ତାମିଲନାଡୁରେ ସରକାର ଗଠନ ନେଇ କୌଣସି ଚୂଡ଼ାନ୍ତ ନିଷ୍ପତ୍ତି ନିଆଯାଇପାରୁ ନାହିଁ। ଟିଭିକେ ମୁଖ୍ୟ ବିଜୟ ରାଜ୍ୟପାଳଙ୍କ ନିକଟରେ ନିଜର ସଂଖ୍ୟାଗରିଷ୍ଠତା ପ୍ରମାଣ ଦେଇପାରି ନ ଥିବାରୁ ଶେଷ ମୂହୂର୍ତ୍ତରେ ଅନିଶ୍ଚିତତା ବୃଦ୍ଧି ପାଇଛି। ୨୩୪ ଆସନ ବିଶିଷ୍ଟ ବିଧାନସଭାରେ ସରକାର ଗଠନ ପାଇଁ ୧୧୮ ବିଧାୟକଙ୍କ ସମର୍ଥନ ଆବଶ୍ୟକ ଥିବାବେଳେ ଟିଭିକେର ୧୦୮ ସଦସ୍ୟ ଅଛନ୍ତି। ସେ ଆଉ ୮ ଜଣଙ୍କ ସମର୍ଥନ ଯୋଗାଡ଼ କରି ରାଜ୍ୟପାଳଙ୍କୁ ଭେଟିବାକୁ ଯାଇଥିଲେ। ହେଲେ ମ୍ୟାଜିକ୍ ବା କୁହୁକ ନମ୍ବରଠାରୁ ଏହା ୨ କମ୍ ଥିବାରୁ ବିଜୟଙ୍କୁ ରାଜ୍ୟପାଳ ସରକାର ଗଠନ ପାଇଁ ନିମନ୍ତ୍ରଣ କରି ନ ଥିବା ଜଣାପଡ଼ିଛି। ଅନ୍ୟପକ୍ଷରେ ଦୀର୍ଘ ୧୫ ବର୍ଷର ମମତା ବାନାର୍ଜୀଙ୍କ ତୃଣମୂଳ କଂଗ୍ରେସ ଶାସନର ପତନ ଘଟାଇ ଭାଜପା ପଶ୍ଚିମବଙ୍ଗରେ ବହୁମତ ପାଇପାରିଥିବାରୁ ନୂଆ ସରକାର ଗଢ଼ିବାକୁ ଯାଉଛି। ଭାଜପା ନେତା ଶୁଭେନ୍ଦୁ ଅଧିକାରୀଙ୍କ ପିଏ ଚନ୍ଦ୍ରନାଥ ରଥଙ୍କ ହତ୍ୟାର ଦୁଇ ଦିନ ପରେ ଶୁକ୍ରବାର ଭାଜପା ବିଧାୟକ ଦଳ ନେତା ନିର୍ବାଚନ ଲାଗି ବୈଠକ ବସିଥିଲା। ଏଥିରେ ଶୁଭେନ୍ଦୁଙ୍କୁ ସର୍ବସମ୍ମତ କ୍ରମେ ନେତା ନିର୍ବାଚିତ କରାଯାଇଛି। ସେ ପଶ୍ଚିମବଙ୍ଗର ନୂଆ ମୁଖ୍ୟମନ୍ତ୍ରୀ ହେବାକୁ ଯାଉଛନ୍ତି। ଶନିବାର ସେ ଶପଥ ନେବାର କାର୍ଯ୍ୟକ୍ରମ ରହିଛି।
ଚେନ୍ନାଇ,୯ା୫: ତାମିଲାଗା ଭେଟ୍ଟ୍ରି କାଝାଗମ୍ (ଟିଭିକେ) ମୁଖ୍ୟ ବିଜୟ ବାମଦଳର ସମର୍ଥନ ହାସଲ କରିବା ପରେ ଶୁକ୍ରବାର ସନ୍ଧ୍ୟାରେ ରାଜ୍ୟପାଳ ରାଜେନ୍ଦ୍ର ବିଶ୍ୱନାଥ ଆର୍ଲେକରଙ୍କୁ ଲୋକ ଭବନରେ ଭେଟି ତାମିଲନାଡୁରେ ସରକାର ଗଠନ ପାଇଁ ଦାବି ଜଣାଇଥିଲେ। ତେବେ ସଂଖ୍ୟାଗରିଷ୍ଠତା ପାଇଁ ଆବଶ୍ୟକ ସଂଖ୍ୟା ନ ଥିବାରୁ ରାଜ୍ୟପାଳ ବିଜୟଙ୍କୁ ସରକାର ଗଢ଼ିବା ପାଇଁ ଡାକି ନାହାନ୍ତି।
