ଲଣ୍ଡନ,୨୩।୧୨: ଫୁସଫୁସ କର୍କଟ ରୋଗରେ ପ୍ରଥମ ପତ୍ନୀଙ୍କ ମୃତ୍ୟୁର ପ୍ରାୟ ସାତ ବର୍ଷ ପରେ, ପୂର୍ବତନ ଇଂଲଣ୍ଡ ଅଧିନାୟକ ଆଣ୍ଡ୍ରୁ ଷ୍ଟ୍ରସ ପୁନଃବିବାହ କରିଛନ୍ତି। ଷ୍ଟ୍ରସ ତାଙ୍କ ପ୍ରେମିକାଙ୍କୁ ବିବାହ କରିଥିଲେ, ଯିଏ ତାଙ୍କଠାରୁ ୧୮ ବର୍ଷ ସାନ। ଷ୍ଟ୍ରସଙ୍କ ଦ୍ୱିତୀୟ ପତ୍ନୀ ଆଣ୍ଟୋନିଆ ଲିନାୟସ-ପିଟ ୩୦ ବର୍ଷ ବୟସ୍କା। ଷ୍ଟ୍ରସ ଏବଂ ଆଣ୍ଟୋନିଆ ଡିସେମ୍ବର ୧୭, ୨୦୨୫ରେ ଐତିହାସିକ ଦକ୍ଷିଣ ଆଫ୍ରିକୀୟ ସହର ଫ୍ରାନ୍ସହୋକରେ ଏକ ବ୍ୟକ୍ତିଗତ ଉତ୍ସବରେ ବିବାହ କରିଥିଲେ।
ଷ୍ଟ୍ରସ ଏବଂ ଆଣ୍ଟୋନିଆଙ୍କ ଦୁଇ ପୁଅ ସାମୁଏଲ ଏବଂ ଲୁକା ମଧ୍ୟ ବିବାହରେ ଉପସ୍ଥିତ ଥିଲେ। ଷ୍ଟ୍ରସଙ୍କ ପ୍ରଥମ ପତ୍ନୀ ରୁଥ ଡିସେମ୍ବର ୨୯, ୨୦୧୮ରେ ଫୁସଫୁସ କର୍କଟ ରୋଗରେ ମୃତ୍ୟୁବରଣ କରିଥିଲେ। ଷ୍ଟ୍ରସ ତାଙ୍କ ପ୍ରଥମ ପତ୍ନୀଙ୍କ ମୃତ୍ୟୁ ପରେ ଦୀର୍ଘ ସମୟ ପର୍ଯ୍ୟନ୍ତ ଅବିବାହିତ ରହିଥିଲେ, କିନ୍ତୁ ସେ ଗତ ଦୁଇ ବର୍ଷ ଧରି ଆଣ୍ଟୋନିଆଙ୍କୁ ଡେଟ କରୁଥିଲେ ଏବଂ ଶେଷରେ ସେମାନେ ବିବାହ କରିଥିଲେ। ବିବାହକୁ ଅତ୍ୟନ୍ତ ଗୋପନୀୟ ରଖାଯାଇଥିଲା, କେବଳ ପରିବାର ସଦସ୍ୟମାନେ ଉପସ୍ଥିତ ଥିଲେ।
ଆଣ୍ଟୋନିଆ ଲିନାୟସ-ପିଟ ବର୍ତ୍ତମାନ ଏକ ଆର୍ଟ ଆହଭାଇଜରୀ ବା କଳା ପରାମର୍ଶଦାତା କମ୍ପାନୀର ନିର୍ଦ୍ଦେଶକ। ପୂର୍ବରୁ, ସେ ଜଣେ ପିଆର କାର୍ଯ୍ୟନିର୍ବାହୀ ଥିଲେ। ଆଣ୍ଟୋନିଆ ହଂକଂରେ ବଢ଼ିଥିଲେ ଏବଂ ୱିଲ୍ଟଶାୟାରର ଏକ ପ୍ରତିଷ୍ଠିତ ସ୍କୁଲରେ ପଢ଼ିଥିଲେ। ଆଣ୍ଟୋନିଆ ଏବଂ ଷ୍ଟ୍ରସ ଦୁଇ ବର୍ଷ ପୂର୍ବେ ଏକ କାର୍ଯ୍ୟକ୍ରମରେ ସାକ୍ଷାତ କରିଥିଲେ ଏବଂ ଡେଟିଂ ଆରମ୍ଭ କରିଥିଲେ।
ପୂର୍ବତନ ଇଂଲିଶ ଅଧିନାୟକ ଆଣ୍ଡ୍ରୁ ଷ୍ଟ୍ରସ ତାଙ୍କ ପ୍ରଥମ ପତ୍ନୀଙ୍କ ନାମରେ ଏକ ଫାଉଣ୍ଡେସନ ଚଲାନ୍ତି। ୨୦୧୯ ମସିହାରେ, ଷ୍ଟ୍ରସ ରୁଥ ଷ୍ଟ୍ରସ ଫାଉଣ୍ଡେସନ ପ୍ରତିଷ୍ଠା କରିଥିଲେ। ଏହି ଫାଉଣ୍ଡେସନ କର୍କଟ ରୋଗରେ ମାତାପିତାଙ୍କୁ ହରାଇଥିବା ପରିବାରକୁ ସହାୟତା କରେ। ଏହା ଧୂମପାନ ନ କରୁଥିବା ଲୋକଙ୍କ ଫୁସଫୁସ କର୍କଟ ଉପରେ ଗବେଷଣା ପାଇଁ ପାଣ୍ଠି ମଧ୍ୟ ସଂଗ୍ରହ କରେ।
Dharitri – The Largest & Most Trusted Odia Daily
