ଓ୍ବାଶିଂଟନ୍,୨୮।୧: ରାଷ୍ଟ୍ରପତି ନିର୍ବାଚନରେ ବିଜୟୀ ହେବା ପରଠାରୁ ଡୋନାଲ୍ଡ ଟ୍ରମ୍ପଙ୍କ ବୟାନ ସମଗ୍ର ବିଶ୍ୱରେ ହଇଚଇ ସୃଷ୍ଟି କରିଛି। ରାଷ୍ଟ୍ରପତି ଭାବେ ଶପଥ ନେବା ପରେ ମଧ୍ୟ ତାଙ୍କର ଏପରି ବୟାନ ଜାରି ରହିଛି। ଡୋନାଲ୍ଡ ଟ୍ରମ୍ପ ପୁଣି ଥରେ ଧମକ ଦେଇଛନ୍ତି ଯେ ସେ ସେହି ଦେଶଗୁଡ଼ିକ ଉପରେ ଶୁଳ୍କ ଲାଗୁ କରିବେ ଯେଉଁମାନେ ଆମେରିକାକୁ ‘କ୍ଷତି ପହଞ୍ଚାଉଛନ୍ତି’। ସେ ଉଚ୍ଚ ଶୁଳ୍କ ଥିବା ଦେଶମାନଙ୍କ ମଧ୍ୟରେ ଚାଇନା, ଭାରତ ଏବଂ ବ୍ରାଜିଲକୁ ଅନ୍ତର୍ଭୁକ୍ତ କରିଛନ୍ତି।
ଆମେ ବିଦେଶୀ ଦେଶ ଏବଂ ପ୍ରକୃତରେ ଆମକୁ କ୍ଷତି ପହଞ୍ଚାଇବାକୁ ଚାହୁଁଥିବା ବିଦେଶୀ ଲୋକଙ୍କ ଉପରେ ଶୁଳ୍କ ଲଗାଇବାକୁ ଯାଉଛୁ ବୋଲି ଟ୍ରମ୍ପ ସୋମବାର ଫ୍ଲୋରିଡାରେ କହିଛନ୍ତି। ଟ୍ରମ୍ପ ଆହୁରି କହିଛନ୍ତି, ଚାଇନା ବହୁତ ଅଧିକ ଶୁଳ୍କ ଆଦାୟ କରେ ଏବଂ ଭାରତ, ବ୍ରାଜିଲ ଏବଂ ଅନ୍ୟାନ୍ୟ ଅନେକ ଦେଶ ପାଇଁ ମଧ୍ୟ ସମାନ କଥା। ତେଣୁ ଆମେ ଆଉ ଏପରି ହେବାକୁ ଦେବୁ ନାହିଁ ଏବଂ ଆମେ ଆମେରିକାକୁ ଆଗରେ ରଖିବୁ। ସେ କହିଛନ୍ତି, ଆମେରିକା ଏକ “ଅତ୍ୟନ୍ତ ନ୍ୟାୟପୂର୍ଣ୍ଣ ବ୍ୟବସ୍ଥା ପ୍ରତିଷ୍ଠା କରିବ ଯେଉଁଠାରେ ଆମ ରାଜକୋଷକୁ ଟଙ୍କା ଆସିବ ଏବଂ ଆମେରିକା ପୁଣି ଥରେ ବହୁତ ସମୃଦ୍ଧ ହେବ। ଆଉ ଏସବୁ ବହୁତ ଶୀଘ୍ର ଘଟିବ।
