ଖଜୁରୀପଡ଼ା, ୨୧।୩ (ବିଦୁର ବେହେରା): ଆସିଛି ଫଗୁଣ ମାସ ସମସ୍ତଙ୍କ ମନରେ ଆନନ୍ଦ ଉଲ୍ଲାସ ଦେଖାଯାଉଛି। ଏହି ମାସରେ ମହୁଲ ଗଛରେ ମହୁଲ ଫୁଲ ହୋଇ ଝଡି ପଡେ। ଏହି ମହୁଲ ଫୁଲ ସଂଗ୍ରହ କରିବା ପାଇଁ ଆଦିବାସୀ ମନରେ ଆଗ୍ରହ ଦେଖା ଦେଇଛି।
କନ୍ଧମାଳ ଜିଲା ବନ ପାହାଡ ଘେରରେ ଅବସ୍ଥିତ ଥିବାରୁ ପ୍ରତ୍ୟେକ ବ୍ଲକରେ ବସବାସ କରୁଥିବା ଅଧିବାସୀମାନେ ମହୁଲ ଫୁଲ ସଂଗ୍ରହ କରିବାରେ ଏବେ ବ୍ୟସ୍ତ ଥିବା ଦେଖିବାକୁ ମିଳିଛି। ଏହି ପରିପ୍ରେକ୍ଷୀରେ ଖଜୁରୀପଡ଼ା ବ୍ଳକ ଅଞ୍ଚଳରେ ବସବାସ କରୁଥିବା ଲୋକେ ମଧ୍ୟ ମହୁଲ ଫୁଲ ସଂଗ୍ରହ କରୁଛନ୍ତି। ଗ୍ରାମାଞ୍ଚଳରେ ବସବାସ କରୁଥିବା ଲୋକମାନଙ୍କ ମୁଖ୍ୟ ରୋଜଗାର ପନ୍ଥା ଜଙ୍ଗଲଜାତ ଦ୍ରବ୍ୟ ଓ ଚାଷ । ଜଙ୍ଗଲଜାତ ଦ୍ରବ୍ୟ ମଧ୍ୟରୁ ରୋଜଗାରର ମହୁଲ ଫୁଲ ହେଉଛି ଏକ ଉତ୍ସ I କନ୍ଧମାଳ ଜିଲାରେ ପ୍ରଚୁର ମହୁଲ ଗଛ ରହିଛି। ପ୍ରତିବର୍ଷ ମାର୍ଚ୍ଚ ଏବଂ ଏପ୍ରିଲ ମାସରେ ମହୁଲ ଗଛଗୁଡିକରେ ଫୁଲ ଫୁଟି ତଳେ ଝଡି ପଡେ। ଏହି ମହୁଲ ଫୁଲ ଗୋଟାଇବା ପାଇଁ ଛୋଟରୁ ବଡ ପର୍ଯ୍ୟନ୍ତ ସମସ୍ତେ ଏଥିରେ ସାମିଲ ହୋଇଥାନ୍ତି। ଗାଁ ଗାଁରେ ମହୁଲ ଫୁଲ ଗୋଟାଇବା ଦୃଶ୍ୟ ଦେଖିଲେ ଯେମିତି ଲାଗେ ତାଙ୍କ ମାନଙ୍କ ମଧ୍ୟରେ ମହୁଲ ଫୁଲ ଗୋଟାଇବାରେ ଏକ ପ୍ରକାର ପ୍ରତିଯୋଗିତା ଚାଲିଛି। ସକାଳୁ ସକାଳୁ ଗ୍ରାମାଞ୍ଚଳର ଲୋକ ମାନେ ନିକଟରେ ଥିବା ଜଂଗଲଗୁଡିକରେ ମହୁଲ ଫୁଲ ଗୋଟାଇବା କାର୍ଯ୍ୟରେ ବ୍ୟସ୍ତ ରହୁଛନ୍ତି।
