ନୂଆଦିଲ୍ଲୀ: ବିଶ୍ୱ କ୍ରିକେଟ୍ର ଅନ୍ୟତମ ମହାନ ଉଇକେଟ୍କିପରଙ୍କ ମଧ୍ୟରେ ଅଷ୍ଟ୍ରେଲିଆର ଆଦାମ ଗିଲଖ୍ରୀଷ୍ଟ ଅନ୍ୟତମ। କ୍ରିକେଟ୍ରେ ଉଇକେଟ୍କିପରଙ୍କ ଭୂମିକାରେ ହୋଇଥିବା ପରିବର୍ତ୍ତନର ସମସ୍ତ ଶ୍ରେୟ ଗିଲ୍ଖ୍ରୀଷ୍ଟଙ୍କୁ ଦିଆଯାଏ। କିନ୍ତୁ ଏକଦା ଭଲଫର୍ମରେ ଥିବାବେଳେ ସମସ୍ତଙ୍କୁ ଚକିତ କରି ସେ କ୍ରିକେଟ୍ରୁ ସନ୍ନ୍ୟାସ ନେଇଯାଇଥିଲେ। ୨୦୦୮ରେ ଆଡିଲେଡ୍ରେ ଭାରତ ବିପକ୍ଷ ୪ର୍ଥ ଟେଷ୍ଟ ମ୍ୟାଚ୍ ପରେ ଏହି କିମ୍ବଦନ୍ତୀ ଉଇକେଟ୍କିପର କ୍ରିକେଟ୍କୁ ଅଲ୍ବିଦା କରିଥିଲେ। କୁହାଯାଏ, ସେହି ମ୍ୟାଚ୍ରେ ଭାରତର ଟେଷ୍ଟ ସ୍ପେଶାଲିଷ୍ଟ ଭି.ଭି.ଏସ୍. ଲକ୍ଷ୍ମଣଙ୍କ ଏକ କ୍ୟାଚ୍ ଛାଡ଼ିଥିଲେ ଗିଲଖ୍ରୀଷ୍ଟ। ଆଉ ଏହି କାରଣରୁ ହିଁ ସେ କ୍ରିକେଟ୍ ଛାଡ଼ିବାକୁ ନିଷ୍ପତ୍ତି ନେଇଥିଲେ। ଅବସରର ନେବାର ଦୀର୍ଘ ୧୨ ବର୍ଷ ପରେ ଏହି କଥାକୁ ସ୍ବୀକାର କରିଛନ୍ତି ନିଜେ ଗିଲ୍ଖ୍ରୀଷ୍ଟ। ଏକ ସାକ୍ଷାତ୍କାର ଅବସରରେ ୪୮ ବର୍ଷୀୟ ଗିଲଖ୍ରୀଷ୍ଟ କହିଛନ୍ତି, ୨୦୦୦ ମସିହା ପ୍ରାରମ୍ଭରେ ଉଭୟ ଲକ୍ଷ୍ମଣ ଓ ହରଭଜନ ସିଂଙ୍କ ପାଇଁ ଅଷ୍ଟ୍ରେଲିଆ ଟିମ୍ ବହୁତ ଅସୁବିଧାର ସମ୍ମୁଖିନ ହେଉଥିଲା। ଭାରତର ଅନ୍ୟବ୍ୟାଟ୍ସମ୍ୟାନଙ୍କ ଅପେକ୍ଷା ଲକ୍ଷ୍ମଣ ଆମ ବିରୋଧରେ ବହୁତ ସ୍କୋର କରୁଥିଲେ। ଏବଂ ପରେ ହରଭଜନ ଆସି ଉଇକେଟ୍ ଅକ୍ତିଆର କରୁଥିଲେ। ଯଦି ଟେଷ୍ଟ କ୍ରିକେଟ୍ରେ ଲକ୍ଷ୍ମଣଙ୍କ ପରି ବ୍ୟାଟ୍ସମ୍ୟାନଙ୍କ କ୍ୟାଚ୍ ଛାଡ଼ୁଛ ତେବେ ଅବସର ନେବା ପାଇଁ ଏହା ଉତ୍ତମ କାରଣ ବୋଲି ମୁଁ ଭାବୁଛି। ଲକ୍ଷ୍ମଣଙ୍କୁ ଅଧିକ ସୁଯୋଗ ଦେଇପାରିବେ ନାହିଁ। ଏହି ବାମହାତୀ ବ୍ୟାଟ୍ସମ୍ୟାନ ୧୯୯୬ରୁ ୨୦୦୮ ମଧ୍ୟରେ ଅଷ୍ଟ୍ରେଲିଆ ପକ୍ଷରୁ ୯୬ ଟେଷ୍ଟ, ୨୮୭ ଦିନିକିଆ ଓ ୧୩ ଟି୨୦ ମ୍ୟାଚ୍ ଖେଳିଛନ୍ତି। ଟେଷ୍ଟରେ ସେ ୫,୫୭୦ ଓ ଦିନିକିଆରେ ୯୬୧୯ ରନ କରିଛନ୍ତି।
