ଓ୍ବାଶିଂଟନ୍,୧୧।୨: ଆଜିକାଲି ପ୍ରସିଦ୍ଧ ବୈଷୟିକ କମ୍ପାନୀ ମାଇକ୍ରୋସଫ୍ଟର ଶେୟାରଗୁଡିକ ବୃଦ୍ଧି ପାଇବାରେ ଲାଗିଛି। ଆର୍ଟିଫିସିଆଲ ଇଣ୍ଟେଲିଜେନ୍ସ (ଏଆଇ)ରେ ପୂର୍ବରୁ ନିଆଯାଇଥିବା ପଦକ୍ଷେପରୁ କମ୍ପାନୀ ବିପୁଳ ଲାଭ ହାସଲ କରୁଛି। କମ୍ପାନୀର ଶେୟାରରେ ଏହି ବୃଦ୍ଧି ଯୋଗୁ ମାଇକ୍ରୋସଫ୍ଟ ଏପରି ଏକ ଆକଳନକୁ ଛୁଇଁଛି, ଯାହା ଅନ୍ୟ କୌଣସି କମ୍ପାନୀ ପହଞ୍ଚିପାରି ନାହାନ୍ତି। ସପ୍ତାହ ଶେଷରେ ମାଇକ୍ରୋସଫ୍ଟର ବଜାର କ୍ୟାପ ୩.୧୨୫ ଟ୍ରିଲିୟନ ଡଲାରରେ ପହଞ୍ଚିଛି।
ଶେୟାରରେ ଏହି ବୃଦ୍ଧି ହେତୁ ମାଇକ୍ରୋସଫ୍ଟ ଆପଲ ଉପରେ ଅଗ୍ରଣୀ ହାସଲ କରିଛି। ମାଇକ୍ରୋସଫ୍ଟ ପ୍ରଥମ ଆମେରିକୀୟ କମ୍ପାନୀ ହୋଇପାରିଛି ଯାହା ୩.୧ ଟ୍ରିଲିୟନ ଡଲାରର ବଜାର କ୍ୟାପ ମାର୍କ ଛୁଇଁଛି।ସର୍ବୋଚ୍ଚ ବଜାର କ୍ୟାପର ପୂର୍ବ ରେକର୍ଡ ଆଇଫୋନ ନିର୍ମାତା ଆପଲ ନାମରେ ଥିଲା। ଜୁଲାଇରେ ଆପଲ ବଜାର କ୍ୟାପ ୩.୦୯ ଟ୍ରିଲିୟନ ଡଲାର କରିଥିଲା। ମାଇକ୍ରୋସଫ୍ଟ ଶେୟାର ଶୁକ୍ରବାର ୪୨୦.୫୫ ଡଲାରରେ ବନ୍ଦ ହୋଇଛି।
ଏଆଇ ସେକ୍ଟରରେ ଓପନ ଏଆଇ ସହିତ ମାଇକ୍ରୋସଫ୍ଟର ସହଭାଗୀତା ଦ୍ୱାରା ଉଭୟ କମ୍ପାନୀ ବହୁତ ଲାଭବାନ ହେଉଛନ୍ତି। ଓପନ ଏଆଇ ଦ୍ୱାରା ସୃଷ୍ଟି ହୋଇଥିବା ଚାଟ ଜିପିଟି ସମଗ୍ର ବିଶ୍ୱରେ ଲୋକପ୍ରିୟ ହୋଇପାରିଛି। ଏଆଇ ବ୍ୟବହାର ପାଇଁ ଲୋକଙ୍କ ମଧ୍ୟରେ ଉତ୍ସାହ ସୃଷ୍ଟି ହୋଇଛି।
