ନବରଙ୍ଗପୁର,୨୨।୧୨(ସଦାଶିବ ପ୍ରହରାଜ): ନବରଙ୍ଗପୁର ସହର ଗ୍ଲେଜ ହୋଟେଲ ସମ୍ମୁଖ ରାସ୍ତାରେ ଦୁର୍ଘଟଣା ଘଟି ୨ ବାଇକ୍ ଚାଳକଙ୍କ ମୃତ୍ୟୁ ହୋଇଛି। ସେମାନେ ହେଲେ ବଡ଼ଡାଇଭଟ୍ଟା ଅଞ୍ଚଳର ଅମିତ ବାଘ ଓ ନବରଙ୍ଗପୁର ସହର ଗାନ୍ଧୀନଗର ସାହିର ତ୍ରିଲୋଚନ ଯାନୀ।
ସୂଚନାନୁଯାୟୀ, ତ୍ରିଲୋଚନ ସହର ଉପକଣ୍ଠ କୋରାପୁଟ ଜିଲାର ଆଉଁଳିସ୍ଥିତ ଏକ ଢ଼ାବାରେ କାମ କରନ୍ତି। ତ୍ରିଲୋଚନ ନିଜ ସ୍କୁଟି (ଓଡି-୨୪ବି ୬୩୮୩)ରେ ଘରକୁ ଫେରୁଥିଲେ। ଏହି ସମୟରେ ବିପରୀତ ଦିଗରୁ ଅମିତ ବାଇକ୍ (ଓଡି-୨୪ଏ-୯୨୮୨)ରେ ବଡ଼ଡାଇଭଟ୍ଟାକୁ ଯାଉଥିଲେ। ଉଭୟଙ୍କ ଗାଡ଼ି ଗ୍ଲେଜ ହୋଟେଲ ଆଗରେ ମୁହାଁମୁହିଁ ହୋଇଥିଲା। ଦୁର୍ଘଟଣା ଏତେ ଭୟଙ୍କର ଥିଲା ଯେ ଘଟଣାସ୍ଥଳରେ ହିଁ ଉଭୟଙ୍କ ମୃତ୍ୟୁ ହୋଇଯାଇଥିଲା। ଖବରପାଇ ପୋଲିସ ସେଠାରେ ପହଞ୍ଚି ଉଭୟଙ୍କ ମୃତଦେହ ଜବତ କରିବା ସହ ବ୍ୟବଚ୍ଛେଦ କରାଇ ପରିବାର ଲୋକାଙ୍କୁ ହସ୍ତାନ୍ତର କରିଛି। ଏନେଇ ନବରଙ୍ଗପୁର ଥାନାରେ ୫୨୫/୨୪ ରେ ଏକ ମାମଲା ରୁଜୁ ହୋଇଛି।
