ମୁମ୍ବାଇ: ଇଣ୍ଟରନେଟ ମୁଭି ଡାଟାବେସ (IMDb) ପକ୍ଷରୁ ଚଳିତ ସପ୍ତାହର ସବୁଠାରୁ ଲୋକପ୍ରିୟ ଭାରତୀୟ ସେଲିବ୍ରିଟିଙ୍କ ତାଲିକା ଜାରି କରାଯାଇଛି। ଏହି ତାଲିକାରେ ବଡ଼ ବଡ଼ ସୁପରଷ୍ଟାରମାନଙ୍କୁ ପଛରେ ପକାଇ ଜଣେ ନୂଆ ତଥା ୟଙ୍ଗ ଆକ୍ଟର ସମସ୍ତଙ୍କୁ ଚକିତ କରି ଶୀର୍ଷ ସ୍ଥାନ ହାସଲ କରିଛନ୍ତି। ସେହି ଉଦୀୟମାନ କଳାକାର ଜଣକ ହେଉଛନ୍ତି ଯୁଦ୍ଧବୀର ଅହଲାୱତ। ନିଜର ଦମଦାର ଅଭିନୟ ଯୋଗୁ ସେ ଐଶ୍ୱର୍ଯ୍ୟା ରାୟ, ବିଜୟ, ଆଲିଆ ଭଟ୍ଟ ଏବଂ ମୋହନଲାଲଙ୍କ ଭଳି ଷ୍ଟାରମାନଙ୍କୁ ପଛରେ ପକାଇ IMDb ଲିଷ୍ଟର ନମ୍ବର-୧ ଆସନ ହାତେଇଛନ୍ତି। ‘କର୍ତ୍ତବ୍ୟ’ ଫିଲ୍ମରୁ ମିଳିଲା ବଡ଼ ସଫଳତା। ନେଟଫ୍ଲିକ୍ସରେ ରିଲିଜ ହୋଇଥିବା ସୈଫ ଅଲୀ ଖାନଙ୍କ ଅଭିନୀତ ଫିଲ୍ମ ‘କର୍ତ୍ତବ୍ୟ’ରେ ଯୁଦ୍ଧବୀର ଏକ ଗୁରୁତ୍ୱପୂର୍ଣ୍ଣ ସପୋର୍ଟିଂ ରୋଲରେ ନଜର ଆସିଛନ୍ତି। ଫିଲ୍ମରେ ସେ ଜଣେ ୧୪ ବର୍ଷର ନାବାଳକ ଚରିତ୍ରରେ ଅଭିନୟ କରିଛନ୍ତି, ଯାହାଙ୍କୁ ଏକ ମର୍ଡର କେସ୍ରେ ଫସାଇ ଦିଆଯାଏ ଏବଂ ସୈଫ ଅଲୀ ଖାନ (ପୋଲିସ ଭୂମିକାରେ) ତାଙ୍କୁ ସୁରକ୍ଷା ଦେଉଥିବାର ଦେଖାଯାଇଛି। ଫିଲ୍ମରେ ତାଙ୍କର ଏହି ଚରିତ୍ର ଏବଂ ଚମତ୍କାର ଅଭିନୟକୁ ଦର୍ଶକ ଓ ସମୀକ୍ଷକମାନେ ଖୁବ ପ୍ରଶଂସା କରୁଛନ୍ତି। ଏହି କାରଣରୁ ଇଣ୍ଟରନେଟ୍ରେ ଲୋକେ ତାଙ୍କ ବିଷୟରେ ଜାଣିବା ପାଇଁ IMDb ପ୍ରୋଫାଇଲକୁ ବହୁଳ ମାତ୍ରାରେ ଭିଜିଟ କରିଛନ୍ତି, ଯାହା ତାଙ୍କୁ ନମ୍ବର-୧ ସ୍ଥାନକୁ ନେଇଯାଇଛି।
ହରିୟାଣାର ବାସିନ୍ଦା ଯୁଦ୍ଧବୀର ଦେଖିବାକୁ ଜଣେ ଚାଇଲ୍ଡ ଆକ୍ଟର (ଶିଶୁ କଳାକାର) ଭଳି ମନେହୁଅନ୍ତି, କିନ୍ତୁ ସେ ନିଜର ଏକ ପୁରୁଣା ଇଣ୍ଟରଭ୍ୟୁରେ ସ୍ପଷ୍ଟ କରିଥିଲେ ଯେ ସେ ପ୍ରକୃତରେ ନାବାଳକ (Minor) ନୁହନ୍ତି, ବରଂ ତାଙ୍କ ଚେହେରା ଛୋଟ ପିଲାଙ୍କ ଭଳି ଦେଖାଯାଏ। ଯୁଦ୍ଧବୀର ୨୦୧୯ରେ ‘ଷାଣ୍ଡ କୀ ଆଙ୍ଖ’ (Saand Ki Aankh) ଫିଲ୍ମରୁ ନିଜର ଆକ୍ଟିଂ କ୍ୟାରିୟର ଆରମ୍ଭ କରିଥିଲେ। ଏହା ବ୍ୟତୀତ ସେ ‘ଲଭ ହଷ୍ଟେଲ’ (Love Hostel) ଏବଂ ‘କୋ-ଏଡ’ (Co-Ed) ୱେବ ସିରିଜରେ ମଧ୍ୟ କାମ କରିଛନ୍ତି।
IMDb ର ଚଳିତ ସପ୍ତାହର ଟପ-୩୦ ଲିଷ୍ଟରେ ଯୁଦ୍ଧବୀର ଅହଲାୱତ ପ୍ରଥମ ସ୍ଥାନରେ ରହିଥିବା ବେଳେ କାନ୍ସ ଫିଲ୍ମ ଫେଷ୍ଟିଭାଲ ପାଇଁ ଚର୍ଚ୍ଚାରେ ଥିବା ଐଶ୍ୱର୍ଯ୍ୟା ରାୟ ୩ୟ ସ୍ଥାନରେ ଏବଂ ତାମିଲନାଡୁ ରାଜନୀତିରେ ସକ୍ରିୟ ଥିବା ସୁପରଷ୍ଟାର୍ ବିଜୟ ୪ର୍ଥ ସ୍ଥାନରେ ଅଛନ୍ତି। ଏପରିକି ଜୁନିୟର ଏନଟିଆର (Jr NTR) ୨୪ ସ୍ଥାନରେ ରହିଥିବା ବେଳେ ଶାହରୁଖ ଖାନ ଟପ-୩୦ ଲିଷ୍ଟରୁ ବାହାରେ ଅଛନ୍ତି। ୟୁଜର୍ସମାନେ ସୋସିଆଲ ମିଡିଆରେ ଯୁଦ୍ଧବୀରଙ୍କର ଏହି ସଫଳତାକୁ ନେଇ ବହୁତ ଖୁସି ପ୍ରକଟ କରିଛନ୍ତି ଏବଂ ତାଙ୍କୁ ଭବିଷ୍ୟତ ପାଇଁ ଅନେକ ଶୁଭେଚ୍ଛା ଜଣାଉଛନ୍ତି।
