ଭୁବନେଶ୍ୱର,୮ା୫(ଅନୁରାଧା ମହାରଣା): ଗୁଜରାଟ ଗସ୍ତରୁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ୪୮,୩୩୦ କୋଟି ଟଙ୍କାର ପୁଞ୍ଜି ବିନିଯୋଗ ପ୍ରତିଶ୍ରୁତି ସହ ଓଡ଼ିଶା ଫେରିଛନ୍ତି। ଅହମ୍ମଦାବାଦ, ମୁନ୍ଦ୍ରା ଏବଂ ଭଦୋଦରାରେ ଅନୁଷ୍ଠିତ ଓଡ଼ିଶା ନିବେଶକ ସମ୍ମିଳନୀ ରୋଡ୍ ଶୋ’ରେ ରାଜ୍ୟ ସରକାର ୭୧ଟି ବିନିଯୋଗ ପ୍ରସ୍ତାବ ପାଇଛନ୍ତି; ଯେଉଁଥିରେ ୮ଟି ବୁଝାମଣାପତ୍ର (ଏମ୍ଓୟୁ) ଏବଂ ୬୩ଟି ଇନ୍ଭେଷ୍ଟମେଣ୍ଟ ଇଣ୍ଟେନ୍ଶନ ଫର୍ମ ସାମିଲ୍ ରହିଛି। ଏହି ବିନିଯୋଗ ମାଧ୍ୟମରେ ଓଡ଼ିଶାରେ ପ୍ରାୟ ୬୭,୮୩୮ଟି ନୂଆ ରୋଜଗାର ସୃଷ୍ଟି ହେବ ବୋଲି ଆଶା କରାଯାଉଛି।
ଗୁରୁବାର ଭଦୋଦରାରେ ଅନୁଷ୍ଠିତ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ମାଝୀ କହିଛନ୍ତି, ଦେଶର ଶିଳ୍ପ ବିକାଶରେ ପଶ୍ଚିମ ଭାରତ ଆଗୁଆ ରହିଛି। ବିକଶିତ ଭାରତ ଗଠନ ପାଇଁ ଏବେ ପୂର୍ବ ଭାରତକୁ ଉଠିବାକୁ ପଡ଼ିବ ଏବଂ ଓଡ଼ିଶା ସେହି ବିକାଶର ନେତୃତ୍ୱ ନେବାକୁ ପ୍ରସ୍ତୁତ ରହିଛି। ସେ କହିଛନ୍ତି, ଏହି ସମୟ ହେଉଛି ଉଚିତ ସମୟ। ଓଡ଼ିଶାକୁ ପୂର୍ବ ଭାରତର ବିକାଶ ଇଞ୍ଜିନ୍ ଭାବେ ପ୍ରତିଷ୍ଠିତ କରିବା ସହ ପୂର୍ବୋଦୟ ଭିଜନ୍ ଅନୁଯାୟୀ ରାଜ୍ୟର ଶିଳ୍ପ ବିକାଶକୁ ତ୍ୱରାନ୍ବିତ କରିବା ଲକ୍ଷ୍ୟ ରଖାଯାଇଛି। ରାଜ୍ୟରେ କଞ୍ଚାମାଲ୍ର ପ୍ରାଚୁର୍ଯ୍ୟ, ଆଧୁନିକ ଅବସଂରଚନା, ବନ୍ଦରଭିତ୍ତିକ ଲଜିଷ୍ଟିକ୍ସ, ନୀତି ସ୍ଥିରତା ଏବଂ ତୁରନ୍ତ ପ୍ରକଳ୍ପ କାର୍ଯ୍ୟକାରିତାକୁ ଆଧାର କରି ମୁଖ୍ୟମନ୍ତ୍ରୀ ଗୁଜରାଟର ଶିଳ୍ପପତିମାନଙ୍କୁ ଓଡ଼ିଶାରେ ବିନିଯୋଗ ପାଇଁ ଆହ୍ବାନ ଜଣାଇଛନ୍ତି।
ପାରାଦୀପ, ଧାମରା ଏବଂ ଗୋପାଳପୁର ବନ୍ଦର ମାଧ୍ୟମରେ ଓଡ଼ିଶା ପୂର୍ବ ଏସିଆ, ଦକ୍ଷିଣ-ପୂର୍ବ ଏସିଆ ଏବଂ ଇଣ୍ଡୋ-ପ୍ରଶାନ୍ତ ବଜାର ସହିତ ସଂଯୁକ୍ତ ହୋଇଥିବାରୁ ଏହାକୁ ଭାରତର ଦ୍ରୁତତମ ବାଣିଜ୍ୟ କରିଡରର ଦ୍ୱାର ବୋଲି ବର୍ଣ୍ଣନା କରାଯାଇଛି। ରୋଡ୍ ଶୋ’ରେ ମୋଟ୍ ୧୩୨ଟି ବୈଠକ, ୪ଟି ସେକ୍ଟରାଲ୍ ରାଉଣ୍ଡ ଟେବୁଲ୍ ଏବଂ ଦୁଇଟି ବୃହତ୍ ରୋଡ୍ ଶୋ’ ଅନୁଷ୍ଠିତ ହୋଇଥିଲା, ଯେଉଁଥିରେ ୭୦୦ରୁ ଅଧିକ ଶିଳ୍ପପତି ଯୋଗଦେଇଥିଲେ। ମେଟାଲ୍ ଡାଉନଷ୍ଟ୍ରିମ୍, କେମିକାଲ୍ସ, ଫାର୍ମାସ୍ୟୁଟିକାଲ୍ସ, ଗ୍ରୀନ୍ ଏନର୍ଜି, ଇନ୍ଫ୍ରାଷ୍ଟ୍ରକ୍ଚର, ଫୁଡ୍ ପ୍ରୋସେସିଂ, ଟେକ୍ସଟାଇଲ୍, ଆଇଟି, ସେମିକଣ୍ଡକ୍ଟର୍, ଟୁରିଜମ୍, ଏରୋସ୍ପେସ୍ ଓ ଡିଫେନ୍ସ ସମେତ ବିଭିନ୍ନ କ୍ଷେତ୍ରରେ ବିନିଯୋଗ ପ୍ରତିଶ୍ରୁତି ମିଳିଛି। ବୈଷୟିକ ଶିକ୍ଷା ଓ ଦକ୍ଷତା ବିକାଶ ତଥା ଶିଳ୍ପମନ୍ତ୍ରୀ ସମ୍ପଦ ଚନ୍ଦ୍ର ସ୍ବାଇଁ କହିଛନ୍ତି, ଓଡ଼ିଶା କେବଳ ଏକ ବିନିଯୋଗ ଗନ୍ତବ୍ୟ ନୁହେଁ, ବରଂ ଦୀର୍ଘକାଳୀନ ବିଶ୍ୱାସ ଓ ଭାଗୀଦାରିର ପ୍ରତୀକ ହେବାକୁ ଯାଉଛି। ସୂଚନାଥାଉ କି, ରାଜ୍ୟ ସରକାର ଗୋ-ସ୍ବିଫ୍ଟ ସିଙ୍ଗଲ୍ ୱିଣ୍ଡୋ ବ୍ୟବସ୍ଥା ମାଧ୍ୟମରେ ବିନିଯୋଗକାରୀଙ୍କୁ ତୁରନ୍ତ ସହାୟତା ପ୍ରଦାନ କରୁଛନ୍ତିି।
Dharitri – Odisha’s No.1 Odia Daily
