ପୁରୀ ଅଫିସ,୧୨।୧୨: ଶ୍ରୀମନ୍ଦିର ଧାଡ଼ି ଦର୍ଶନ ପାଇଁ ଶ୍ରଦ୍ଧାଳୁଙ୍କୁ ଘଣ୍ଟା ଘଣ୍ଟା ଅପେକ୍ଷା କରିବାକୁ ପଡୁଥିବା ବେଳେ କେତେଜଣ ସେବାୟତ ଶ୍ରଦ୍ଧାଳୁଙ୍କୁ ବିନା ଧାଡ଼ିରେ ଶ୍ରୀମନ୍ଦିରରେ ପ୍ରବେଶ କରାଉଛନ୍ତି। ଏଭଳି ଘଟଣାର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଭିଡିଓରେ ୨୦ରୁ ଊର୍ଦ୍ଧ୍ୱ ଶ୍ରଦ୍ଧାଳୁ ଏକ ସେବାୟତଙ୍କ ପଛେ ପଛେ ଧାଡ଼ିଠାରୁ କିଛି ଦୂରରେ ଶ୍ରୀମନ୍ଦିର ଭିତରେ ପ୍ରବେଶ କରୁଛନ୍ତି। ଏହି ଭିଡିଓ ଭାଇରାଲ ହେବା ପରେ ଅନ୍ୟ ଶ୍ରଦ୍ଧାଳୁ ଓ ପୁରୀ ସହରବାସୀ ଅସନ୍ତୋଷ ପ୍ରକାଶ କରିଛନ୍ତି। ତେବେ ଉକ୍ତ ଶ୍ରଦ୍ଧାଳୁଙ୍କ ପଞ୍ଜୀକରଣ ହୋଇଛି କି ନାହିଁ ଓ ସେମାନେ ବିନା ଧାଡ଼ିରେ କିଭଳି ଭାବେ ଶ୍ରୀମନ୍ଦିର ସିଂହଦ୍ୱାର ଦେଇ ପ୍ରବେଶ କରିପାରୁଛନ୍ତି ତାହାକୁ ନେଇ ସହରବାସୀ ପ୍ରଶ୍ନ କରିଛନ୍ତି। କୋଭିଡ୍ ସଂକ୍ରମଣକୁ ରୋକିବା ପାଇଁ କିଓସ୍କୋ ବ୍ୟବସ୍ଥା ହୋଇଥିବା ବେଳେ ପ୍ରତ୍ୟେକ ଶ୍ରଦ୍ଧାଳୁଙ୍କର ପଞ୍ଜୀକରଣ କରି ଧାଡ଼ିରେ ଦର୍ଶନ ପାଇଁ ଯାଉଛନ୍ତି। ମାତ୍ର ଏବେ ସୋସିଆଲ ମିଡିଆରେ ଘୂରି ବୁଲୁଥିବା ଚିତ୍ର ସହରବାସୀଙ୍କ ଚିନ୍ତା ବଢ଼ାଇଛି।
ସାମାଜିକ କର୍ମୀ ସ୍ବାଧୀନ ପଣ୍ଡା କହିଛନ୍ତି, ଯେଉଁଭଳି ଭାବେ ଗଳାବାଟ ଦେଇ ଶ୍ରଦ୍ଧାଳୁମାନେ ଯାଉଛନ୍ତି ତାହାକୁ ଦେଖିଲେ ଜଣାପଡୁଛି ଯେ ପଞ୍ଜୀକରଣ କରିନାହାନ୍ତି। ଅର୍ଥାତ୍ ଏମାନେ ସଂକ୍ରମଣର ବାହାକ ମଧ୍ୟ ହୋଇପାରିଥାଆନ୍ତି। ସୁରକ୍ଷା ଦୃଷ୍ଟିକୋଣରୁ ଏହା ଏକ ସମ୍ବେଦନଶୀଳ ପ୍ରସଙ୍ଗ। ଶ୍ରୀମନ୍ଦିର ପୋଲିସ, ସ୍ବେଚ୍ଛାସେବୀ ଓ ଓଡ଼ିଶା ପୋଲିସର କର୍ମଚାରୀମାନେ ଶ୍ରୀମନ୍ଦିର ସିଂହଦ୍ୱାର ସମ୍ମୁଖରେ ଉପସ୍ଥିତ ଥିବାବେଳେ ଯେଉଁଭଳି ଭାବେ ଯାତ୍ରୀମାନଙ୍କୁ ବିନା ପଞ୍ଜୀକରଣରେ ଛଡ଼ାଯାଉଛି ତାହା ଚିନ୍ତାଜନକ ଅଟେ। ଶ୍ରୀମନ୍ଦିର ପ୍ରଶାସନ ଏଭଳି ଗଳା ବାଟକୁ ବନ୍ଦ କରିବା ସହ ସେବାୟତମାନଙ୍କୁ ଏନେଇ ଚେତାବନୀ ଦେବା ଦରକାର ବୋଲି ସ୍ବାଧୀନ କହିଛନ୍ତି। ଶ୍ରୀମନ୍ଦିର ସୁରକ୍ଷା କରିଡ଼ର ଶ୍ରୀମନ୍ଦିରର ସୁରକ୍ଷା ପାଇଁ ନିର୍ମାଣ କରାଯାଉଥିବା ଜିଲା ପ୍ରଶାସନ ଡିଣ୍ଡିମ ପିଟୁଥିବା ବେଳେ ଗଳାବାଟ ଦେଇ ବିନା ଯାଞ୍ଚରେ ଶ୍ରଦ୍ଧାଳୁଙ୍କୁ ଦର୍ଶନ ପାଇଁ ଛଡ଼ାଯାଉଛି। ଫଳରେ ବିନା କିଓସ୍କୋ ଓ ମେଟାଲ ଡିଟେକ୍ଟର ଦେଇ ଶ୍ରଦ୍ଧାଳୁମାନେ ଶ୍ରୀମନ୍ଦିରରେ ପ୍ରବେଶ କରୁଛନ୍ତି। ଏହା କେତେ ବିପଦପୂର୍ଣ୍ଣ ହୋଇପାରେ ତାହା ପ୍ରଶାସନ ଅନୁଭବ କରିବା ଦରକାର। ଏଣୁ ଠିକ ଭାବେ ସୁରକ୍ଷା ବ୍ୟବସ୍ଥାକୁ ଲାଗୁ କରିବା ଦିଗରେ ପ୍ରଶାସନ ସଚେତନ ହେବା ଦରକାର। ଫଳରେ ଆଗାମୀ ଦିନରେ ଅଘଟଣକୁ ଏଡ଼ାଇ ହେବ ବୋଲି ଦେଖେଣାହାରୀ ପ୍ରଶାନ୍ତ ନାୟକ କହିଛନ୍ତି। ଅନ୍ୟପକ୍ଷରେ ଶ୍ରୀମନ୍ଦିର ଉନ୍ନୟନ ପ୍ରଶାସକ ଅଜୟ କୁମାର ଜେନାଙ୍କ କହିଛନ୍ତି, ଏଭଳି ଘଟଣା ସମ୍ପର୍କରେ ସୂଚନା ନ ଥିଲା। କେବଳ ଭିଆଇପିଙ୍କୁ ଧାଡ଼ି ବାହାରେ ଦର୍ଶନ ପାଇଁ ନିଆଯାଇଥାଏ। ଯଦି ସାଧାରଣ ଲୋକଙ୍କ କ୍ଷେତ୍ରରେ ଏଭଳି ହୋଇଛି ତେବେ ଏ ନେଇ କାର୍ଯ୍ୟାନୁଷ୍ଠାନ ଓ ତୁରନ୍ତ ପଦକ୍ଷେପ ନିଆଯିବ।
