ବାଲେଶ୍ୱର,୯ା୫(ବାଞ୍ଛାନିଧି ଦେ): ଭାରତର ପ୍ରତିରକ୍ଷା ବିଭାଗ ଦେଶର ସୁରକ୍ଷା ରଣନୈତିକ କ୍ଷମତାରେ ଆଉ ଏକ ଐତିହାସିକ ସଫଳତା ହାସଲ କରିଛି। ଏହି କ୍ରମରେ ଓଡ଼ିଶା ଉପକୂଳର ଡ. ଏପିଜେ ଅବଦୁଲ କଲାମ ଦୀପରୁ ମଲ୍ଟିପଲ୍ ଇଣ୍ଡିପେଣ୍ଡେଣ୍ଟଲି ଟାର୍ଗେଟେଡ୍ ରି-ଏଣ୍ଟ୍ରି ଭେହିକଲ୍ (ଏମ୍ଆଇଆରଭି) ରୁ ଉନ୍ନତ ଅଗ୍ନି କ୍ଷେପଣାସ୍ତ୍ରର ସଫଳ ପରୀକ୍ଷଣ କରାଯାଇଛି।
ଏହି ପରୀକ୍ଷଣ ସମୟରେ କ୍ଷେପଣାସ୍ତ୍ରରେ ଏକାଧିକ ୱାରହେଡ୍ ସଂଯୋଜିତ ହୋଇଥିଲା। ଏହି ୱାରହେଡଗୁଡ଼ିକ ଭାରତ ମହାସାଗର ଅଞ୍ଚଳର ବିସ୍ତୃତ ଭୌଗୋଳିକ କ୍ଷେତ୍ରରେ ଥିବା ଭିନ୍ନ ଭିନ୍ନ ଲକ୍ଷ୍ୟକୁ ସଫଳତାର ସହିତ ଭେଦ କରିଥିଲା। ଏଥିପାଇଁ ଦୁଇ ଦିନ ପୂର୍ବରୁ ବଙ୍ଗୋପସାଗର ଓ ଭାରତ ମହାସାଗର ଅଞ୍ଚଳରେ ଉଡ଼ାଣ ନିଷିଦ୍ଧ ସୂଚନା (ନୋଟାମ) ପ୍ରଦାନ କରାଯାଇଥିଲା। ଏକୀକୃତ ପରୀକ୍ଷଣ କେନ୍ଦ୍ର (ଆଇଟିଆର) ଦ୍ୱାରା ନିୟୋଜିତ ଅନେକ ଭୂମିଭିତ୍ତିକ ଏବଂ ବଙ୍ଗୋପସାଗରରେ ଜାହାଜ-ଆଧାରିତ ଟେଲିମେଟ୍ରି ଓ ଟ୍ରାକିଂ ସିଷ୍ଟମ୍ ମାଧ୍ୟମରେ ପରୀକ୍ଷଣ ଆରମ୍ଭରୁ ସମସ୍ତ ୱାରହେଡ୍ ଲକ୍ଷ୍ୟଭେଦ କରିବା ପର୍ଯ୍ୟନ୍ତ ସମଗ୍ର ପ୍ରକ୍ରିୟାକୁ ଟ୍ରାକ୍ କରାଯାଇଥିଲା। ଏହି ପରୀକ୍ଷଣ ପାଇଁ ନିର୍ଦ୍ଧାରିତ ସମସ୍ତ ମିଶନ୍ ଲକ୍ଷ୍ୟ ସଫଳତାର ସହ ପୂରଣ ହୋଇଥିବା ଉଡ଼ାଣ ତଥ୍ୟରୁ ସୂଚନା ମିଳିଛି ବୋଲି ପ୍ରତିରକ୍ଷା ବିଭାଗ ପକ୍ଷରୁ ଶନିବାର ଜାରି ପ୍ରେସ ବିଜ୍ଞପ୍ତିରେ କୁହାଯାଇଛି।
ଏହି ମିଶାଇଲ୍ ବ୍ୟବସ୍ଥାକୁ ଦେଶର ବିଭିନ୍ନ ଶିଳ୍ପ ସଂସ୍ଥାଙ୍କ ସହଯୋଗରେ ପ୍ରତିରକ୍ଷା ଗବେଷଣା ଓ ଉନ୍ନୟନ ସଂସ୍ଥାନ (ଡିଆରଡିଓ)ର ବିଭିନ୍ନ ପରୀକ୍ଷାଗାର ଦ୍ୱାରା ବିକଶିତ କରାଯାଇଛି। ପରୀକ୍ଷଣ ସମୟରେ ଡିଆରଡିଓର ବରିଷ୍ଠ ବୈଜ୍ଞାନିକ ଓ ଭାରତୀୟ ସେନାର ଅଧିକାରୀମାନେ ଉପସ୍ଥିତ ଥିଲେ। ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଏହି ସଫଳ ପରୀକ୍ଷଣ ପାଇଁ ଭାରତୀୟ ସେନା ଏବଂ ଏଥିରେ ଜଡ଼ିତ ଶିଳ୍ପ ସଂସ୍ଥାଗୁଡିକୁ ଅଭିନନ୍ଦନ ଜଣାଇଛନ୍ତି। ସମ୍ପ୍ରତି ଭାରତ ପାଇଁ ବଢୁଥିବା ସୁରକ୍ଷା ଚ୍ୟାଲେଞ୍ଜକୁ ଦୃଷ୍ଟିରେ ରଖି ଏହି ସଫଳତା ଦେଶର ରକ୍ଷା ପ୍ରସ୍ତୁତିକୁ ଆହୁରି ସୁଦୃଢ କରିବ ବୋଲି ସେ କହିଛନ୍ତି। ସେହିପରି ପ୍ରତିରକ୍ଷା ଗବେଷଣା ଓ ବିକାଶ ବିଭାଗର ସଚିବ ଏବଂ ଡିଆରଡିଓ ଅଧ୍ୟକ୍ଷ ଡ. ସମୀର ଭି କାମତ ମଧ୍ୟ ସଫଳ ପରୀକ୍ଷାରେ ଜଡିତ ବୈଜ୍ଞାନିକ ଓ ପ୍ରାୟୋଗିକ ଦଳକୁ ଅଭିନନ୍ଦନ ଜଣାଇଛନ୍ତି।
Dharitri – Odisha’s No.1 Odia Daily
