ଗୋପାଳପୁର, ୧୬ା୫(ନବୀନ ରାଜ ଆଚାରୀ)- ବ୍ରହ୍ମପୁର ପୋଲିସ ଜିଲା ଗତ କିଛି ମାସ ହେଲା ଅଶାନ୍ତ ହୋଇପଡିଛି। ପ୍ରତ୍ୟହ କିଛି ନା କିଛି ଅପରାଧମୂଳକ ଘଟଣା ଘଟି ଆଇନଶୃଙ୍ଖଳା ବିପର୍ଯ୍ୟସ୍ତ ହୋଇପଡୁଥିବା ଅଭିଯୋଗ ହେଉଛି। ଶନିବାର ଗୋପାଳପୁର ଥାନା ଅଞ୍ଚଳରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି l ଜଣେ ଯୁବକଙ୍କୁ ଗୋପାଳପୁର ଓଭରବ୍ରିଜ୍ ଉପରୁ ଦୁର୍ବୃତ୍ତମାନେ ଠେଲି ଦେଇ ଘଟଣାସ୍ଥଳରୁ ଫେରାର ହୋଇଯାଇଛନ୍ତି। ଏଥିରେ ସମ୍ପୃକ୍ତ ଯୁବକ ଜଣକ ଗୁରୁତର ଆହତ ହୋଇଥିବା ଜଣାପଡ଼ିଛି l ସେ ହେଲେ ବ୍ରହ୍ମପୁର ମହାନଗର ଧାନମେରା ସାହିର ଶ୍ୟାମ ବେହେରା (୨୦)। ଦୁର୍ବୃତ୍ତମାନଙ୍କ ସହ ବଚସାରୁ ଏପରି ଘଟଣା ଘଟିଥିବା ଜଣାପଡିଛି।
ଖବରରୁ ପ୍ରକାଶ, ଏକ ସ୍କୁଟି (ଓଡ଼ି୦୭ଏବି-୭୮୮୫) ଯୋଗେ ଧାନମେରା ସାହିର ଶ୍ୟାମ ଓ ତାଙ୍କ ସାଙ୍ଗ ମିଶି ଶନିବାର ସକାଳ ସାଢେ ୬ଟାରେ ଗୋପାଳପୁର ଅଭିମୁଖେ ଯାଉଥିଲେ। ଗୋପାଳପୁର ଓଭରବ୍ରିଜ୍ ନିକଟରେ ବାଇକ୍ରେ ୨ ଜଣ ଦୁର୍ବୃତ୍ତ ଆସି ହଠାତ ଶ୍ୟାମଙ୍କ ଗାଡ଼ିକୁ ଅଟକାଇ ଥିଲେ l ସେମାନଙ୍କ ମଧ୍ୟରେ କୌଣସି କଥାକୁ ନେଇ ବଚସା ହୋଇଥିଲା। ଶ୍ୟାମଙ୍କ ସାଙ୍ଗକୁ ମାର ପିଟ କରି ସେମାନେ ଉଭୟଙ୍କୁ ଘଟଣା ସ୍ଥଳରୁ ଚାଲିଯିବା ପାଇଁ କହିଥିଲେ। ପରେ ଆଉ ୨ ଜଣ ଏହି ଦୁଇ ଦୁର୍ବୃତ୍ତଙ୍କ ସହ ମିଶିଥିଲେ। ସେମାନେ ଶ୍ୟାମଙ୍କଠାରୁ ଦୁଇଟି ମୋବାଇଲ ଫୋନ, ୧୫ ଶହ ଟଙ୍କା ଓ ରୁପା ଚେନ୍ ଲୁଟି ନେଇ ସମ୍ପୃକ୍ତ ୪ ଦୁର୍ବୃତ୍ତ ଶ୍ୟାମଙ୍କୁ ଓଭରବ୍ରିଜ୍ ଉପରୁ ଜୋରଜବରଦସ୍ତ ତଳକୁ ଠେଲି ଦେଇଥିଲେ। ପରେ ଘଟଣାସ୍ଥଳରୁ ଫେରାର ହୋଇଯାଇଥିଲେ। ସ୍ଥାନୀୟ ଲୋକେ ଶ୍ୟାମଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଆମ୍ବୁଲାନ୍ସ ଯୋଗେ ବ୍ରହ୍ମପୁର ବଡ଼ ମେଡିକାଲ ପଠାଇଥିଲେ। ସେଠାରୁ ତାଙ୍କୁ ଏକ ଘରୋଇ ହସ୍ପିଟାଲକୁ ପଠାଯାଇଛି। ଶ୍ୟାମଙ୍କ ଗୋଡ ହାତ ଭାଙ୍ଗିଯିବା ସହ ମୁଣ୍ଡରେ ଗଭୀର ଆଘାତ ଲାଗିଛି। ଏନେଇ ଶ୍ୟାମଙ୍କ ଭାଇ ଗୋପାଳପୁର ଥାନାରେ ଲିଖିତ ଅଭିଯୋଗ କରିଥିଲେ। ଏହାକୁ ଭିତ୍ତିକରି ପୋଲିସ ନଂ. ୨୭୦/୨୬ରେ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି । ଘଟଣା ସ୍ଥଳ ଓ ଆଖପାଖରେ ଲାଗିଥିବା ସିସି କ୍ୟାମେରା ଯାଞ୍ଚ କରି ପୋଲିସ ସନ୍ଦେହରେ ଦୁଇ ଜଣଙ୍କୁ ଉଠାଇଆଣି ପଚରାଉଚରା କରୁଛି। ତେବେ ଏପରି ଘଟଣା ପୂର୍ବ ଶତ୍ରୁତାକୁ କେନ୍ଦ୍ର କରି ହୋଇଥିବା ପୋଲିସ ଜାଣିବାକୁ ପାଇଛି l ପୋଲିସ ଶ୍ୟାମଙ୍କ ସ୍କୁଟି ନିଜ ହେପାଜତକୁ ନେଇ ରଖିଛି l ଘଟଣା ସମ୍ପର୍କରେ ଗୋପାଳପୁର ଥାନା ଅଧିକାରୀ ସତ୍ୟ ରଞ୍ଜନ ଲେଙ୍କାଙ୍କୁ ପଚାରିବା ଲାଗି ଯୋଗାଯୋଗ କରାଯାଇଥିଲେ ମଧ୍ୟ ସେ ଫୋନ ରିସିଭ କରି ନ ଥିଲେ l ଅନ୍ୟପକ୍ଷରେ ଏ ସମ୍ପର୍କରେ ଏସ୍ପି ଶ୍ରବଣା. ବିବେକ ଏମ୍ ଜାଣିବା ପରେ ଘଟଣାସ୍ଥଳ ପରିଦର୍ଶନ କରିଛନ୍ତି। ଡାକ୍ତରଖାନାରେ ଶ୍ୟାମଙ୍କୁ ଭେଟି ପଚାରି ବୁଝିଛନ୍ତି।
