ଭୁବନେଶ୍ୱର,୧୫।୩ (ବ୍ୟୁରୋ): ବିଭିନ୍ନ ରେଳ ଷ୍ଟେଶନ ଦେଇ ବାହାର ରାଜ୍ୟରୁ ଲୋକେ ଓଡ଼ିଶାକୁ ପ୍ରବେଶ କରୁଛନ୍ତି। ହେଲେ କରୋନା ଆକ୍ରାନ୍ତଙ୍କୁ ଚିହ୍ନଟ ପାଇଁ ଏଯାଏ କୌଣସି ବି ରେଳ ଷ୍ଟେଶନରେ ସ୍କ୍ରିନିଂ କିମ୍ବା ଅନ୍ୟ କୌଣସି ବ୍ୟବସ୍ଥା ନାହିଁ। ଏପରିସ୍ଥଳେ ଶନିବାର ପୂର୍ବତଟ ରେଳପଥ କର୍ତ୍ତୃପକ୍ଷ ସଂକ୍ରମଣ ରୋକିବାକୁ ସଚେତନତା ସହ କେତେକ ପଦକ୍ଷେପ ଗ୍ରହଣ କରିଛନ୍ତି। ଭୁବନେଶ୍ୱର ରେଳ ଷ୍ଟେଶନ ନିର୍ଦ୍ଦେଶକ ଚିତ୍ତରଞ୍ଜନ ନାୟକ କହିଛନ୍ତି, ଷ୍ଟେଶନ ଓ ଟ୍ରେନ୍ରେ ଯାତ୍ରୀଙ୍କ ପାଇଁ କଟକଣା ଜାରି କରାଯାଇଛି। ଷ୍ଟେଶନ ପରିସର ଓ ପ୍ଲାଟଫର୍ମରେ ଛେପ ପକାଇବାକୁ ବାରଣ କରାଯାଇଛି। ଏପରି କି ଅନେକ ସମୟରେ ଯାତ୍ରୀମାନେ ମୋବାଇଲ୍ ଫୋନ୍ରେ କଥାହେବାବେଳେ ଇୟରଫୋନ୍ ତାରକୁ ପାଟିରେ କାମୁଡି ଧରିଥାନ୍ତି। ଏଥିଯୋଗୁ କରୋନା ଭାଇରସ ସଂକ୍ରମଣର ଆଶଙ୍କା ରହିଥିବାରୁ ଏଭଳି ନ କରିବାକୁ ଯାତ୍ରୀଙ୍କୁ ବାରଣ କରାଯାଇଛି। ଏହାସହ ଟ୍ରେନ୍ ଭିତରେ ଲାଗିଥିବା ହ୍ୟାଣ୍ଡ୍ ଷ୍ଟାଣ୍ଡକୁ ନ ଧରିବା, ଅନ୍ୟ ଯାତ୍ରୀଙ୍କୁ ନ ଛୁଇଁବା, ପାଖାପାଖି ନ ବସିବାକୁ ପରାମର୍ଶ ଦିଆଯାଇଛି। ସବୁଠୁ ବଡ଼ କଥା ହେଲା ଏସି ବଗିରେ ଯାତ୍ରା କରୁଥିବା ଯାତ୍ରୀଙ୍କୁ ମିଳୁଥିବା କେତେକ ସୁବିଧାକୁ ପରବର୍ତ୍ତନ କରାଯାଇଛି। ଏସିର ମାତ୍ରା ହ୍ରାସ କରାଯାଇଥିବାବେଳେ ଯାତ୍ରୀଙ୍କୁ ଦିଆଯାଉଥିବା କମ୍ବଳ ବନ୍ଦ କରିଦିଆଯାଇଛି। ଏସି ବଗିରେ ଲାଗିଥିବା ଡୋରସ୍କ୍ରିନ୍କୁ କାଢ଼ି ଦିଆଯାଇଛି। ଷ୍ଟେଶନ ଓ ଟ୍ରେନ୍ ଭିତରକୁ ସଫା ରଖାଯିବ। ଏହାସହ ଟ୍ରେନରେ ଥିବା ଟଏଲେଟକୁ ମଧ୍ୟ ନିୟମିତ ଅର୍ଥାତ୍ ପ୍ରତି ଷ୍ଟେଶନରେ ଭଲଭାବେ ସଫା କରାଯିବ ବୋଲି ସେ କହିଛନ୍ତି।
ଅନ୍ୟପକ୍ଷରେ ଯାତ୍ରୀଙ୍କୁ ସଚେତନ କରିବା ପାଇଁ ଟ୍ରେନ ପହଞ୍ଚତ୍ବା ଓ ଛାଡ଼ିବା ସମୟରେ ଡାକବାଜିରେ ପ୍ରତି ୫ ମିନିଟରେ ପ୍ରଚାର କରାଯାଉଛି। ଯାତ୍ରୀମାନେ କରୋନା ସଂକ୍ରମଣରୁ ରକ୍ଷା ପାଇବା ପାଇଁ କ’ଣ କରିବାକୁ ପଡ଼ିବ ସେଥିପ୍ରତି ସଚେତନ କରାଯାଉଛି। ଏହାସହ ରେଲ୍ଓ୍ବେ କର୍ମଚାରୀମାନେ ଷ୍ଟେଶନରେ ଯାତ୍ରୀଙ୍କୁ ସଚେତନତା ବାର୍ତ୍ତା ଥିବା ଲିଫ୍ଲେଟ୍ ପ୍ରଦାନ କରୁଛନ୍ତି। ପ୍ରତିଦିନ ଷ୍ଟେଶନ ଦେଇ ହଜାର ହଜାର ଲୋକ ଯିବାଆସିବା କରୁଥିବାରୁ ଓ ଏଠାରେ ସ୍କ୍ରିନିଂ ବ୍ୟବସ୍ଥା ନ ଥିବାରୁ କରୋନା ସଂକ୍ରମିତଙ୍କୁ ଚିହ୍ନଟ କରିବା କଷ୍ଟକର। ତେଣୁ ସଚେତନତା ଉପରେ ଗୁରୁତ୍ୱ ଦିଆଯାଉଥିବା ଷ୍ଟେଶନ ନିର୍ଦ୍ଦେଶକ ଚିତ୍ତରଞ୍ଜନ ନାୟକ କହିଛନ୍ତି।
