କଟକ,୮।୫(କାର୍ତ୍ତିକ ସାହୁ): ବାଦାମବାଡ଼ି ଥାନା ଅନ୍ତର୍ଗତ ହାଇକୋର୍ଟ କଲୋନୀ ଛକ ତଥା ଧରିତ୍ରୀ କାର୍ଯ୍ୟାଳୟ ନିକଟରେ ଗୁରୁବାର ସନ୍ଧ୍ୟାରେ କେତେଜଣ ଯୁବକ ଉନ୍ମତ୍ତ କାଣ୍ଡ ଘଟାଇଛନ୍ତି। ସାମାନ୍ୟ କଥାରେ ଉତ୍ତ୍ୟକ୍ତ ହୋଇ ଜଣେ ଯୁବକଙ୍କୁ ସଂଘବଦ୍ଧ ଭାବେ ଆକ୍ରମଣ କରିଛନ୍ତି। ଏପରିକି ପଥରରେ ଛେଚିବା ସହ ତଳେ ଘୋଷାଡ଼ି ପ୍ରବଳ ପିଟିଛନ୍ତି। ଯୁବକ ଜଣକ ଆତ୍ମରକ୍ଷା ପାଇଁ ଧରିତ୍ରୀ ଅଫିସ ଭିତରକୁ ପଶିଯାଇଥିବା ବେଳେ ସେମାନେ ମଧ୍ୟ ଅଫିସ ଭିତରକୁ ଯାଇ ଗୋଡ଼ାଇ ଗୋଡ଼ାଇ ପିଟିଛନ୍ତି। ଏପରିକି ଧରିତ୍ରୀ କାର୍ଯ୍ୟାଳୟରେ କାର୍ଯ୍ୟରତ ମହିଳା ଖବରଦାତାଙ୍କୁ ଦୁର୍ବ୍ୟବହାର ମଧ୍ୟ କରିଛନ୍ତି। ଘଟଣା ଘଟିବାର କିଛି ସମୟ ପରେ ପିସିଆର ଭ୍ୟାନ୍ ପହଞ୍ଚତ୍ ଘଟଣାସ୍ଥଳ ପରିଦର୍ଶନ କରି ତଦନ୍ତ ଆରମ୍ଭ କରିଛି। ଏନେଇ ବାଦାମବାଡ଼ି ଥାନାରେ ଏତଲା ଦିଆଯାଇଛି।
ସୂଚନାନୁସାରେ, ହାଇକୋର୍ଟ କଲୋନୀ ଛକରେ ଥିବା ଏକ ଦୋକାନ ସମ୍ମୁଖରୁ ଗୁରୁବାର ସନ୍ଧ୍ୟା ପ୍ରାୟ ୬.୪୫ ମିନିଟରେ ପ୍ରବଳ ପାଟିତୁଣ୍ଡ ଶୁଭିଥିଲା। ସାମାନ୍ୟ କଥାରୁ ଉତ୍ତ୍ୟକ୍ତ ହୋଇ ପ୍ରାୟ ୧୫ଜଣ ଯୁବକ ସଂଘବଦ୍ଧ ଭାବେ ଜଣେ ଯୁବକଙ୍କୁ ଘେରିଯାଇଥିଲେ। ସେମାନେ ତାଙ୍କୁ ଘୋଷାଡ଼ି ନେଇ ପ୍ରଥମେ ଯୁକ୍ତିତର୍କ ଓ ପରେ ଆକ୍ରମଣ କରିଥିଲେ। ଯୁବକଙ୍କ ସାଙ୍ଗ ଅଟକାଇବାକୁ ଯିବାରୁ ତାଙ୍କୁ ମଧ୍ୟ ସେମାନେ ପିଟିଥିଲେ। ଏତେସବୁ ପରେ ବି ରାଗ ଥଣ୍ଡା ହୋଇ ନ ଥିଲା। ଯୁବକ ଜଣଙ୍କ ନିକକୁ ସୁରକ୍ଷା କରିବାକୁ ଗୋଟିଏ ସ୍ଥାନରେ ଲୁଚି ଯାଇଥିଲେ। ସେମାନଙ୍କ ମଧ୍ୟରୁ ଜଣେ ଲୁଚିଥିବା ଯୁବକଙ୍କୁ ଦେଖିଦେଇ ଅନ୍ୟମାନଙ୍କୁ ଡାକ ପକାଇଥିଲେ। ଫଳରେ ଯୁବକ ଜଣକ ଭୟରେ ଆତ୍ମରକ୍ଷା ପାଇଁ ଧରିତ୍ରୀ କାର୍ଯ୍ୟାଳୟ ଭିତରକୁ ପଶିଯାଇଥିଲେ। ଅନ୍ୟମାନେ ଯୁବକଙ୍କ ପିଛା କରି ସେଠାରେ ପଶି ମାଡ଼ ମାରିବା ପରେ ପଳାଇ ଯାଇଥିଲେ। ଛକରେ ଲୋକମାନେ ଏସବୁ ଦେଖଣାହାରୀ ଭାବେ ଉପଭୋଗ କରୁଥିଲେ। ମାତ୍ର କେହି ଅଟକାଇବାକୁ ଆଗେଇ ଆସି ନ ଥିଲେ। ସ୍ଥାନୀୟ ଅଞ୍ଚଳରେ ଚୋରା ମାଦକଦ୍ରବ୍ୟ କାରବାର ହିଁ ଯୁବଗୋଷ୍ଠୀଙ୍କୁ ପଥଭ୍ରଷ୍ଟ କରୁଥିବା ଆଲୋଚନା ହେଉଛି। ପୋଲିସ ଏ ଦିଗରେ ଦୃଢ଼ ପଦକ୍ଷେପ ନେବାକୁ ସ୍ଥାନୀୟ ଲୋକେ ଦାବି କରିଛନ୍ତି।
