ଚାକିରି ଛାଡ଼ି ଜମ୍ମୁ-କଶ୍ମୀରରେ ପ୍ରଥମ ଅନ୍ଲାଇନ ଗ୍ରସେରି ଷ୍ଟୋର କରିବାର ଶ୍ରେୟ ନେଇଛନ୍ତି ମଲିକ ଆଦିଲ୍। ଜମ୍ମୁ-କଶ୍ମୀରର ବନ୍ଦିପୁର ଅଞ୍ଚଳର ମଲିକ ଦିନକୁ ୪୦୦ ଅର୍ଡର ପାଉଛନ୍ତି ଓ ୭୦ ମିନିଟ୍ ମଧ୍ୟରେ ଦୁର୍ଗମ ଅଞ୍ଚଳରେ ରାଶନ ସାମଗ୍ରୀ ଲୋକଙ୍କ ପାଖରେ ପହଞ୍ଚାଇ ଦେଉଛନ୍ତି। ତାଙ୍କ ଷ୍ଟୋରର ନାମ ରଖିଛନ୍ତି ‘ଗ୍ରେକ୍ସେରି’। ମଲିକ ମାର୍କେଟିଂରେ ଏମ୍ବିଏ ଡିଗ୍ରୀ ହାସଲ କରିବା ପରେ ବେଙ୍ଗାଲୁରୁରେ ଏକ ଅନ୍ଲାଇନ ଗ୍ରୋସେରି ଡେଲିଭରି ଷ୍ଟୋରରେ କାର୍ଯ୍ୟ କରୁଥିତ୍ଲେ। ପରେ କଶ୍ମୀର ଫେରି ଶ୍ରୀନଗରରେ ବ୍ୟବସାୟ ଆରମ୍ଭ କରିଥିଲେ। କିନ୍ତୁ ଲକ୍ଡାଉନ ସମୟରେ ବନ୍ଦିପୁର ଫେରିବା ପରେ ବୟସ୍କ ଲୋକମାନେ ଗ୍ରୋସେରି ସାମଗ୍ରୀ ପାଇବାରେ ସମସ୍ୟାର ସମ୍ମୁଖୀନ ହେଉଥିବା ଲକ୍ଷ୍ୟକରି ସେ ତାଙ୍କ ସାଙ୍ଗମାନଙ୍କ ସହଯୋଗରେ ସେମାନଙ୍କୁ ସାମଗ୍ରୀ ଯୋଗାଉଥିଲେ। ଏହାପରେ ଜୁଲାଇ, ୨୦୨୦ରେ ସେ ଇ-କମର୍ସ ଷ୍ଟୋର ଆରମ୍ଭ କରି ସେବେଠାରୁ ଲୋକମାନଙ୍କ ପାଖରେ ସାମଗ୍ରୀ ପହଞ୍ଚାଇବାରେ ଲାଗିଛନ୍ତି। ୭୦% ପେମେଣ୍ଟ ଅନ୍ଲାଇନରେ ହେଉଛି। ଏବେ ମଲିକ ତାଙ୍କ ଟିମ୍ରେ ୩୫ଜଣଙ୍କୁ ସାମିଲ୍ କରିଛନ୍ତି। ସେ ଆଗକୁ ୧୦୦ ଜଣଙ୍କୁ ନିଯୁକ୍ତି ଦେଇ ଲୋକମାନଙ୍କ ପାଖରେ ସହଜରେ ଓ କମ୍ ସମୟରେ ଗ୍ରୋସେରି ସାମଗ୍ରୀ ପହଞ୍ଚାଇବା ଲକ୍ଷ୍ୟ ରଖିଛନ୍ତି।
