ଆବଶ୍ୟକ ସାମଗ୍ରୀ: ୫୦୦ ଗ୍ରାମ୍ ଚିକେନ୍, ୨ କପ୍ ବାସ୍ମତି ଚାଉଳ, ଏକ ଚାମଚ ଗୋଲମରିଚ ଗୁଣ୍ଡ, ୧/୨ ଚାମଚ ହଳଦୀଗୁଣ୍ଡ, ଏକ ଚାମଚ ଲଙ୍କାଗୁଣ୍ଡ, ଏକ ଚାମଚ ଧନିଆ ପାଉଡର, ୧/୨ ଚାମଚ ଜିରା, ଏକ ଚାମଚ ବିରିୟାନି ମସଲା, ୨ଇଞ୍ଚର ଅଦା, ୮-୧୦ କୋଲା ରସୁଣ, କଟା ପିଆଜ ଅଧା କପ୍, ଧନିଆପତ୍ର, ପୁଦିନାପତ୍ର, ଦହି, ୪ ଚାମଚ ତେଲ, ଗୋଟା ମସଲା, କେସର, ଲୁଣ ସ୍ବାଦାନୁସାରେ।
ପ୍ରସ୍ତୁତି ପ୍ରଣାଳୀ: ପିଆଜକୁ ଲାଲ୍ ହେବା ପର୍ଯ୍ୟନ୍ତ ଭାଜି ରଖନ୍ତୁ। ଅଦା ରସୁଣକୁ ପେଷ୍ଟକରି ଦିଅନ୍ତୁ। ସବୁ ମସଲାକୁ ଦୁଇଭାଗ କରି ଦିଅନ୍ତୁ। ପ୍ରଥମେ ଗୋଟିଏ ପାତ୍ରରେ ଚିକେନ୍ ନେଇ ସେଥିରେ ଗୋଟା ମସଲା, ଲୁଣ, ହଳଦୀଗୁଣ୍ଡ, ଲଙ୍କାଗୁଣ୍ଡ, ଅଦା ରସୁଣ ପେଷ୍ଟ, ଧନିଆ ପାଉଡର, ବିରିୟାନି ମସଲା, ଭଜା ପିଆଜ, ଦହି, ପୋଦିନା ଏବଂ ଧନିଆପତ୍ର, ତେଲ ପକାଇ ଭଲ ଭାବେ ଗୋଳାଇ ଏକରୁ ଦୁଇଘଣ୍ଟା ପର୍ଯ୍ୟନ୍ତ ମାରିନେଟ୍ କରନ୍ତୁ। ଅନ୍ୟ ପାତ୍ରରେ ଚାଉଳ ନିଅନ୍ତୁ। ସେଥିରେ ବାକି ଅଧା ରଖାଯାଇଥିବା ସମସ୍ତ ମସଲା ଏବଂ ଅନ୍ୟ ସାମଗ୍ରୀ ମିଶାଇ ଏକରୁ ଦୁଇଘଣ୍ଟା ଛାଡ଼ିଦିଅନ୍ତୁ।
ବର୍ତ୍ତମାନ ଏକ ବାଉଁଶ ନେଇ ତା’ର ଭିତର ଭାଗକୁ ଭଲ ଭାବେ ଧୋଇ ଦିଅନ୍ତୁ। ସେଥିରେ ଅଳ୍ପ ତେଲ ଲଗାଇ ଦିଅନ୍ତୁ। ପ୍ରଥମେ ଦୁଇ ଚାମଚ ଚିକେନ୍ ଏବଂ ପରେ ୪-୫ ଚାମଚ ଚାଉଳ ମିଶ୍ରଣକୁ ରଖନ୍ତୁ। ଏହିପରି ସବୁ ଚାଉଳ ଏବଂ ଚିକେନ୍କୁ ବାଉଁଶ ଭିତରେ ରଖି କେସର ମିଶା ଅଳ୍ପ ପାଣି ଦିଅନ୍ତୁ , ଯେପରି ତାହା ବାଉଁଶର ଆରମ୍ଭରୁ ଶେଷ ପର୍ଯ୍ୟନ୍ତ ଯିବ। ପରେ ବାଉଁଶକୁ ଏକ ଆଲୁମିନିୟମ ଫଏଲ୍ ପେପରରେ ଗୁଡ଼େଇ ଦିଅନ୍ତୁ। ଏହାକୁ ନିଅଁାରେ ରଖନ୍ତୁ ଏବଂ ଭଲ ଭାବେ ସିଝିବା ଲାଗି ମଝିରେ ମଝିରେ ଓଲଟାଇ ଦିଅନ୍ତୁ। ୩୦-୩୫ ମିନିଟ୍ ପର୍ଯ୍ୟନ୍ତ ଏପରି ରଖିବା ପରେ ଏହାକୁ ଆଞ୍ଚରୁ କାଢ଼ି ୫-୧୦ ମିନିଟ୍ ଛାଡ଼ିଦିଅନ୍ତୁ। ବର୍ତ୍ତମାନ ପ୍ରସ୍ତୁତ ହୋଇଗଲା ବାମ୍ବୁ ବିରିୟାନି। ଏହାକୁ ଗରମ ଗରମ ଖାଇବାର ମଜା ନିଅନ୍ତୁ।
