ବାଲେଶ୍ୱର ଅଫିସ,୨୩।୬ ( ମାନସ ବିଶ୍ୱାଳ)- ବାଲେଶ୍ବର ସହରରେ ଲାଗିଥିବା କର୍ଫ୍ୟୁ କୋହଳ ହୋଇଛି । ସହଦେବଖୁଣ୍ଟା ଥାନା ଅନ୍ତର୍ଗତ ଅଞ୍ଚଳରେ ସକାଳ ୫ରୁ ରାତି ୯ଟା ଯାଏ କର୍ଫୁ କୋହଳ ହୋଇଥିବା ବେଳେ ଟାଉନ ଥାନା ଅନ୍ତର୍ଗତ ଅଞ୍ଚଳରେ ସକାଳ ୫ରୁ ଦିନ ୨ଟା ପର୍ଯ୍ୟନ୍ତ କର୍ଫୁ କୋହଳ କରାଯାଇଛି। ଯଦିଓ ଲିଜ ଲାଇନ ଓ ବ୍ରଡବ୍ୟାଣ୍ଡ ଦ୍ୱାରା ଗତ ଶନିବାର ସଂନ୍ଧ୍ୟାରୁ ଇଣ୍ଟରନେଟ୍ ସେବା ମିଳିଛି, ହେଲେ ମୋବାଇଲରେ ଇଣ୍ଟରନେଟ୍ ଉପଲବ୍ଧ ହୋଇନାହିଁ। ଫଳରେ ଛାତ୍ରୀଛାତ୍ର ମାନେ ଅସୁବିଧାର ସମ୍ମୁଖୀନ ହେଉଛନ୍ତି। ଇଣ୍ଟରନେଟ ପାଇଁ ସଂଘର୍ଷ କରି ଘଣ୍ଟା ଘଣ୍ଟା ସମୟ ସହର ବାହାରେ କଟାଉଛନ୍ତି ।
କର୍ଫ୍ୟୁ ଭିତରେ ଇଣ୍ଟରନେଟ ପାଇଁ ବାଲେଶ୍ୱରରେ ସଂଘର୍ଷ ଦେଖିବାକୁ ମିଳୁଛି । ସହର ଛାଡି ଇଣ୍ଟରନେଟ ଆସୁଥିବା ଅଞ୍ଚଳରେ ପ୍ରବଳ ଭିଡ଼ ଦେଖିବାକୁ ମିଳୁଛି । ରବିବାର ବାଲେଶ୍ୱରରେ ଦିନ ବେଳା କର୍ଫ୍ୟୁ କୋହଳ କରାଯାଇଛି । ମୋବାଇଲ ବ୍ୟତୀତ ଅନ୍ୟ ସବୁ ଇଣ୍ଟରନେଟ ସେବା ଜାରି ରହିଛି । କିନ୍ତୁ ଅଧିକାଂଶ ଲୋକେ ମୋବାଇଲରେ ଇଣ୍ଟରନେଟ ଚଳାଉଥିବାରୁ ଅସୁବିଧାର ସମ୍ମୁଖୀନ ହେଉଛନ୍ତି। ଅପରପକ୍ଷେ ଗଣ୍ଡଗୋଳ ମାମଲାରେ ମୋଟ ୭୫ ଜଣଙ୍କୁ ଗିରଫ କରାଯାଇଥିବାର ପୋଲିସ ପ୍ରଶାସନ ପକ୍ଷରୁ ସୂଚନା ମିଳିଛି ।