ଆଦିବାସୀ ସଂପ୍ରଦାୟର ସହିତ ଅନ୍ୟ ସମ୍ପ୍ରଦାୟର ମହିଳା,ପୁରୁଷ ଏବଂ ପିଲାମାନେ ମଧ୍ୟ ହାତରେ ଭୁଗା, କୁଲା,ଝୁଡି , ଚାଙ୍ଗୁଡି ଧରି ଫୁଲ ସଂଗ୍ରହ କରନ୍ତି । ମହୁଲ ଫୁଲ ସଂଗ୍ରହ ଏଠିକାର ଲୋକମାନଙ୍କ ମନରେ ଖୁସି ଦେଉଥିବା ସହିତ ଏହାକୁ ଖାଦ୍ୟ ରୂପେ ମଧ୍ୟ ବ୍ୟବହାର କରନ୍ତି।ସେଥିପାଇଁ ଏହି ଅଂଚଳର ଲୋକେ ପ୍ରତିବର୍ଷ ଏହି ସମୟକୁ ଅପେକ୍ଷା କରି ରହିଥାନ୍ତି। ଜଙ୍ଗଲ ଭିତରେ ହେଉ ବା ଗାଁ ପାଖରେ ଥିବା ମହୁଲ ଗଛଗୁଡିକରୁ ଫୁଲ ସଂଗ୍ରହ କରି ବଜାରରେ ବିକ୍ରି କରିଥାନ୍ତି। ରାତି ପାହିବା ମାତ୍ରେ ପିଲା ଠାରୁ ବୁଢା ଯାଏ ସମସ୍ତେ ହାତରେ ଚାଙ୍ଗୁଡି ଧରି ଗୋଟିଏ ଗଛରୁ ଅନ୍ୟ ଗଛକୁ ଯାଇ ମହୁଲ ଫୁଲ ସଂଗ୍ରହ କରନ୍ତି। ସକାଳ ଠାରୁ ଆରମ୍ଭ କରି ସନ୍ଧ୍ୟା ପର୍ଯ୍ୟନ୍ତ ମହୁଲ ଗଛ ମୂଳରେ ଜଗି ରହି ମହୁଲ ଫୁଲକୁ ସଂଗ୍ରହ କରନ୍ତି। ଏଥିପାଇଁ ଦିନ ତମାମ ଗଛ ପାଖରେ ଜଗି ରହିବାକୁ ପଡ଼େ। ନ ହେଲେ ଏହି ମହୁଲ ଫୁଲ କୁ ସକାଳ ହୋଇଗଲେ ଛେଳି ଓ ଗାଈ ଖାଇ ଦିଅନ୍ତି ।ଯିଏ ଯେତେ ପାରିଲା ଫୁଲ ଗୋଟାଇ ଆଣନ୍ତି।
ମହୁଲ ଫୁଲ ଅର୍ଥକାରୀ ଜଂଗଲଜାତ ଦ୍ରବ୍ୟ ହୋଇଥିବାରୁ ଏଥିରୁ ବେଶ ଦିପଇସା ରୋଜଗାର କରନ୍ତି ଏଠିକାର ଲୋକମାନେ। ବହୁ ସମୟରେ ଭୋର ସକାଳୁ ମହୁଲ ଫୁଲ ଗୋଟାଇବାକୁ ଯାଉଥିବା ଲୋକେ ଭାଲୁ ହାବୁଡରେ ମଧ୍ୟ ପଡନ୍ତି।ତଥାପି ଲୋକେ ଏହି ଅଭ୍ୟାସକୁ ବନ୍ଦ କରନ୍ତି ନାହିଁ। ଭାଲୁର ମଧ୍ୟ ଏହି ଫୁଲ ପ୍ରତି ଆଗ୍ରହ ରହିଥାଏ।ମହୁଲ ଫୁଲର ମିଠା ବାସ୍ନା ତାକୁ ଗଛ ନିକଟକୁ ଟାଣି ଆଣିଥାଏ। ଏବେ ମହୁଲ ଫୁଲ ଏକ ବ୍ୟବସାୟର ପରିଣତ ହୋଇଛି। ବ୍ୟବସାୟୀମାନେ ଗୋଟାଳିଙ୍କଠାରୁ ଏହା ଶସ୍ତାରେ କିଣି ନେଇ ବାହାରେ ଏହାକୁ ଚଢା ଦରରେ ବିକ୍ରି କରିଥାନ୍ତି।ଏ ଥିରେ ବ୍ୟବସାୟୀମାନେ ଲାଭବାନ ହେଉଥିବାବେଳେ ମହୁଲ ଫୁଲ ସଂଗ୍ରହକାରୀମାନେ କ୍ଷତି ହୁଅନ୍ତି।
