ବାରିପଦା ଅଫିସ,୧୭ା୬- ମହାତ୍ମାଗାନ୍ଧୀ ଜାତୀୟ ଗ୍ରାମୀଣ କର୍ମନିଶ୍ଚିତ ନିଯୁକ୍ତି ଯୋଜନା (ଏମ୍ଜିଏନ୍ଆର୍ଇଜିଏସ୍)ରେ କାର୍ଯ୍ୟ କରିଥିବା ବେଳେ ମାସରୁ ଉର୍ଦ୍ଧ୍ୱ ଦିନ ହେଲାଣି ଶ୍ରମିକମାନଙ୍କୁ ଟଙ୍କା ମିଳିନାହିଁ। ସେମାନଙ୍କ ପ୍ରାପ୍ୟ ପାଇଁ ଶ୍ରମିକମାନେ ପଞ୍ଚାୟତ ନିର୍ବାହୀ ଅଧିକାରୀ (ପିଇଓ)ଙ୍କଠାରୁ ଆରମ୍ଭ କରି ସରପଞ୍ଚଙ୍କୁ ଜଣାଇଥିଲେ ମଧ୍ୟ କେହି ଶୁଣିଲେ ନାହିଁ ବୋଲି ଅଭିଯୋଗ ହୋଇଛି। ଏହାର ପ୍ରତିବାଦରେ ମଙ୍ଗଳବାର ଶ୍ରମିକମାନେ ଶ୍ୟାମାଖୁଣ୍ଟା ବ୍ଲକ କାର୍ଯ୍ୟାଳୟ ଘେରାଉ କରିଥିଲେ। ପରେ ବିଡିଓ କିଛି ଦିନ ଭିତରେ ସେମାନଙ୍କ ଟଙ୍କା ଦିଆଯିବ ବୋଲି ପ୍ରତିଶ୍ରୁତି ଦେବା ପରେ ଆନ୍ଦୋଳନ ପ୍ରତ୍ୟାହୃତ ହୋଇଥିଲା।
ସୂଚନା ଅନୁଯାୟୀ, ଶ୍ୟାମାଖୁଣ୍ଟା ବ୍ଲକ ଭାଲୁକି ପଞ୍ଚାୟତର ଭାଲୁକି ଗ୍ରାମରେ ଜବକାର୍ଡ଼ଧାରୀ ପୋଖରୀ ଖୋଳା ଓ ଜମି ସମତଳ କାମ କରିଥିଲେ। ନିୟମ ଅନୁସାରେ ପ୍ରତି ସପ୍ତାହରେ ଟଙ୍କା ମିଳିବା କଥା ହେଲେ ୫ ସପ୍ତାହ କାମ କରିଥିଲେ ମଧ୍ୟ ସେମାନଙ୍କୁ ଟଙ୍କା ମିଳିନାହିଁ। ଏନେଇ ବିଡିଓ ଜୟକୃଷ୍ଣ ପାତ୍ରଙ୍କୁ ପଚାରିବାରୁ ଶ୍ରମିକମାନେ କିଛି ଦିନ ଭିତରେ ସେମାନଙ୍କ ଟଙ୍କା ପାଇବେ ବୋଲି କହିଛନ୍ତି।
