ବଅଁରପାଳ,୩୦ା୫(ଡି.ଏନ.ଏ.): ଜନସାଧାରଣ ଓ ପୋଲିସ ମଧ୍ୟରେ ସୁସମ୍ପର୍କ ସ୍ଥାପନ ସହ ଅପରାଧ ହ୍ରାସ କରିବା ଉଦ୍ଦେଶ୍ୟରେ ୨୦୧୩ ମସିହାରେ ସରକାରଙ୍କ ପକ୍ଷରୁ ଆମ ପୋଲିସ ସମିତି ବ୍ୟବସ୍ଥା ଆରମ୍ଭ କରାଯାଇଥିଲା। ଏହା ପ୍ରଥମେ ଅନୁଗୋଳ ଜିଲା ନାଲ୍କୋ ଥାନାରେ କାର୍ଯ୍ୟକ୍ଷମ ହୋଇଥିଲା। ଏହାର ସୁଫଳ ମଧ୍ୟ ସେହି ସମୟରେ ପରିଲକ୍ଷିତ ହୋଇଥିଲା। ହେଲେ ୨ ବର୍ଷ ହେଲା ଏହି ବ୍ୟବସ୍ଥା ଥାନାରେ ସମ୍ପୂର୍ଣ୍ଣ ଅଚଳ ହୋଇପଡ଼ିଛି। ଏହି ସମୟ ମଧ୍ୟରେ ସମିତିର ଗୋଟିଏ ହେଲେ ବି ବୈଠକ ବସିନାହିଁ। ଫଳରେ ଥାନା ଅଞ୍ଚଳରେ ଅପରାଧ ବୃଦ୍ଧି ପାଉଥିବା ଅଭିଯୋଗ ହେଉଛି।
ପ୍ରକାଶ ଯେ, ନାଲ୍କୋ ଥାନାରେ ଏହି ବ୍ୟବସ୍ଥା ଲାଗୁ ପରେ ନାଲ୍କୋ କଲୋନୀ, କୁଲାଡ଼, ଗିରାଙ୍ଗ, କୁରୁଡୁଲୁ, କାଣ୍ଡସର, ବଳରାମପ୍ରସାଦ, କନ୍ୟାବେଡ଼ା ଓ ମୁଣ୍ଡାହଟିଂ ଅଞ୍ଚଳରେ ୭ଟି ବିଟ୍ ଗଠନ କରାଯାଇଥିଲା। ପ୍ରତ୍ୟେକ ବିଟ୍ରେ ଜଣେ ଜଣେ ଅଧିକାରୀଙ୍କୁ ଦାୟିତ୍ୱ ଦିଆଯାଇଥିଲା। ପ୍ରତି ମାସରେ ବିଟ୍ ସଦସ୍ୟ ଓ ପୋଲିସ ମଧ୍ୟରେ ବୈଠକ ବସୁଥିଲା। ବିଟ୍ ଅଧିକାରୀମାନେ ଗଁା ଗଁା ବୁଲି ଲୋକଙ୍କ ସହ ସମ୍ପର୍କ ଦୃଢ଼ କରୁଥିଲେ। ପୋଲିସ ପ୍ରତି ଲୋକଙ୍କ ମନରେ ଯେପରି ଭୟ ନ ରହିବ ସେ ଦିଗରେ ପଦକ୍ଷେପ ନେଉଥିଲେ। ମାତ୍ର ୨ ବର୍ଷ ହେଲା ତାହା ଦେଖିବାକୁ ମିଳୁନାହିଁ। ସମିତିର ବୈଠକ ବସୁନାହିଁ। ୭ଟି ବିଟ୍ରେ କୌଣସି ଅଧିକାରୀ ନାହାନ୍ତି। ବିଟ୍ ଅଞ୍ଚଳରେ ପାଟ୍ରୋଲିଂ ପାଇଁ ଯୋଗାଇ ଦିଆଯାଇଥିବା ବାଇକ୍ ମଧ୍ୟ ଆଉ ନାହିଁ। ଉକ୍ତ ବାଇକ୍ଗୁଡିକ ପୋଲିସର ଅନ୍ୟ ବିଭାଗକୁ ପ୍ରଦାନ କରାଯାଇଥିବା ଥାନା ସୂତ୍ରରୁ ସୂଚନା ମିଳିଛି। ତେଣୁ ଅଞ୍ଚଳରେ ଏହି ଯୋଜନା ନିଷ୍କ୍ରିୟ ହୋଇପଡିଛି। ଏହି କାରଣରୁ ଚୋରି, ରାହାଜାନି, ଡ୍ରଗ୍ସ କାରବାର ଭଳି ଅପରାଧ ବୃଦ୍ଧିପାଉଛି। ସେହିପରି ବର୍ତ୍ତମାନ ଥାନାରେ କର୍ମଚାରୀଙ୍କ ଅଭାବ ଦେଖାଦେଇଛି। ୩ ଜଣ ଏସ୍ଆଇ ଓ ୩ ଏଏସ୍ଆଇଙ୍କ ସ୍ଥାନରେ ୨ ଜଣ ଲେଖାଏ କାର୍ଯ୍ୟ କରୁଛନ୍ତି। ୨୦ କନଷ୍ଟେବଳଙ୍କ ଆବଶ୍ୟକତା ଥିବାବେଳେ ୭ ଜଣ ମହିଳା ଓ ୪ ଜଣ ପୁରୁଷ କନଷ୍ଟେବଳ ଡ୍ୟୁଟି କରୁଛନ୍ତି। ତୁରନ୍ତ ଆମ ପୋଲିସ ବ୍ୟବସ୍ଥାକୁ ପୁନଃ କାର୍ଯ୍ୟକ୍ଷମ କରିବାକୁ ସାଧାରଣରେ ଦାବି ହେଉଛି। ଏ ସମ୍ପର୍କରେ ନାଲ୍କୋ ଥାନା ଅଧିକାରୀ ବିନ୍ଦୁବାସିନୀ ବିଶ୍ୱାଳ କହିଛନ୍ତି, କରୋନା ପାଇଁ ବୈଠକ ହୋଇପାରୁ ନ ଥିଲା। ଖୁବ୍ଶୀଘ୍ର ପ୍ରତ୍ୟେକ ଗ୍ରାମରେ ଆମ ପୋଲିସର ବୈଠକ ଅନୁଷ୍ଠିତ ହେବ। ଲୋକଙ୍କ ସହ ସୁସମ୍ପର୍କ ସ୍ଥାପନ ପାଇଁ ଉଦ୍ୟମ ଜାରି ରହିବ।
