ନୂଆଦିଲ୍ଲୀ,୮।୫: ସୀମାପାର ଆତଙ୍କବାଦ ପାଇଁ ପାକିସ୍ତାନକୁ ଭାରତ ଠିକଣା ଜବାବ ଦେଇଛି। ପାକିସ୍ତାନ ଯଦି କୌଣସି ସମୟରେ ଭାରତରେ ଆତଙ୍କବାଦ କାର୍ଯ୍ୟକଳାପ କରିବାକୁ ଉଦ୍ୟମ କରେ ତେବେ ଭାରତ ଏଥିପାଇଁ ଉଚିତ ପଦକ୍ଷେପ ଗ୍ରହଣ କରିବ ବୋଲି ଗୁରୁବାର ବହିର୍ବ୍ୟାପାର ମନ୍ତ୍ରଣାଳୟ ପକ୍ଷରୁ ସ୍ପଷ୍ଟ କରାଯାଇଛି। ୨୦୨୫ ମେ’୭ରେ ଆରମ୍ଭ ହୋଇଥିବା ଅପରେଶନ ସିନ୍ଦୂରକୁ ବର୍ଷେ ପୂରିଥିଲାବେଳେ ଏହି ପରିପ୍ରେକ୍ଷୀରେ ବହିର୍ବ୍ୟାପାର ମନ୍ତ୍ରଣାଳୟ ପ୍ରବକ୍ତା ରଣଧୀର ଜୟଓ୍ବାଲ କହିଛନ୍ତି, ୨୦୨୫ ଏପ୍ରିଲ ପହଲଗାମ୍ ଆତଙ୍କବାଦ ଘଟଣାକୁ ନେଇ ଭାରତ ପାକିସ୍ତାନ ବିରୋଧରେ ଯେଭଳି ପଦକ୍ଷେପ ନେଇଥିଲା ତାହାକୁ ବିଶ୍ୱସ୍ତରରେ ସମର୍ଥନ ମିଳିଛି ।
ଆତଙ୍କବାଦକୁ ରୋକିବା ସହ ଦେଶର ସୁରକ୍ଷା ପାଇଁ ଭାରତ ସବୁସ୍ତରରେ ମୁକାବିଲାକରି ଆତଙ୍କବାଦକୁ ପ୍ରୋତ୍ସାହିତ କରୁଥିବା ରାଷ୍ଟ୍ର ପ୍ରତି ଉଚିତ ପଦକ୍ଷେପ ନେବାର ଅଧିକାର ରଖିଛି। ପାକିସ୍ତାନ କେବଳ ପରମାଣୁ ଅସ୍ତ୍ର ଭୟ ଦେଖାଇ ଭାରତକୁ ବ୍ଲାକ୍ମେଲ୍ କରିପାରିବ ନାହିଁ। ସୀମାପାର ଆତଙ୍କବାଦକୁ ପାକିସ୍ତାନ ଜାତୀୟ ନୀତି କରି ଭାରତ ବିରୋଧୀ କାର୍ଯ୍ୟ ଚଳାଇଛି। କିନ୍ତୁ ଏଭଳି କାର୍ଯ୍ୟ ପାଇଁ ପାକିସ୍ତାନକୁ ଉଚିତ ଶିକ୍ଷା ଦେବାକୁ ଭାରତ ପ୍ରସ୍ତୁତ ଏବଂ ଆବଶ୍ୟକ ସ୍ଥଳେ ଜବାବ ଦିଆଯିବ ବୋଲି ଜୟସ୍ବାଲ କହିଛନ୍ତି। ପାକିସ୍ତାନର ଆତଙ୍କବାଦ କାର୍ଯ୍ୟକଳାପ ଚଳାଇଥିବାରୁ ସିନ୍ଧୁ ନଦୀଜଳ ଚୁକ୍ତିକୁ ନେଇ ଭାରତ ଯେଉଁ ନିଷ୍ପତ୍ତି ନେଇଛି ସେଥିରେ କୌଣସି ପରିବର୍ତ୍ତନ ହେବ ନାହିଁ ବୋଲି ସେ ରୋକ୍ଠୋକ୍ କହିଛନ୍ତି। ଗତବର୍ଷ ଭାରତ ସିନ୍ଧୁଜଳ ଚୁକ୍ତିକୁ ରଦ୍ଦ କରିଦେଇଥିଲାବେଳେ ବାଗଲିଘର ଡ୍ୟାମ୍ ଏବଂ ଚେନାବ ନଦୀର ସମସ୍ତ ଦ୍ୱାର ବନ୍ଦ କରିଦିଆଯାଇଛି।
ଏହାଦ୍ୱାରା ପାକିସ୍ତାନକୁ ଯାଉଥିବା ପାଣି ବନ୍ଦ ରହିଛି। ଏବେ ଗ୍ରୀଷ୍ମକାଳରେ ପୂର୍ବ ପାକିସ୍ତାନର ଅନେକ ଅଞ୍ଚଳରେ ପାଣି ସମସ୍ୟା ଉତ୍କଟ ହୋଇଥିବାବେଳେ ଭାରତ ସିନ୍ଧୁଜଳ ଚୁକ୍ତିକୁ ନେଇ ବୁଝାମଣା କରୁ ବୋଲି ପାକିସ୍ତାନ ଦାରମ୍ବାର ଦାବି କରୁଛି। ହେଲେ ପାକିସ୍ତାନ ଆତଙ୍କବାଦ କାର୍ଯ୍ୟକଳାପ ବନ୍ଦ ନ କରିବା ଯାଏ ଏହି ଚକ୍ତିକୁ ନେଇ କୌଣସି ବୁଝାମଣା କରାଯିବ ନାହିଁ ବୋଲି ଜୟସ୍ବାଲ ସ୍ପଷ୍ଟ କରିଛନ୍ତି। ଅପରେଶନ ସିନ୍ଦୁରର ପ୍ରଥମ ବାର୍ଷିକ ପୂର୍ତ୍ତି ଅବସରରେ ଭାରତ ସରକାରଙ୍କ ପକ୍ଷରୁ ଏକ ଫିଲ୍ମ ଉନ୍ମୋଚିତ ହୋଇଛି।
