କେନ୍ଦୁଝର,୧।୬( ସ୍ବ.ପ୍ର.): ଘନ ଘନ ବିଦ୍ୟୁତ୍ କାଟ ଯୋଗୁ ଶନିବାର କେନ୍ଦୁଝର ଜିଲା ମୁଖ୍ୟ ଡାକ୍ତରଖାନାରେ ରୋଗୀ ଚିକିତ୍ସା ବାଧାପ୍ରାପ୍ତ ହୋଇଛି। ମେଡିକାଲରେ ଜେନେରେଟର ବ୍ୟବସ୍ଥା ଥିଲେ ସୁଦ୍ଧା ଆବଶ୍ୟକତା ପୂରଣ ହୋଇପାରୁନାହିଁ। ଫଳରେ ଗରମରେ ରୋଗୀଙ୍କୁ ହନ୍ତସନ୍ତ ହେବାକୁ ପଡୁଛି। ବିଦ୍ୟୁତ୍ ଅଭାବରୁ ଏକ୍ସ-ରେ ମେଶିନ ଚାଲୁ ନ ଥିବାରୁ ରୋଗୀଙ୍କୁ ବହୁ ସମୟ ଧରି ଅପେକ୍ଷା କରିବାକୁ ପଡୁଛି। ସେହିପରି ଅନ୍ୟାନ୍ୟ ପରୀକ୍ଷା ନିରୀକ୍ଷା କାମ ହୋଇପାରୁନାହିଁ। ଚିକିତ୍ସା ପାଇଁ ଆସିଥିବା ରୋଗୀ ବହୁ ଅସୁବିଧାର ସମ୍ମୁଖୀନ ହେଉଥିବା ବେଳେ ଡାକ୍ତର ଓ ଡାକ୍ତରଖାନା କର୍ମଚାରୀମାନେ ଚିକିତ୍ସା କରିବାରେ ଅସୁବିଧାର ସମ୍ମୁଖୀନ ହେଉଛନ୍ତି।
ବିଦ୍ୟୁତ୍ ଅଭାବରୁ ପାଣିପମ୍ପ ଚାଲୁ ନ ଥିବାରୁ ପାଣି ସମସ୍ୟା ଦେଖାଦେଇଛି। ପାଣି ଅଭାବରୁ ରକ୍ତ, ମଳ, ମୂତ୍ର ଆଦି ପରୀକ୍ଷା ହୋଇପାରୁ ନ ଥିବା ବେଳେ ଦାନ୍ତ ବିଭାଗରେ କାମ ବାଧାପ୍ରାପ୍ତ ହୋଇଛି। ଅସ୍ଥିଶଲ୍ୟ ବିଭାଗ ଓ୍ବାର୍ଡରେ ଆବଶ୍ୟକ ସଂଖ୍ୟକ ଫ୍ୟାନ୍ ନାହିଁ । ଏଣୁ ରୋଗୀ ଅସୁବିଧାରେ ରହୁଛନ୍ତି। ସେହିପରି ଆବଶ୍ୟକ କେମିକାଲ ନ ଥିବାରୁ କିଡ୍ନୀ ରୋଗୀଙ୍କ ଚିକିତ୍ସାରେ ବାଧା ସୃଷ୍ଟି ହେଉଛି। ରୋଗୀଙ୍କ ସମ୍ପର୍କୀୟମାନେ ଏହାର ତୁରନ୍ତ ସମାଧାନ ଦାବି କରିଛନ୍ତି। ତେବେ ଏ ନେଇ ପଚରାଯିବାରେ ସମାଧାନ ପାଇଁ ପଦକ୍ଷେପ ନିଆଯାଉଛି ବୋଲି ଏଡିଏମ୍ଓ ଡା. ଗୁରୁପ୍ରସାଦ ମିଶ୍ର କହିଛନ୍ତି।
