ବରଗଡ଼, ୯।୫(ପ୍ରେମାନନ୍ଦ ଖମାରୀ):ବରଗଡ଼ ଜିଲାରେ ଆଉମାତ୍ର ୨ଦିନ ପରେ ରବି ଧାନ ସଂଗ୍ରହ ପ୍ରକ୍ରିୟା ଆରମ୍ଭ ହେବ। ଆସନ୍ତା ୧୧ତାରିଖରୁ ଜିଲାର ବରଗଡ଼, ଅତାବିରା, ପଦ୍ମପୁର ନିୟନ୍ତ୍ରିତ ବଜାର କମିଟି(ଆର୍ଏମ୍ସି) ଅଧୀନ ୧୮୩ ମଣ୍ଡିରେ ଏହି ପ୍ରକ୍ରିୟା ଚାଲିବ। କିନ୍ତୁ ଧାନ କିଣାବିକା ପାଇଁ ଏପର୍ଯ୍ୟନ୍ତ ବିଭାଗୀୟ ତପତ୍ରତା ପରିଲକ୍ଷିତ ହୋଇନାହିଁ। ଜିଲାର ଚାଷୀଙ୍କ ପାଖକୁ ଧାନବିକ୍ରି ଟୋକନ ପହଞ୍ଚି ନାହିଁ। କେବଳ ସେତିକି ନୁହେଁ, ମଣ୍ଡିଗୁଡ଼ିକରେ ଆନୁଷଙ୍ଗିକ ବ୍ୟବସ୍ଥା ମଧ୍ୟ ଏପର୍ଯ୍ୟନ୍ତ ସମ୍ପୂର୍ଣ୍ଣ ହୋଇ ପାରି ନ ଥିବା ଜଣାପଡ଼ିଛି। ଫଳରେ ଅନ୍ୟଥର ଭଳି ଏଥର ବି ଆରମ୍ଭରୁ ଧାନ କିଣାବିକାରେ ଅଚଳାବସ୍ଥା ପରିସ୍ଥିତି ଉପୁଜିବ ବୋଲି ଏବେଠାରୁ ଜଳଜଳ ଦିଶୁଛି। କିନ୍ତୁ ସେଭଳି ସ୍ଥିତି ସୃଷ୍ଟି ହେଲେ ଅନ୍ୟଥରଠାରୁ ଏଥର ଚାଷୀ ଆନ୍ଦୋଳନ ଆହୁରି ତୀବ୍ର ହେବାର ଆଶଙ୍କା ରହିଛି। କାରଣ ବିଭାଗୀୟ ଅବହେଳା ଯୋଗୁ ପଞ୍ଜୀକରଣରୁ ବାଦ୍ ପଡ଼ି ଏବେ ମଧ୍ୟ ଜିଲାର ଅନେକ ଚାଷୀ ଗତବର୍ଷ ଖରିଫ୍ରେ ଅମଳ ଧାନ ବିକ୍ରି କରି ନ ପାରି ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଛନ୍ତି ଏବଂ ଶୁକ୍ରବାର ଏହି ଧାରଣାକୁ ୨ମାସ ପୂରିବ।
ରବିଧାନ ସଂଗ୍ରହ ପ୍ରକ୍ରିୟା ପାଇଁ ଗତମାସ ୨୪ ତାରିଖ ଜିଲାପାଳଙ୍କ କାର୍ଯ୍ୟାଳୟ ପରିସରରେ ରହିଥିବା ସମ୍ମିଳନୀ କକ୍ଷରେ ଜିଲାସ୍ତରୀୟ ଧାନ ସଂଗ୍ରହ କମିଟି ବୈଠକ ବସିଥିଲା। ଉକ୍ତ ବୈଠକରେ ଜିଲାର ୪ ବିଧାୟିକା, ବିଧାୟକଙ୍କ ସମେତ ଏମ୍ପିଙ୍କ ପ୍ରତିନିଧି, ଜିଲାପାଳ, ଅନ୍ୟ ସମସ୍ତ ବିଭାଗୀୟ ଅଧିକାରୀ ପ୍ରମୁଖ ଉପସ୍ଥିତ ଥିଲେ। ବୈଠକରେ ମେ ମାସ ୧୧ତାରିଖରୁ ରବିଧାନ ସଂଗ୍ରହ ପ୍ରକ୍ରିୟା ଆରମ୍ଭ କରିବାକୁ ନିଷ୍ପତ୍ତି ହୋଇଥିଲା। ବୈଠକରେ ଜିଲାପାଳ ଆଦିତ୍ୟ ଗୋୟଲ ଧାନ ସଂଗ୍ରହ ପ୍ରକ୍ରିୟାରେ ଚାଷୀଙ୍କ ସୁବିଧାକୁ ଗୁରୁତ୍ୱ ଦେଇ ସମସ୍ତ ମଣ୍ଡିରେ ଡିଜିଟାଲ ଆର୍ଦ୍ରତା ମିଟର, ତାରପୋଲିନ, ୱେବ୍ରିଜ, ଧାନର ଗୁଣମାନ ପରୀକ୍ଷା ପାଇଁ ଉଦ୍ଦିଷ୍ଟ ବିଶ୍ଲେଷଣ କିଟ୍ ଯୋଗାଇବା ସହିତ ପ୍ରତୀକ୍ଷା କକ୍ଷ, ଛାଇ, ପାନୀୟଜଳ, ଆଲୋକ ବ୍ୟବସ୍ଥା, ପାଇଖାନା, ସିସିଟିଭି ଏବଂ ଧାନ ଦର ଉଲ୍ଲେଖିତ ବୋର୍ଡ ପ୍ରଦର୍ଶନ କରିବା ପାଇଁ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ। ସେହିପରି ଧାନ କିଣାବିକା ସମୟରେ ଚାଷୀମାନେ ଯେଭଳି କୌଣସି ପ୍ରକାର ସମସ୍ୟାର ସମ୍ମୁଖୀନ ନ ହୁଅନ୍ତି, ସେଥିପ୍ରତି ଦୃଷ୍ଟିଦେବାକୁ ଜନ ପ୍ରତିନିଧିମାନେ ବିଭାଗୀୟ ଅଧିକାରୀଙ୍କୁ ତାଗିଦ୍ କରିଥିଲେ।
ମାତ୍ର ଜିଲାପାଳଙ୍କ ନିର୍ଦ୍ଦେଶ ଏବଂ ଜନ ପ୍ରତିନିଧିଙ୍କ ତାଗିଦ୍ ସତ୍ତ୍ୱେ ଧାନ କିଣାବିକା ପ୍ରସ୍ତୁତି ଏପର୍ଯ୍ୟନ୍ତ ଆଶାନୁରୂପ ହୋଇପାରି ନାହିଁ। ବିଗତବର୍ଷଗୁଡ଼ିକ ଭଳି ଏଥର ମଧ୍ୟ ଟୋକନ ମାଧ୍ୟମରେ ପଞ୍ଜୀକୃତ ଚାଷୀଙ୍କଠାରୁ ଧାନ କିଣାଯିବାକୁ ନିଷ୍ପତ୍ତି ନିଆଯାଇଛି। କିନ୍ତୁ ଆଉ ୨ ଦିନ ପରେ ମଣ୍ଡି ଖୋଲୁଥିଲେ ହେଁ ଏପର୍ଯ୍ୟନ୍ତ ଚାଷୀଙ୍କୁ ଧାନବିକ୍ରି ଟୋକନ ମିଳିପାରି ନାହିଁ। ଫଳରେ ମଣ୍ଡିକୁ ଧାନ ନେବା ପାଇଁ ଚାଷୀମାନେ ପ୍ରସ୍ତୁତ ହୋଇପାରୁ ନାହାନ୍ତି। ଅନ୍ୟପଟେ ଜିଲାର ବିଭିନ୍ନ ଅଞ୍ଚଳରେ ଚାଷୀଙ୍କ ଅମଳ ଧାନ ଖୋଲା ଆକାଶତଳେ ପଡ଼ି ରହିଥିବାବେଳେ ଥରକୁ ଥର ଝଡ଼ବର୍ଷା ଲାଗି ରହିଛି। ଏଭଳି ସ୍ଥିତିରେ ଚାଷୀଙ୍କୁ ଟୋକନ ବିଳମ୍ବରେ ପ୍ରଦାନ କଲେ ସେମାନଙ୍କ ଅମଳ ଧାନ ବିକ୍ରି ବିଳମ୍ବିତ ହେବା ସହିତ ଝଡ଼ବର୍ଷାରେ ନଷ୍ଟ ହେବାର ଯଥେଷ୍ଟ ସମ୍ଭାବନା ରହିଛି। ଏହାକୁ ନେଇ ଏବେଠାରୁ ଚାଷୀଙ୍କୁ ଝଡ଼ବର୍ଷା ଚିନ୍ତା ଘାରିଥିବା ବେଳେ ଅସନ୍ତୋଷ ମଧ୍ୟ ତୀବ୍ର ହେବାରେ ଲାଗିଛି। ଏ ନେଇ ସଂଯୁକ୍ତ କୃଷକ ସଂଗଠନର