ୍ଦ ହୋଇସାରିଛି। ନୂଆ ଆଇନ କେବଳ ଚାଲୁ ରହିଥିବା ଆକାଉଣ୍ଟ କିମ୍ବା ୨୦୧୮ ମଧ୍ୟରେ ବନ୍ଦ ହୋଇଥିବା ଆକାଉଣ୍ଟ କ୍ଷେତ୍ରରେ କାର୍ଯ୍ୟକାରୀ ହେଉଛି। ପାନାମା ପେପର୍ସରେ ମଧ୍ୟ ଭାରତୀୟଙ୍କ ଆକାଉଣ୍ଟ ତଥ୍ୟ ନେଇ ସୂଚନା ସାମ୍ନାକୁ ଆସିଥିଲା। ଭାରତୀୟମାନେ କେତେ ସଂଖ୍ୟକ ଆକାଉଣ୍ଟ ସୁଇସ୍ ବ୍ୟାଙ୍କରେ ରଖିଛନ୍ତି ଏବଂ କେତେ ଅର୍ଥ ରହିଛି ବୋଲି ଏକ ପ୍ରଶ୍ନର ଉତ୍ତର ଲୋଡାଯାଇଥିବା ବେଳେ ପ୍ରକ୍ରିୟା ସହ ଜଡିତ ଜଣେ ଅଧିକାରୀ ଏ ନେଇ କିଛି କହିବାକୁ ମନା କରିଦେଇଛନ୍ତି। ବିଶେଷକରି ଟିକସ ସଂକ୍ରାନ୍ତ ମାମଲାଗୁଡିକରେ ସୂଚନା ଆଦାନ ପ୍ରଦାନ ନିୟମ ରହିଥିବା ବେଳେ ଏହା ସରକାରୀ ସ୍ତରରେ ହସ୍ତାନ୍ତର ହୋଇଥାଏ ବୋଲି ଅଧିକାରୀ ସ୍ପଷ୍ଟ କରିଛନ୍ତି।