ବିଜୟ ଶୁକ୍ରବାର ସନ୍ଧ୍ୟାରେ ୧୧୬ ବିଧାୟକଙ୍କ ସ୍ବାକ୍ଷର ଥିବା ସମର୍ଥନପତ୍ର ରାଜ୍ୟପାଳଙ୍କୁ ଦେଇଥିଲେ। ସଂଖ୍ୟାଗରିଷ୍ଠତାକୁ ନେଇ ରାଜ୍ୟପାଳ ସନ୍ତୁଷ୍ଟ ନ ଥିବା ଜଣାପଡ଼ିଛି। ବିଜୟ କଂଗ୍ରେସ, ସିପିଆଇ ଏବଂ ସିପିଆଇ(ଏମ୍)ର ସମର୍ଥନପତ୍ର ହାସଲ କରିଥିବାବେଳେ ଭିସିକେ ପକ୍ଷରୁ ଆନୁଷ୍ଠାନିକ ସମର୍ଥନପତ୍ର ପାଇନାହାନ୍ତି। ରାଜ୍ୟପାଳ ନିମନ୍ତ୍ରଣ କରି ନ ଥିବାରୁ ବିଜୟ ଶନିବାର ଶପଥ ନେବାକୁ ନେଇ ଅନିଶ୍ଚିତତା ଦେଖାଦେଇଛି। ୨୩୪ ଆସନ ବିଶିଷ୍ଟ ତାମିଲନାଡୁ ବିଧାନସଭା ନିର୍ବାଚନରେ ଟିଭିକେ ପ୍ରଥମ ଥର ପ୍ରତିଦ୍ୱନ୍ଦ୍ୱିତା କରି ୧୦୮ ଆସନରେ ବିଜୟୀ ହୋଇ ଏକକ ସଂଖ୍ୟାଗରିଷ୍ଠ ଦଳ ଭାବେ ଉଭାହୋଇଥିବାବେଳେ ଆବଶ୍ୟକ ସଂଖ୍ୟାଠାରୁ ୧୦ ଆସନ ନିଅଣ୍ଟ ହେଉଥିଲା। ପୂର୍ବରୁ କଂଗ୍ରେସର ୫ ବିଧାୟକ ଟିଭିକେକୁ ସମର୍ଥନ ଜଣାଇଥିବାବେଳେ ସରକାର ଗଠନ ପାଇଁ ବିଜୟ ବାମଦଳ ଏବଂ ବିଦୁଥାଲାଇ ଚିରୁଥାଇଗଲ କାଟ୍ଚି (ଭିସିକେ)ର ସହାୟତା ଲୋଡ଼ିଥିଲେ। ଶୁକ୍ରବାର ସିପିଆଇ ଓ ସିପିଏମ୍ ଆନୁଷ୍ଠାନିକ ସମର୍ଥନ ଜଣାଇଛନ୍ତି। ବିଜୟ ପେରୁମ୍ବୁର ଏବଂ ତିରୁଚିରାପଲ୍ଲୀ ଇଷ୍ଟ ଆସନରୁ ଜିତିଥିବାରୁ ତାଙ୍କୁ ଗୋଟିଏ ଆସନରୁ ଇସ୍ତଫା ଦେବାକୁ ପଡ଼ିବ। ବିଜୟ ୩ ଦିନରେ ୩ ଥର ରାଜ୍ୟପାଳଙ୍କୁ ଭେଟିଲେଣି। ତେବେ ଆବଶ୍ୟକ ସଂଖ୍ୟା ନ ଥିବାରୁ ରାଜ୍ୟପାଳ ସମୟ ଗଡ଼ାଇ ଚାଲିଛନ୍ତି। ପୂର୍ବରୁ ଆଇୟୁଏମ୍ଏଲ୍ ବିଜୟଙ୍କ ଦଳକୁ ନିଃସର୍ତ୍ତ ସମର୍ଥନ ଦେବ ବୋଲି କହିଥିବାବେଳେ ଏବେ ମତ ବଦଳାଇ ଡିଏମ୍କେ ସହ ରହିବ ବୋଲି କହିଛି। ଭିସିକେ ସମର୍ଥନ ଦେବା ନେଇ ଶନିବାର ନିଷ୍ପତ୍ତି ନେଇପାରେ ବୋଲି କୁହାଯାଉଛି। ଅନ୍ୟପକ୍ଷରେ ସମ୍ବିଧାନ ଅନୁଯାୟୀ ନୂଆ ସରକାର ଗଠନ ନିମନ୍ତେ ଆବଶ୍ୟକ ପଦକ୍ଷେପ ତୁରନ୍ତ ସୁନିଶ୍ଚିତ କରିବା ଲାଗି ବିଦାୟୀ ମୁଖ୍ୟମନ୍ତ୍ରୀ ଏମ୍.କେ. ଷ୍ଟାଲିନ୍ ରାଜ୍ୟପାଳଙ୍କୁ ଅନୁରୋଧ କରିଥିଲେ। ବିଧାନସଭା ଫଳାଫଳ ଘୋଷଣା ପରେ ରାଜ୍ୟପାଳ ତୁରନ୍ତ ବିଧାନସଭା ଭଙ୍ଗ କରିଥିଲେ। ତେଣୁ ନୂଆ ସରକାର ଗଠନରେ ବିଳମ୍ବ ହେବା ଉଚିତ ନୁହେଁ ବୋଲି ଷ୍ଟାଲିନ୍ କହିଥିଲେ।
