ଜାକର୍ତ୍ତା,୨୩।୧୨: ଟି-୨୦ କ୍ରିକେଟରେ ପାଞ୍ଚ ଉଇକେଟ ହାସଲ କରିବା ପ୍ରତ୍ୟେକ ବୋଲରଙ୍କ ସ୍ବପ୍ନ, କାରଣ ଚାରି ଓଭର ସ୍ପେଲରେ ଏହି ସଫଳତା ହାସଲ କରିବା ଅତ୍ୟନ୍ତ କଷ୍ଟକର ବୋଲି ବିବେଚନା କରାଯାଏ। ୨୮ ବର୍ଷୀୟ ଇଣ୍ଡୋନେସିଆର ଡାହାଣହାତୀ ଦ୍ରୁତ ବୋଲର ଗେଡେ ପ୍ରିୟନ୍ଦନା ଏକ ଏପରି ସଫଳତା ହାସଲ କରିଛନ୍ତି ଯାହା ଚମତ୍କାରଠାରୁ କମ ନୁହେଁ। ଏହି ଖେଳାଳି ଗୋଟିଏ ଓଭରରେ ପାଞ୍ଚ ଉଇକେଟ ନେଇ କ୍ରିକେଟ ଜଗତରେ ହଇଚଇ ସୃଷ୍ଟି କରିଛନ୍ତି, ଏଥିରେ ଏକ ହ୍ୟାଟ୍ରିକ ମଧ୍ୟ ଅନ୍ତର୍ଭୁକ୍ତ।
ଇଣ୍ଡୋନେସିଆ ବର୍ତ୍ତମାନ କାମ୍ବୋଡିଆ ବିପକ୍ଷରେ ଆଠ ମ୍ୟାଚ ବିଶିଷ୍ଟ ଟି-୨୦ ସିରିଜ ଖେଳୁଛି। ଏହି ସିରିଜର ପ୍ରଥମ ମ୍ୟାଚ ଡିସେମ୍ବର ୨୩ ତାରିଖରେ ବାଲିରେ ଖେଳାଯାଇଥିଲା, ଯାହା ଟି-୨୦ କ୍ରିକେଟ ଇତିହାସରେ ବିରଳ ଘଟଣା। କାମ୍ବୋଡିଆ ଟସ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା ଏବଂ ଇଣ୍ଡୋନେସିଆ ୨୦ ଓଭରରେ ପାଞ୍ଚ ଉଇକେଟ ହରାଇ ୧୬୭ ରନ କରିପାରିଥିଲା। ଧର୍ମା କେସମା ୧୧୦ ରନର ଇନିଂସ ଖେଳିଥିଲେ, ଏଥିରେ ୮ ଚୌକା ଏବଂ ୬ ଛକା ସାମିଲ ଥିଲା।
ଜବାବରେ, କାମ୍ବୋଡିଆ ୧୬ ଓଭରରେ ୧୦୭ ରନରେ ଅଲଆଉଟ ହୋଇଥିଲା। ମୁଖ୍ୟତଃ ଗେଡେ ପ୍ରିୟନ୍ଦନାଙ୍କ ଧମାକାଦାର ବୋଲିଂ କରିଥିଲେ। ସେ ଗୋଟିଏ ଓଭରରେ ପାଞ୍ଚଟି ଉଇକେଟ ନେଇ ଏହି ସଫଳତା ହାସଲ କରିଥିଲେ, ଟି୨୦ କ୍ରିକେଟ ଇତିହାସରେ ଏପରି ସଫଳତା ହାସଲ କରିଥିବା ପ୍ରଥମ ବୋଲର ହୋଇଥିଲେ। ୧୬୮ ରନର ପିଛା କରି କାମ୍ବୋଡିଆ ୧୫ ଓଭର ପରେ ୫ ଉଇକେଟ ହରାଇ ୧୦୬ ରନ କରିଥିଲା ଏବଂ ମ୍ୟାଚ ଏକ ଗୁରୁତ୍ୱପୂର୍ଣ୍ଣ ମୋଡ଼ରେ ପହଞ୍ଚିଥିଲା। ତା’ପରେ ପ୍ରିୟନ୍ଦନାଙ୍କୁ ବଲ ଦିଆଯାଇଥିଲା। ସେ ତାଙ୍କର ପ୍ରଥମ ଓଭରରେ ଚମତ୍କାର ପ୍ରଦର୍ଶନ କରିଥିଲେ, ପ୍ରଥମ ତିନୋଟି ବଲରେ ଲଗାତାର ଉଇକେଟ ନେଇ ହ୍ୟାଟ୍ରିକ ପୂରଣ କରିଥିଲେ। ତା’ପରେ, ଏକ ଡଟ ବଲ ପରେ, ସେ ଆଉ ଦୁଇ ଜଣ ବ୍ୟାଟସମ୍ୟାନଙ୍କୁ ଆଉଟ କରି ଓଭର ପୂରଣ କରିଥିଲେ। ଓଭରରେ କେବଳ ଗୋଟିଏ ୱାଇଡ ଥିଲା, ଏବଂ କାମ୍ବୋଡିଆର ଇନିଂସ ୧୦୭ ରନରେ ହ୍ରାସ ପାଇଥିଲା, ଯାହା ଫଳରେ ଇଣ୍ଡୋନେସିଆ ୬୦ ରନରେ ମ୍ୟାଚ ଜିତିପାରିଥିଲା।
ଯଦିଓ ଟି୨୦ କ୍ରିକେଟରେ (ଘରୋଇ ସ୍ତର) ଗୋଟିଏ ଓଭରରେ ୫ଟି ଉଇକେଟ ନେବାର ସଫଳତା ପୂର୍ବରୁ ଦୁଇଥର ହାସଲ କରାଯାଇଛି। ବାଂଲାଦେଶର ଅଲ-ଅମିନ ହୋସେନ ୨୦୧୩-୧୪ ଭିକ୍ଟ୍ରି ଡେ’ ଟି-୨୦ କପରେ ଏବଂ ଭାରତର ଅଭିମନ୍ୟୁ ମିଥୁନ ୨୦୧୯-୨୦ ସୟଦ ମୁସ୍ତାକ ଅଲୀ ଟ୍ରଫିରେ ଏହି ସଫଳତା ହାସଲ କରିଥିଲେ। ଏହା ଅନ୍ତର୍ଜାତୀୟ ଟି-୨୦ରେ ପ୍ରଥମ ଥର।
Dharitri – Odisha’s No.1 Odia Daily
