କୋଲକାତା,୮।୫: ପଶ୍ଚିମବଙ୍ଗ ରାଜନୀତିରେ ଏକ ବଡ଼ ପରିବର୍ତ୍ତନ ଦେଖିବାକୁ ମିଳିଛି। ରାଜ୍ୟରେ ଏବେ ‘ଶୁଭେନ୍ଦୁ ସରକାର’ ଗଠନ ହେବାକୁ ଯାଉଛି। କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଶୁକ୍ରବାର ଦିନ ଶୁଭେନ୍ଦୁଙ୍କ ନାମ ମୁଖ୍ୟମନ୍ତ୍ରୀ ଭାବେ ଘୋଷଣା କରିଛନ୍ତି।
ଅମିତ ଶାହ ଏବଂ ଓଡ଼ିଶାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଉପସ୍ଥିତିରେ ଭାଜପା ବିଧାୟକମାନେ ସର୍ବସମ୍ମତି କ୍ରମେ ଶୁଭେନ୍ଦୁଙ୍କୁ ନିଜର ନେତା ଭାବେ ଚୟନ କରିଛନ୍ତି।
ଶୁଭେନ୍ଦୁ ଅଧିକାରୀ ଚଳିତ ବିଧାନସଭା ନିର୍ବାଚନରେ ଦୁଇଟି ଆସନରୁ ବିଜୟୀ ହୋଇଛନ୍ତି। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ସେ ହାଇପ୍ରୋଫାଇଲ ଭବାନୀପୁର ଆସନରୁ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ପରାସ୍ତ କରିଛନ୍ତି। ଏହା ସହିତ ସେ ନନ୍ଦୀଗ୍ରାମ ଆସନରୁ ମଧ୍ୟ ବିଜୟ ବାନା ଉଡ଼ାଇଛନ୍ତି। ବର୍ତ୍ତମାନ ସେ ପଶ୍ଚିମବଙ୍ଗର ନୂତନ ମୁଖ୍ୟମନ୍ତ୍ରୀ ଭାବେ ଶପଥ ନେବେ।
ମୁଖ୍ୟମନ୍ତ୍ରୀ ଘୋଷଣା ହେବା ପରେ ଏବେ ଶୁଭେନ୍ଦୁଙ୍କ ସମ୍ପତ୍ତିକୁ ନେଇ ଚର୍ଚ୍ଚା ଜୋର ଧରିଛି। ଆଶ୍ଚର୍ଯ୍ୟର କଥା ହେଉଛି ଯେ, ବଙ୍ଗଳାର ଏହି ହେଭିୱେଟ ନେତାଙ୍କ ପାଖରେ ନା ଅଛି କାର୍ ନା ଅଛି ସୁନା।
୨୦୨୬ ନିର୍ବାଚନୀ ଶପଥପତ୍ର ଅନୁଯାୟୀ, ତାଙ୍କ ପାଖରେ ମାତ୍ର ୧୨,୦୦୦ ଟଙ୍କା ନଗଦ ଅଛି। ତାଙ୍କର ମୋଟ ସମ୍ପତ୍ତିର ମୂଲ୍ୟ ୮୫.୮୭ ଲକ୍ଷ ଟଙ୍କା ବୋଲି ଘୋଷଣା କରାଯାଇଛି। ଶୁଭେନ୍ଦୁଙ୍କ ନାମରେ କୌଣସି ପ୍ରକାରର ଋଣ ବା କରଜ ନାହିଁ। ଆସୋସିଏଶନ ଫର୍ ଡେମୋକ୍ରାଟିକ ରିଫର୍ମସ(ADR)ର ରିପୋର୍ଟ ଅନୁଯାୟୀ, ଶୁଭେନ୍ଦୁ ଅଧିକାରୀ ନିଜର ସମ୍ପତ୍ତି ୮୫,୮୭,୬୦୦ ଟଙ୍କା ଦର୍ଶାଇଛନ୍ତି।
୨୦୨୧ ମସିହା ନିର୍ବାଚନ ସମୟରେ ଶୁଭେନ୍ଦୁଙ୍କ ମୋଟ ସମ୍ପତ୍ତିର ମୂଲ୍ୟ ପ୍ରାୟ ୧.୧୦ କୋଟି ଟଙ୍କା ଥିଲା। ସେତେବେଳେ ତାଙ୍କର ବିଭିନ୍ନ ବ୍ୟାଙ୍କ ଆକାଉଣ୍ଟରେ ପ୍ରାୟ ୫୦ ଲକ୍ଷ ଟଙ୍କା ଜମା ଥିଲା। କିନ୍ତୁ ୨୦୨୬ ସୁଦ୍ଧା ତାଙ୍କର ସମ୍ପତ୍ତି ପୂର୍ବ ଅପେକ୍ଷା କମିଥିବା ଦେଖାଯାଇଛି।
ଭାଜପା ଶାସିତ ପଶ୍ଚିମବଙ୍ଗର ପ୍ରଥମ ମୁଖ୍ୟମନ୍ତ୍ରୀ ଭାବେ ସୁଭେନ୍ଦୁ ଅଧିକାରୀ କିପରି ଶାସନ କରୁଛନ୍ତି, ତାହା ଉପରେ ଏବେ ସମସ୍ତଙ୍କ ନଜର ରହିଛି।
