ପାଲଲହଡା, ୨୬।୩ (ଡି.ଏନ.ଏ.): ପାଲଲହଡା ଉପଖଣ୍ଡରେ ଆଳୁ, ପିଆଜର ଦର କିଲୋ ପିଛା ହଠାତ୍ ୧୫ ଟଙ୍କା ବଢ଼ାଇ ଦିଆଯାଇଥିବା ଅଭିଯୋଗ ମିଳିବା ପରେ ଗୁରୁବାର ପ୍ରଶାସନ ପକ୍ଷରୁ ଚଢ଼ାଉ କରାଯାଇଥିଲା। ଉପଜିଲାପାଳ ଅଜିତ କୁମାର ପ୍ରଧାନ, ଉପଖଣ୍ଡ ପୋଲିସ ଅଧିକାରୀ ଯଶୋବନ୍ତ ସାମଲ, ତହସିଲଦାର ସ୍ବାଗତ ଦାଶ, ଯୋଗାଣ ନିରୀକ୍ଷକ ପିଣ୍ଟୁ ବେହେରାଙ୍କୁ ନେଇ ଗଠିତ ଏକ ଟିମ୍ ସହରର ବିଭିନ୍ନ ଆଳୁ ଗୋଦାମ ଏବଂ ଦୋକାନରେ ଯାଞ୍ଚ କରିଥିଲେ। ଜରୁରୀ ପରିସ୍ଥିତିରେ ଆଳୁର ଏପରି ମୂଲ୍ୟବୃଦ୍ଧି ନ କରି କିଲୋ ପ୍ରତି ୨୦ ଟଙ୍କାରେ ବିକ୍ରି କରିବାକୁ ଅଧିକାରୀମାନେ ନିର୍ଦ୍ଦେଶ ଦେଇଥିଲେ। ତେବେ ଗାଡ଼ି ଭଡ଼ା ଅଧିକ ବଢ଼ିଯାଇଥିବାରୁ ଏପରି ଅବସ୍ଥା ସୃଷ୍ଟି ହୋଇଥିବା ହୋଲସେଲରମାନେ କହିବା ପରେ ଉପଖଣ୍ଡ ଯୋଗାଣ ବିଭାଗ ପକ୍ଷରୁ ସହରର ୨ଟି ସ୍ଥାନରେ ୨୦ ଟଙ୍କା କିଲୋ ପ୍ରତି ଆଳୁ ବିକ୍ରି କରାଯିବାର ବ୍ୟବସ୍ଥା କରାଯାଇଛି। ପ୍ରତି ବ୍ୟକ୍ତିଙ୍କୁ ଏକ କିଲୋ ଆଳୁ ଯୋଗାଇ ଦିଆଯାଉଛି ଏବଂ ପରିସ୍ଥିତି ନ ସୁଧୁରିବା ପର୍ଯ୍ୟନ୍ତ ବିଭାଗ ଲୋକଙ୍କୁ ସରକାରୀ ଦରରେ ଆଳୁ ଯୋଗାଇଦେବ ବୋଲି କୁହାଯାଇଛି।
