ଲାଠୋର,୮।୫(ଭୁବନେଶ୍ୱର ବାରିକ): କେନ୍ଦୁଝର ଜିଲାର ଜିତୁ ମୁଣ୍ଡା ଘଟଣା ସାରା ଦେଶରେ ହଇଚଇ ସୃଷ୍ଟି କରିଥିଲା । ବ୍ୟାଙ୍କରୁ ଟଙ୍କା ଉଠାଣ ପାଇଁ ନିଜ ମୃତା ଭଉଣୀଙ୍କ କଙ୍କାଳ ଧରି ବ୍ୟାଙ୍କକୁ ଯାଇଥିଲେ । ଘଟଣା ଲୋକଲୋଚନକୁ ଆସିବା ପରେ ଜିତୁ ମୁଣ୍ଡା ଟଙ୍କା ପାଇଥିଲେ । କିନ୍ତୁ ଏବେ ମଧ୍ୟ ଜିତୁ ମୁଣ୍ଡା ଭଳି ଅନେକ ଲୋକ ଟଙ୍କା ଉଠାଣ କରିବା ପାଇଁ ନାନା ହଇରାଣ ହରକତ ହେଉଛନ୍ତି । ଏହିପରି ଏକ ଉଦାହରଣ ବଲାଙ୍ଗୀର ଜିଲାରେ ଏବେ ଦେଖାଯାଇଛି ।
ଜିଲାର ଦାଦନ ପ୍ରବଣ ଖପ୍ରାଖୋଲ ବ୍ଲକ ବେନ୍ଦେର ପଞ୍ଚାୟତ ସଦର ବେନ୍ଦେର ଗ୍ରାମରୁ ଏପରି ସାଂଘାତିକ ଅଭିଯୋଗ ଆସିଛି । ଗ୍ରାମରେ ବସବାସ କରୁଥିବା ଶ୍ୟାମ ଭଇଁସାଲଙ୍କ ସ୍ତ୍ରୀ ଡାଳିମ୍ବ ଭଇଁସାଲ ଗତ ୯ ମାସ ପୂର୍ବେ ମୃତ୍ୟୁ ବରଣ କଲେ । ସେହିପରି ୨ ବର୍ଷ ପୂର୍ବେ ଗୋବର୍ଦ୍ଧନ ଶାଣ୍ଢଙ୍କ ମା ସମାରି ଶାଣ୍ଢଙ୍କ ମଧ୍ୟ ମୃତ୍ୟୁ ଘଟିଥିଲା । ଉଭୟ ମୃତାଙ୍କ ନାମରେ ଲାଠୋର ସେଣ୍ଟ୍ରାଲ ବ୍ୟାଙ୍କରେ ରହିଥିବା ଆକାଉଣ୍ଟରେ ଟଙ୍କା ଜମା ରହିଥିଲା । ଉକ୍ତ ଟଙ୍କା ଉଠାଣ ପାଇଁ ଶ୍ୟାମ ଏବଂ ଗୋବର୍ଦ୍ଧନ ବ୍ୟାଙ୍କରେ ଆବଶ୍ୟକ କାଗଜ ପତ୍ର ଦାଖଲ କରି ବାରମ୍ବାର ଦୌଡି ଥିଲେ ମଧ୍ୟ ତାଙ୍କୁ ବିଭିନ୍ନ ଆଳ ଦେଖାଇ ଟଙ୍କା ଦିଆଯାଉ ନଥିଲା । ଗଣ ମାଧ୍ୟମକୁ ଖବର ଆସିବାରୁ ବ୍ୟାଙ୍କ ଏହି ନିକଟରେ ମୃତା ଡାଳିମ୍ବଙ୍କ ୨୧ ହଜାର ଟଙ୍କା ତାଙ୍କ ସ୍ଵାମୀ ଶ୍ୟାମଙ୍କ ଆକାଉଣ୍ଟକୁ ଟ୍ରାନ୍ସଫର କରିଥିବା ବେଳେ ବର୍ତ୍ତମାନ ପର୍ଯ୍ୟନ୍ତ ସମାରିଙ୍କ ଆକାଉଣ୍ଟରେ ଥିବା ୧ ଲକ୍ଷରୁ ଉର୍ଦ୍ଧ୍ୱ ଟଙ୍କା ପ୍ରଦାନ କରାଯାଉ ନାହିଁ ।
ପୁଅ ଗୋବର୍ଦ୍ଧନ ବ୍ୟାଙ୍କକୁ ଦୌଡି ନୟାନ୍ତ ହେଲା ପରେ ଏବେ ପ୍ରାୟ ୩ ମାସ ହେବ ସେ ବ୍ୟାଙ୍କକୁ ଆଉ ଯାଉ ନଥିବା ପ୍ରକାଶ କରିଛନ୍ତି । ଏନେଇ ଲାଠୋର ସେଣ୍ଟ୍ରାଲ ବ୍ୟାଙ୍କ ଶାଖା ପରିଚାଳକ ଦେବଦତ୍ତ ମିଶ୍ରଙ୍କୁ ପଚାରିବାରେ ମୁଁ ନୂଆ ହୋଇ ଯୋଗ ଦେଇଛି । ଘଟଣା ବିଷୟରେ ଜାଣି ନାହିଁ । ନୋମିନି ଆକାଉଣ୍ଟ ନଂ ଧରି ଶାଖାକୁ ଆସିଲେ ଆମେ ଟଙ୍କା ପ୍ରଦାନ ଦିଗରେ ପଦକ୍ଷେପ ଗ୍ରହଣ କରିବୁ ବୋଲି କହିଥିଲେ ।
