ଲଦାଖ, ୧।୭: ଚାଇନାର ଦାଦାଗିରି ଜାରି ରହିଛି। ଗଲଓ୍ବାନ ଘାଟିର ହିଂସକ ସଂଘର୍ଷ ପରେ ଭାରତ ଚାଇନା ମଧ୍ୟରେ ଶାନ୍ତିପୂର୍ଣ୍ଣ ଆଲୋଚନା ପାଇଁ ଉଦ୍ୟମ କରାଯାଇଥିଲା। ଚାଇନା ଗୋଟିଏ ପଟେ ଶାନ୍ତିର କଥା କହୁଥିବାବେଳେ ପ୍ରକୃତ ନିୟନ୍ତ୍ରଣ ରେଖା(ଏଲ୍ଏସି)ରେ ସୈନ୍ୟ ଠୁଳ କରିବାରେ ଲାଗିଛି। ଇତିମଧ୍ୟରେ ପୂର୍ବ ଲଦାଖଠାରେ ଚାଇନା ୨୦ ହଜାରରୁ ଅଧିକ ସୈନ୍ୟ ମୁତୟନ କରିଛି। ଏହାକୁ ଦୃଷ୍ଟିରେ ରଖି ଭାରତ ମଧ୍ୟ ପୂର୍ବ ଲଦାଖ ଅଞ୍ଚଳର ଏଲ୍ଏସିରେ ଦୁଇ ଡିଭିଜନ ସେନାଙ୍କୁ ମୁତୟନ କରିଛି। ସେମାନଙ୍କ ମଧ୍ୟରେ ମାଉଣ୍ଟେନ୍ ଡିଭିଜନର ଯବାନମାନେ ରହିଛନ୍ତି। ଏହି ସ୍ଥାନଠାରୁ ପ୍ରାୟ ହଜାରେ କିଲୋମିଟର ଦୂରରେ ଉତ୍ତର ଶିନ୍ଜିୟାଙ୍ଗ୍ଠାରେ ଚାଇନା ୧୦ ହଜାର ସୈନ୍ୟଙ୍କୁ ଏକତ୍ରିତ କରିଛି। ଭାରତ ସୀମାରେ ପହଞ୍ଚିବା ଲାଗି ଚାଇନା ସୈନ୍ୟଙ୍କୁ ପ୍ରାୟ ୪୮ ଘଣ୍ଟା ସମୟ ଲାଗିବ ବୋଲି ଅନୁମାନ କରାଯାଉଛି। ସାଧାରଣତଃ ତିବ୍ବତ ଅଞ୍ଚଳରେ ଚାଇନାର ଦୁଇ ଡିଭିଜନ ସୈନ୍ୟ ରହିଥାନ୍ତି। କିନ୍ତୁ ଏବେ ସେମାନଙ୍କ ସଂଖ୍ୟା ଚାଇନା ବଢ଼ାଇବାରେ ଲାଗିଛି। ଫଳରେ ସୀମାରେ ଉତ୍ତେଜନା ବୃଦ୍ଧି ପାଉଥିବା କୁହାଯାଉଛି। ଏଭଳି ସ୍ଥିତି ସେପ୍ଟେମ୍ବର-ଅକ୍ଟୋବର ପର୍ଯ୍ୟନ୍ତ ଲାଗି ରହିବାର ଆଶଙ୍କା ରହିଛି। ଏହି ସମୟରେ ପ୍ରବଳ ଥଣ୍ଡାଯୋଗୁ ବରଫପାତ ହେଲେ ଦୁଇ ପକ୍ଷ ହୁଏତ ନିଜ ନିଜ ସୈନ୍ୟଙ୍କୁ ହଟାଇ ନେବେ ବୋଲି ଅନୁମାନ କରାଯାଉଛି।