ମହୁଲ ଫୁଲକୁ ସଂଗ୍ରହ କରିବା ପରେ ବଡ଼ ବଡ଼ ପଥର ହେଉ ଅବା ଘର ଟିଣ ଉପରେ ଓ ଘର ବାହାରେ ଶୁଖାଇ ଥାଆନ୍ତି। ଶୁଖାଇବାର ୭ରୁ ୮ ଦିନ ପରେ ଏହାକୁ ସଫା କରି ବ୍ୟବସାୟଙ୍କ ପାଖକୁ ବିକ୍ରି ପାଇଁ ନିଆଯାଇଥାଏ। ବ୍ୟବସାୟୀ କିଲୋ ପିଛା ୩୦ ରୁ ୪୦ ଟଙ୍କା ମଧ୍ୟରେ ମହୁଲ ଫୁଲ ରଖନ୍ତି। ଦିନକୁ ଜଣେ ଲୋକ ୩ରୁ ୪ କିଲୋ ମହୁଲ ଫୁଲ ସଂଗ୍ରହ କରୁଥିବା ବେଳେ ପରିଶ୍ରମ ଅନୁସାରେ ସଠିକ ପ୍ରାପ୍ୟ ମିଳେ ନାହିଁ। ଏଣୁ ମହୁଲ କିଲୋ ପ୍ରତି ୭୦ରୁ ୮୦ ଟଙ୍କା ହିସାବରେ ସରକାରୀ ମୂଲ୍ୟ ଧାର୍ଯ୍ୟ ହେଲେ କିଛି ପ୍ରାପ୍ୟ ମିଳି ପାରନ୍ତା ବୋଲି କବି କହଁର,ଦେବକୀ କହଁର ପ୍ରମୁଖ କହିଛନ୍ତି।
ତେବେ ପ୍ରତିବର୍ଷ ଆଦିବାସୀ ପରିବାର ଏହି ମହୁଲ ଫୁଲ ଗୋଟାଇ ୫ ହଜାରରୁ ୧୦ ହଜାର ଟଂକା ପର୍ଯ୍ୟନ୍ତ ରୋଜଗାର କରନ୍ତି । ଗାଈ ଏହି ମହୁଲ ଫୁଲ ଖାଇବା ଦ୍ବାରା ବହୁତ କ୍ଷୀର ଦିଏ ବୋଲି ଲୋକେ ବିଶ୍ୱାସ କରନ୍ତି । ତେଣୁ ବଳକା ମହୁଲ ଫୁଲକୁ ବିକ୍ରି ନକରି ଗାଈମାନଙ୍କୁ ଖାଇବାକୁ ଦିଆଯାଏ।ପ୍ରତ୍ୟେକ ଗାଁରେ ଏବେ ମହୁଲ ଫୁଲ ଆଦିବାସୀ ଲୋକଙ୍କ ଦାଣ୍ଡରେ ଶୁଖୁଥିବା ଦେଖିବାକୁ ମିଳେ।ତେବେ ବିଶେଷକରି ମହୁଲରୁ ମଦ ମଧ୍ୟ ତିଆରି ହୁଏ। କନ୍ଧମାଳ ଜିଲା ସଂସ୍କୃତି ପରମ୍ପରା ଅନୁଯାୟୀ ମହୁଲ ମଦ ପୂଜା ବିଧି କାର୍ଯ୍ୟରେ ଆବଶ୍ୟକ ପଡେ। ବେଳେବେଳେ ଏହାକୁ ଲୋକେ ପିଅନ୍ତି ଏବଂ ଚାଷ ବାସ କାମରେ ମଶଗୁଲ ହୋଇ କାମ କାର୍ଯ୍ୟ କରନ୍ତି। ମହୁଲ ଗଛରୁ ମହୁଲ ଫୁଲ ସଂଗ୍ରହ ପରେ ଏହି ଗଛରୁ ଯେଉଁ ଫଳ ସଂଗ୍ରହ ହୁଏ ତାକୁ ଗରା ବୋଲି ଲୋକେ କୁହନ୍ତି ।ଏହି ଗରାକୁ ଶୁଖାଇ ଏଥିରୁ ତେଲ ପ୍ରସ୍ତୁତ କରାଯାଏ । ସେହି ତେଲରେ ଗ୍ରାମାଞ୍ଚଳ ଲୋକେ ରୋଷେଇ ମଧ୍ୟ କରନ୍ତି। ତେଣୁ ମହୁଲ ଗଛ ଲୋକଙ୍କୁ ଏକ ପ୍ରକାର ରୋଜଗାର ଦିଏ ବୋଲି ଲୋକେ କୁହନ୍ତି।
