ନୂଆଦିଲ୍ଲୀ,୫।୧୨: ଦିଲ୍ଲୀରେ ବାୟୁ ପ୍ରଦୂଷଣ ପୁଣି ବୃଦ୍ଧି ପାଇଛି। ସ୍ଥିତିକୁ ନିୟନ୍ତ୍ରଣରେ କରିବା ଲାଗି ଦିଲ୍ଲୀ କର୍ତ୍ତୃପକ୍ଷ କଟକଣା ଜାରି କରିଛନ୍ତି। ରାଜଧାନୀରେ ସମସ୍ତ ନିର୍ମାଣ ଓ ଉଚ୍ଛେଦ କାର୍ଯ୍ୟକୁ ବନ୍ଦ ରଖାଯାଇଛି। ଅତି ଜରୁରୀ ନ ଥିବା ନିର୍ମାଣ କାର୍ଯ୍ୟ ବନ୍ଦ ରଖିବାକୁ ବାୟୁ ମାନ ପରିଚାଳନା ଆୟୋଗ (ଏସଏକ୍ୟୁଏମ୍) ଦିଲ୍ଲୀ-ଏନ୍ସିଆର୍ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଛନ୍ତି।
ରବିବାର ଅପରାହ୍ନରେ ଦିଲ୍ଲୀରେ ହାରାହାରି ବାୟୁ ମାନ ସୂଚକାଙ୍କ ୪୦୭ ରହିଛି। ବାୟୁ ମାନ ୨୦୧ରୁ ୩୦୦ ମଧ୍ୟରେ ଥିଲେ ଏହାକୁ ନିକୃଷ୍ଟ, ୩୦୧ରୁ ୪୦୦କୁ ଅତି ନିକୃଷ୍ଟ ଏବଂ ୪୦୧ରୁ ୫୦୦କୁ ଗମ୍ଭୀର ବିବେଚନା କରାଯାଇଥାଏ। ନଭେମ୍ବର ୪ରେ ଦିଲ୍ଲୀ ବାୟୁ ମାନ ସୂଚକାଙ୍କ ୪୪୭ରେ ପହଞ୍ଚି ଥିଲା। ସେତିକିବେଳେ ସମସ୍ତ ନିର୍ମାଣ କାର୍ଯ୍ୟ ବନ୍ଦ ରଖିବାକୁ ନିର୍ଦ୍ଦେଶ ଦିଆଯାଇଥିଲା। ନଭେମ୍ବର ୧୪ରେ ସ୍ଥିତିରେ ସାମାନ୍ୟ ଉନ୍ନତି ଆସିବାରୁ କଟକଣା ହଟାଯାଇଥିଲା।
