ଭୋପାଳ,୨୩।୨: ପତ୍ନୀଙ୍କ ରକ୍ଷଣାବେକ୍ଷଣ ପାଇଁ ଟଙ୍କା ଦେବାର ଅନେକ ମାମଲା ଆପଣ ନିଶ୍ଚୟ ଶୁଣିଥିବେ, କିନ୍ତୁ ଇନ୍ଦୋରର ଫ୍ୟାମିଲି କୋର୍ଟ ଏକ ଅଜବ ନିଷ୍ପତ୍ତି ଶୁଣାଇଛନ୍ତି। କୋର୍ଟ ଜଣେ ମହିଳାଙ୍କୁ ତାଙ୍କ ଠାରୁ ଅଲଗା ରହୁଥିବା ସ୍ବାମୀଙ୍କୁ ରକ୍ଷଣାବେକ୍ଷଣ ପାଇଁ ପ୍ରତିମାସରେ ୫ ହଜାର ଟଙ୍କା ଦେବାକୁ ନିର୍ଦ୍ଦେଶ ଦେଇଛନ୍ତି। ମହିଳାଙ୍କ ସ୍ବାମୀ ଅମନ ତାଙ୍କ ପତ୍ନୀଙ୍କ ବିରୋଧରେ ୩ ମାସ ପୂର୍ବରୁ ଅର୍ଥାତ୍ ଡିସେମ୍ବର ୨୦୨୩ରେ ମାମଲା ଦାୟର କରିଥିଲେ। ଫେବୃଆରୀ ୨୦୨୪ରେ କୋର୍ଟ ତାଙ୍କ ସପକ୍ଷରେ ରାୟ ଶୁଣାଇଛନ୍ତି।
ଓକିଲ ମନୀଷ ଇରୌଲା ସୂଚନା ଦେଇ କହିଛନ୍ତି ଯେ, ପୀଡିତ ଅମନ (23 ବର୍ଷ) ଉଜୈନର ବାସିନ୍ଦା। ୨୦୨୦ ଅମନ ଜଣେ ବନ୍ଧୁଙ୍କ ମାଧ୍ୟମରେ ୨୨ ବର୍ଷ ବୟସ୍କା ନନ୍ଦିନୀଙ୍କ ସହ ବନ୍ଧୁତା ହୋଇଥିଲେ। ବାର୍ତ୍ତାଳାପ ଆଗକୁ ବଢିବା ପରେ ନନ୍ଦିନୀ ଅମନଙ୍କୁ ପ୍ରସ୍ତାବ ଦେଇଥିଲେ। ଅମନ ବିବାହ କରିବାକୁ ଚାହୁଁନଥିଲେ କିନ୍ତୁ ନନ୍ଦିନୀ ତାଙ୍କୁ ଧମକ ଦେଇ କହିଥିଲେ ଯେ ବିବାହ ନ କଲେ ସେ ଆତ୍ମହତ୍ୟା କରିବେ। ଶେଷରେ ଜୁଲାଇ ୨୦୨୧ରେ ଦୁହେଁ ଆର୍ଯ୍ୟ ସମାଜ ମନ୍ଦିରରେ ବିବାହ କରିଥିଲେ ଏବଂ ଇନ୍ଦୋରରେ ଏକ ଭଡ଼ା ଘରେ ରହୁଥିଲେ।
ଏହା ମଧ୍ୟ କୁହାଯାଉଛି ଯେ ବିବାହ ପରେ ନନ୍ଦିନୀ ଅମନଙ୍କୁ ହଇରାଣ କରିବା ଆରମ୍ଭ କରିଥିଲେ। ଅନେକ ବୁଝାମଣା ପରେ ମଧ୍ୟ ତାଙ୍କ ଆଚରଣରେ ପରିବର୍ତ୍ତନ ହୋଇନଥିଲା। ନିରାଶ ହୋଇ ସେ ନନ୍ଦିନୀଙ୍କୁ ଛାଡି ବିବାହର ଦୁଇ ମାସ ପରେ ସେପ୍ଟେମ୍ବରରେ ତାଙ୍କ ପିତାମାତାଙ୍କ ନିକଟକୁ ଚାଲି ଯାଇଥିଲେ। ତାଙ୍କ ବିଷୟରେ ବର୍ଣ୍ଣନା କରି ଅମନ କହିଛନ୍ତି ମୁଁ କେବଳ ଦ୍ୱାଦଶ ପାସ। ମୁଁ କଲେଜରେ ଆଡମିଶନ ନେଇଥିଲି, କିନ୍ତୁ ନନ୍ଦିନୀ ହେତୁ ମୋତେ ଅଧ୍ୟୟନ ଛାଡିବାକୁ ପଡିଥିଲା। ମୁଁ କୌଣସି ରୋଜଗାର କରୁନାହିଁ। ନନ୍ଦିନୀ ଏକ ବିୟୁଟି ପାର୍ଲର ଚଳାନ୍ତି । ଏଭଳି ପରିସ୍ଥିତିରେ ମୋତେ ତାଙ୍କଠାରୁ ରକ୍ଷଣାବେକ୍ଷଣ ଭତ୍ତା ଦିଆଯାଉ ବୋଲି ସେ ଦାବି କରିଥିଲେ।
