ପାଟଣା,୯ା୫(ବୀର କିଶୋର ଦାଶ): ପାଟଣା,୮ା୫(ବୀରକିଶୋର ଦାଶ): କେନ୍ଦୁଝର ଜିଲା ପୂର୍ତ୍ତ ବିଭାଗ ତୁରୁମୁଙ୍ଗା ଚମ୍ପୁଆ କାଞ୍ଜିଆଶୁଳା ମୁଖ୍ୟରାସ୍ତାର ନେଉଳିପଶି ନିକଟରେ ଶୁକ୍ରବାର ସକାଳେ ଏକ ବିରାଟକାୟ ଠାକୁରାଣୀ ଶାଳଗଛ ରାସ୍ତା ଉପରେ ଉପୁଡ଼ି ପଡିଛି। ରାସ୍ତା ଅବରୋଧ ହୋଇ ଉଭୟ ପାର୍ଶ୍ୱରେ ଗାଡ଼ି ଚଳାଚଳ ପ୍ରଭାବିତ ହୋଇଛି। ମାତ୍ର ଏହା ଏକ ଠାକୁରାଣୀ ଶାଳଗଛ ହୋଇଥିବାରୁ ପୂଜାପାଠ ପୂର୍ବରୁ ଗଛ କାଟି ହେବନାହିଁ ବୋଲି ସ୍ଥାନୀୟ ଲୋକେ କହିଛନ୍ତି। ବୋଦା ବଳି ଦେଇ ପୂଜା ପରେ ଗଛ କଟାଯିବ। ଫଳରେ ଅଗ୍ନିଶମ କର୍ମଚାରୀ ଘଟଣାସ୍ଥଳକୁ ଯାଇଥିଲେ ହେଁ ଗଛ ନ କାଟି ଫେରିଆସିଛନ୍ତି। ଉଭୟ ପାର୍ଶ୍ୱରେ ଅନେକ ଗାଡ଼ି ଅଟକି ରହିଥିବା ବେଳେ ଛୋଟ ଗାଡ଼ିଗୁଡ଼ିକ ଗାଁ ରାସ୍ତା ଦେଇ ଯିବାଆସିବା କରୁଛି। ସ୍ଥାନୀୟ ଲୋକଙ୍କ କହିବା ଅନୁଯାୟୀ, ଏହା ଏକ ଠାକୁରାଣୀ ଶାଳଗଛ। ପାରମ୍ପରିକ ରୀତିନୀତି ଅନୁସାରେ ଏକ ବୋଦା ବଳି ଦେଇ ପୂଜା କରାଯିବ, ପରେ ଯାଇ ଗଛ କଟାଯିବ। ଗଛ ପଡ଼ିବା ପୂର୍ବରୁ ଦେହୁରୀ ଖାଇଦେଇଥିବାରୁ ଗଛ କଟାହୋଇ ନ ଥିଲା। ଏବେ ବୋଦା ଯୋଗାଡ଼ ପାଇଁ ବିଭାଗୀୟ ଅଧିକାରୀ ନାକେଦମ ହୋଇପଡ଼ିଛନ୍ତି। ବୋଦା ଯୋଗାଡ଼ ହେଲେ ପୂଜାର୍ଚ୍ଚନା ହୋଇ ଗଛକୁ କାଟି ରାସ୍ତା ଉପରୁ ସଫା କରାଯିବ। ଖବର ଲେଖାହେବା ପର୍ଯ୍ୟନ୍ତ ରାସ୍ତାରେ ଗଛ ପଡ଼ି ରହିଥିଲା। ଶୀଘ୍ର ରାସ୍ତା ସଫା କରି ଯାତାୟାତ ସ୍ବାଭାବିକ କରିବାକୁ ବିଭିନ୍ନ ମହଲରେ ଦାବି ହେଉଛି।
