ପଦ୍ମପୁର ,୮।୫ (ପ୍ରଦୀପ୍ତ ଦାଶ ): ବରଗଡ଼ ଜିଲା ପଦ୍ମପୁର ଉପଖଣ୍ଡ ଅନ୍ତର୍ଗତ ଜଗଦଳପୁର ଥାନା ପୋଲିସକୁ ପୁଣି ଏକ ବଡ଼ ସଫଳତା ମିଳିଛି। ଗତ ୪ଦିନ ତଲେ ନିକଟସ୍ଥ ଝାରବନ୍ଦ ଥାନା ଅଞ୍ଚଳରେ କୋଟି କୋଟି ଟଙ୍କାର ଗଞ୍ଜେଇ ଜବତ ହୋଇଥିବା ବେଳେ ଶନିବାର ନିକଟସ୍ଥ ଜଗଦଲପୁର ପୋଲିସ ଛତିଶଗଡ଼ ଚାଲାଣ ହେଉଥିବା ପ୍ରାୟ ୧୧ କିଲୋ ୨୫୦ ଗ୍ରାମ ଗଞ୍ଜେଇ ଜବତ କରିବା ସହ ଏହି କାରବାରରେ ସମ୍ପୃକ୍ତ ଜଣେ ଯୁବକ ଓ ୨ ଯୁବତୀ ଙ୍କୁ ଗିରଫ କରିଛି ।
ସୂଚନା ଅନୁଯାୟୀ, କୌଣସି ସୂତ୍ରରୁ ଖବର ପାଇ ଶନିବାର ମାଧ୍ୟନ୍ନ ପ୍ରାୟ ୧:୩୦ ସମୟରେ ଜଗଦଳପୁର ଥାନା ଅଧିକାରୀ ଦୀପ୍ତି ରଞ୍ଜନ ଦିଗାଲଙ୍କ ନେତୃତ୍ୱରେ ପୋଲିସ ଟିମ ଜଗଦଲପୁର ସାପ୍ତାହିକ ବଜାର ନିକଟରେ ଗୋଟିଏ ଧଳା ରଙ୍ଗର କୁଇଦ କାର (ସିଜି ୦୭ -ବିବି ୦୮୫୨ )କୁ ଅଟକାଇ ଯାଞ୍ଚ କରିଥିଲେ। ଯାଞ୍ଚ ବେଳେ ଏହି ଗାଡିରୁ ବେଆଇନ ଭାବେ ଚାଲାଣ ହେଉଥିବା ଗଞ୍ଜେଇ ଧରାପଡିଥିଲା ।
ଗିରଫ ହୋଇଥିବା ତିନି ଅଭିଯୁକ୍ତ ହେଲେ, ଛତିଶଗଡ଼ ରାଜ୍ୟ ବଲୋଦା ବଜାରର ଶିବ କୁମାର ୟାଦବ ଓ ତାଙ୍କର ଦୁଇ ସ୍ତ୍ରୀ ମନୀଷା ୟାଦବ ଓ ଯୋଗେଶ୍ୱରୀ ୟାଦବ। ସେମାନଙ୍କ ଠାରୁ ଗୋଟିଏ ମୋବାଇଲ ଫୋନ ଓ ବ୍ୟବହାର ହୋଇଥିବା କାର ଜବତ କରାଯାଇଛି ।
ଏହି ମାମଲାରେ ଜଗଦଳପୁର ଥାନା କେସ ନମ୍ବର ୭୬/୨୦୨୬, ଧାରା ୨୦(b)(ii)(B)/୨୯ NDPS Act ଅନୁଯାୟୀ ମାମଲା ରୁଜୁ କରାଯାଇଛି। ପଦ୍ମପୁର ଥାନାର ଏସ.ଆଇ (SI) ଅନ୍ତର୍ଯ୍ୟାମୀ ବେହେରା ଏହି ଘଟଣାର ତଦନ୍ତ କରୁଛନ୍ତି। ଅଭିଯୁକ୍ତମାନେ ନିଜର ବ୍ୟକ୍ତିଗତ ଫାଇଦା ପାଇଁ ଏହି ଗଞ୍ଜେଇ ଛତିଶଗଡ଼ର ସରାଇପାଲିକୁ ଚାଲାଣ କରୁଥିବା ପୋଲିସର ପ୍ରାଥମିକ ତଦନ୍ତରୁ ଜଣାପଡିଛି ।
