ଖୋର୍ଦ୍ଧା ଅଫିସ,୨୨ା୪: ଚଳିତବର୍ଷ ଜୁନ ୧ରୁ ୧୬ ପର୍ଯ୍ୟନ୍ତ ଉଚ୍ଚ ଶିକ୍ଷାନୁଷ୍ଠାନରେ ଖରାଛୁଟି ଘୋଷଣା ହୋଇଥିବା ବେଳେ ଜୁନ ୬ରୁ ୧୬ ତାରିଖ ପର୍ଯ୍ୟନ୍ତ ବିଦ୍ୟାଳୟରେ ହେବ ଖରାଛୁଟି। ତେବେ ଜୁନରେ ଖରାଛୁଟିକୁ ନେଇ ବିଭିନ୍ନ ମହଲରେ ଅସନ୍ତୋଷ ପ୍ରକାଶ ପାଇଛି। ମେ’ରେ ପ୍ରଚଣ୍ଡ ଖରାରେ ପିଲାମାନେ କିପରି ସ୍କୁଲ ଯିବେ, କୌଣସି ବିଦ୍ୟାର୍ଥୀଙ୍କ ସ୍ବାସ୍ଥ୍ୟଗତ ସମସ୍ୟା ହେଲେ କିଏ ଉତ୍ତରଦାୟୀ ରହିବ ବୋଲି ଅଭିଭାବକମାନେ କହିଛନ୍ତି। ତେଣୁ ଜୁନ ପରିବର୍ତ୍ତେ ମେ’ରେ ଖରାଛୁଟି କରିବା ଲାଗି ଅଭିଭାବକ ଓ ବୁଦ୍ଧିଜୀବୀମାନେ ଦାବି କରିଛନ୍ତି।
ଅଭିଭାବକ ଗୋପାଳ ଦାସ କୁହନ୍ତି, ଏପ୍ରିଲରେ ଖରାର ପ୍ରଭାବ ଅଧିକ ରହିଛି। ଦିନରେ ତାପମାତ୍ରା ପ୍ରାୟ ୩୮ ଡିଗ୍ରୀ ଉପରେ ରହୁଛି। ମେ’ରେ ଏହା ଅଧିକ ରହିବ। ଏହି ସମୟରେ ଅଧିକ ଖରା ଓ ଗୁଳୁଗୁଳି ହୋଇଥାଏ। ବୁଦ୍ଧିଜୀବୀ ଶକ୍ତିଶଙ୍କର ମିଶ୍ର କୁହନ୍ତି, ମେ’ରେ ପ୍ରଚଣ୍ଡ ଖରା ହୋଇଥାଏ। ପିଲାଙ୍କ ଯିବାଆସିବାରେ ଅସୁବିଧା ହୋଇପାରେ। ସେହିପରି ବରିଷ୍ଠ ନାଗରିକ ରାମଶଙ୍କର ସମାନ ଅଭିଯୋଗ ଆଣିଛନ୍ତି। ସରକାର ନିଜ ନିଷ୍ପତ୍ତି ତର୍ଜମା କରନ୍ତୁ ବୋଲି କହିଛନ୍ତି। ବରିଷ୍ଠ ବୁଦ୍ଧିଜୀବୀ ଜ୍ଞାନ ରଞ୍ଜନ ଦାଶ, ଆଇନଜୀବୀ ବସନ୍ତ ଦାସ କୁହନ୍ତି, ମେ’ରେ ତାପମାତ୍ରା ଅଧିକ ରହିଥାଏ। ଜୁନରେ ମୌସୁମୀ ପ୍ରବେଶ କରିଥାଏ, ତେଣୁ ତାପମାତ୍ରା ହ୍ରାସ ପାଇଥାଏ। ମେ’ରେ ଖରାଛୁଟି କରିବାକୁ କହିଛନ୍ତି। ଅଭିଭାବକ ତପନ ସାମନ୍ତରାୟ, ସାମାଜିକ କର୍ମୀ ଶୁଭ୍ରରଞ୍ଜନ ଦାସ, ଦାଶରଥି ଦାସ କୁହନ୍ତି, ବର୍ତ୍ତମାନ ଖରା ଅସହ୍ୟ ହେଲାଣି। ପୂର୍ବାହ୍ନ ୧୦ଟା ପରେ ଘରୁୁ ପଦାକୁ ବାହାରି ହେଉନି। ଆଗକୁ ଖରା ବଢିବ। ମେ’ରେ ତାପମାତ୍ରା ବୃଦ୍ଧି ପାଇବା ଆଶଙ୍କା ରହିଛି। ଏହି ସମୟରେ ପିଲାମାନେ ସ୍କୁଲରେ ପାଠ ପଢ଼ିବା ସମ୍ଭବପର ନୁହଁ। ପିଲାଙ୍କ ସ୍ବାସ୍ଥ୍ୟକୁ ଦୃଷ୍ଟିରେ ରଖି ମେ’ ମାସ ସମ୍ପୂର୍ଣ୍ଣ ବନ୍ଦ ରଖାଯାଉ। ଜୁନରେ ତାପମାତ୍ରା କମିଲେ ପିଲାଙ୍କ ପାଠପଢ଼ା କରାଯାଉ। ଅନ୍ୟପଟେ ବରିଷ୍ଠ ସାମାଜିକ କର୍ମୀ ପ୍ରଭାତ ମିଶ୍ର, ଆଇନଜୀବୀ ଅଜିତ ପଟ୍ଟନାୟକ କୁହନ୍ତି, ଖରାକୁ ଡରି ଅଭିଭାବକମାନେ ପଦାକୁ ବାହାରିବାକୁ ଭୟ କରୁଛନ୍ତି। ପିଲାଙ୍କୁ ପାଠ ପଢିବାକୁ ଛାଡିବା ନେଇ ଆଶଙ୍କା ରହିଛି। ଖରାର ପ୍ରଭାବକୁ ଦୃଷ୍ଟିରେ ରଖି ଜୁନ ପରିବର୍ତ୍ତେ ମେ’ରେ ଖରାଛୁଟି କରାଯାଉ ବୋଲି ସେ କହିଛନ୍ତି।
