ଇସଲାମାବାଦ୍,୨୭।୩: ପାକିସ୍ତାନରେ ଅର୍ଥନୈତିକ ସଙ୍କଟର ପ୍ରଭାବ ରମଜାନ ମାସରେ ପଡିଛି। ଏଠାରେ ଏକ ଡଜନ କଦଳୀ ମୂଲ୍ୟ ୫୦୦ ଟଙ୍କାରେ ପହଞ୍ଚିଛି। କେବଳ ଏତିକି ନୁହେଁ, ବର୍ତ୍ତମାନ ପାକିସ୍ତାନରେ ଅଙ୍ଗୁର କିଲୋଗ୍ରାମ ୧୬୦୦ ଟଙ୍କାରେ ବିକ୍ରି ହେଉଛି।
କେବଳ କଦଳୀ ଏବଂ ଅଙ୍ଗୁର ନୁହେଁ, ଦୈନନ୍ଦିନ ଜିନିଷର ମୂଲ୍ୟ ମଧ୍ୟ ଆକାଶଛୁଆଁ ହେଉଛି। ପିଆଜ ଦର ୨୨୮.୨୮ ପ୍ରତିଶତ ବୃଦ୍ଧି ପାଇଛି। ଅଟା ମୂଲ୍ୟ ୧୨୦.୬୬ ପ୍ରତିଶତକୁ ବୃଦ୍ଧି ପାଇଛି। ଏହି ସମୟରେ ପାକିସ୍ତାନରେ ଡିଜେଲ ଦର ମଧ୍ୟ ୧୦୨.୮୪ ପ୍ରତିଶତ ଏବଂ ପେଟ୍ରୋଲ ୮୧.୧୭ ପ୍ରତିଶତ ମହଙ୍ଗା ବିକ୍ରି ହେଉଛି।
ଗରିବ ପାକିସ୍ତାନକୁ ଋଣ ଦେବା ପାଇଁ ଅନ୍ତର୍ଜାତୀୟ ମୁଦ୍ରା ପାଣ୍ଠି (ଆଇଏମଏଫ) ଅନେକ ସର୍ତ୍ତ ରଖିଛି। ଫେବୃଆରୀ ଆରମ୍ଭରୁ ପାକିସ୍ତାନ ଏବଂ ଆଇଏମଏଫ ମଧ୍ୟରେ ୧.୧ ବିଲିୟନ ଡଲାରର ଋଣ ଛାଡକୁ ନେଇ ଆଲୋଚନା ଚାଲିଛି। ଯଦି ଆଇଏମଏଫ ଏହି ଋଣ ପ୍ରଦାନ କରେ, ତେବେ ପାକିସ୍ତାନର ଅର୍ଥନୀତି ପୁନରୁତ୍ଥାନ ପାଇପାରିବ।