ଉପଦେଷ୍ଟା ରମେଶ ମହାପାତ୍ର କହିଛନ୍ତି, ଅନ୍ୟବର୍ଷ ମଣ୍ଡି ଖୋଲିବାର ପ୍ରାୟ ସପ୍ତାହକ ପୂର୍ବରୁ କିଛିଚାଷୀଙ୍କୁ ଧାନବିକ୍ରି ଟୋକନ ମିଳି ଯାଉଥିଲା। ହେଲେ ମଣ୍ଡି ଖୋଲିବାକୁ ଆଉ ୩ଦିନ ବାକିଥିବା ବେଳେ ଚାଷୀଙ୍କୁ ଏପର୍ଯ୍ୟନ୍ତ ଟୋକନ ମିଳିପାରି ନାହିଁ। ଫଳରେ ମଣ୍ଡି ଖୋଲିଲେ ମଧ୍ୟ ଆରମ୍ଭରୁ ଚାଷୀମାନେ ଧାନବିକ୍ରିରୁ ବଞ୍ଚିତ ହେବେ ଏବଂ ଅନ୍ୟବର୍ଷ ଭଳି ଏଥର ମଧ୍ୟ ଅଭାବୀ ବିକ୍ରିର ସମ୍ମୁଖୀନ ହେବେ ବୋଲି ମହାପାତ୍ର କହିଛନ୍ତି। ଅପରପକ୍ଷେ ଗତବର୍ଷଠାରୁ ଏଥର ଅଧିକ ଚାଷୀ ଧାନବିକ୍ରି ପାଇଁ ପଞ୍ଜୀକୃତ ହୋଇଛନ୍ତି। ଗତବର୍ଷ ଜିଲାର ୯୧ହଜାର ୬ଜଣ ପଞ୍ଜୀକୃତ ହୋଇଥିଲେ। ସେଥିମଧ୍ୟରୁ ୮୯ହଜାର ୮୭୮ ଚାଷୀଙ୍କଠାରୁ ୬୧ଲକ୍ଷ ୭୩ହଜାର ୧୧୩କୁଇଣ୍ଟାଲ ଧାନ କିଣାଯାଇଥିଲା। ତେବେ ଏଥର ୧ଲକ୍ଷ ୫ହଜାର ୪୯୪ ଚାଷୀ ପଞ୍ଜୀକୃତ ହୋଇଛନ୍ତି। ପଞ୍ଜୀକୃତ ଚାଷୀଙ୍କ ସଂଖ୍ୟା ବୃଦ୍ଧି ପାଇଥିବା ଦୃଷ୍ଟିରୁ ଚାଷୀମାନେ ଗତବର୍ଷ ତୁଳନାରେ ଅଧିକ ଧାନ ବିକ୍ରି ପାଇଁ ମଣ୍ଡିକୁ ଆଣିବେ ବୋଲି ଅନୁମାନ କରାଯାଉଛି। କିନ୍ତୁ ଧାନ ସଂଗ୍ରହ ପ୍ରକ୍ରିୟାର ଅବ୍ୟବହିତ ପୂର୍ବରୁ ଅବ୍ୟବସ୍ଥା ବାରି ହୋଇ ପଡୁଥିବା ଯୋଗୁ ଏଥର ଅନ୍ୟବର୍ଷ ତୁଳନାରେ ଧାନ ବିକ୍ରିବଟା ଆହୁରି ଅଧିକ ଜଟିଳ ହେବାର ଆଶଙ୍କା ଦେଖାଯାଉଛି। ଫଳରେ ଆରମ୍ଭରୁ ଧାନକିଣା ଏବଂ ଧାନ ଉଠାଣ ପ୍ରକ୍ରିୟାକୁ ତ୍ୱରାନ୍ବିତ କରା ନ ଗଲେ ଗୋଟିଏ ପଟେ ଝଡ଼ବର୍ଷାରେ ଚାଷୀଙ୍କ ଧାନ ନଷ୍ଟ ହେବ ଏବଂ ଅନ୍ୟପଟେ ଜିଲାରେ ଅବ୍ୟବସ୍ଥିତ ଧାନ କିଣାବିକା ବ୍ୟବସ୍ଥାକୁ ନେଇ ଆଇନ ଶୃଙ୍ଖଳା ପରିସ୍ଥିତି ଉପୁଜିବାର ଯଥେଷ୍ଟ ସମ୍ଭାବନା ରହିଛି। ଫଳରେ ବେଳ ଥାଉ ଥାଉ ଜିଲା ପ୍ରଶାସନ ତ୍ୱରିତ୍ ପଦକ୍ଷେପ ନେବା ଜରୁରୀ ବୋଲି ବିଭିନ୍ନ ମହଲରେ ମତପ୍ରକାଶ ପାଇଛି।
Dharitri – Odisha’s No.1 Odia Daily
