ସମ୍ବଲପୁର,୨୧ା୩(ପ୍ରମୋଦ ବହିଦାର): ସମ୍ବଲପୁର ମହାନଗରବାସୀଙ୍କୁ ବିଶୁଦ୍ଧ ପାନୀୟ ଜଳ ଯୋଗାଣ ପାଇଁ ୯ଟି ଜଳ ବିଶୋଧନାଗାର ରହିଛି। ପାନୀୟ ଜଳ ବିତରଣକାରୀ ସଂସ୍ଥା ୱାଟ୍କୋ ସମ୍ପୂର୍ଣ୍ଣ ସମ୍ବଲପୁର ମହାନଗର ଅଞ୍ଚଳରେ ପାନୀୟ ଜଳ ଯୋଗାଣ ଦାୟିତ୍ୱରେ ରହିଛି। ସମଗ୍ର ସହରରେ ପାନୀୟ ଜଳ ଯୋଗାଣକୁ ସୁବ୍ୟବସ୍ଥିତ କରିବା ପାଇଁ ସହରର ସମସ୍ତ ଭୂତଳ ପୁରୁଣା ପାଇପ୍ ବଳରେ ନୂତନ ପାଇପ୍ ବିଛା କାର୍ଯ୍ୟ ଆଗେଇ ଚାଲିଛି। କେତେକ ସ୍ଥାନକୁ ଛାଡ଼ିଦେଲେ ସହରର ପ୍ରାୟ ସମସ୍ତ ଅଞ୍ଚଳକୁ ପାଇପ୍ ଯୋଗେ ପାନୀୟ ଜଳ ଯୋଗାଣ ଜାରିରହିଛି। ମହାନଦୀ ଓ ହୀରାକୁଦ ଜଳଭଣ୍ଡାରରୁ ଜଳ ଉତ୍ତୋଳନକରି ସହରର ବିଭିନ୍ନ ସ୍ଥାନରେ ଥିବା ୯ଟି ବିଶୋଧନାଗାରରୁ ପ୍ରତିଦିନ ସହରବାସୀଙ୍କୁ ବିଶୁଦ୍ଧ ପାନୀୟ ଜଳ ଯୋଗାଣ ହେଉଛି। ୱାଟ୍କୋ ପକ୍ଷରୁ ମିଳିଥିବା ତଥ୍ୟ ଅନୁସାରେ, ମହାନଗର ନିଗମ ଅଞ୍ଚଳରେ ବସବାସ କରୁଥିବା ପାଖାପାଖି ୭୫ ହଜାର ୪୧୨ଟି ଗୃହକୁ ପାଇପ୍ ସଂଯୋଗ କରାଯାଇ ବିଶୁଦ୍ଧ ପାନୀୟ ଜଳ ଯୋଗାଣର ବ୍ୟବସ୍ଥା କରାଯାଇଛି। ଏଥିପାଇଁ ସହର ମଧ୍ୟରେ ପ୍ରାୟ ୧୧୮୪.୪୨ କି.ମି. ପାଇପ୍ ଲାଇନ ବିଛାଯାଇଛି। ସମ୍ବଲପୁର ମହାନଗର ଅଞ୍ଚଳରେ ପ୍ରତ୍ୟହ ୭୨.୬୮ ମେଗା ଲିଟର ପାନୀୟ ଜଳର ଆବଶ୍ୟକତା ରହିଥିବା ବେଳେ ଆବଶ୍ୟକତାଠାରୁ ଅଧିକ ୭୮.୮୨ ମେଗା ଲିଟର ଜଳ ଯୋଗାଣ କରାଯାଉଛି। ଏହି ଆବଶ୍ୟକତା ପୂରଣ ପାଇଁ ସହରର ବିଭିନ୍ନ ସ୍ଥାନରେ ଦୈନିକ ୮୧.୪୫ ମେଗା ଲିଟର ଜଳ ବିଶୋଧନ କ୍ଷମତା ବିଶିଷ୍ଟ ୯ଟି ଜଳ ବିଶୋଧନାଗାର ସ୍ଥାପନ କରାଯାଇଛି। ବିଭିନ୍ନ ସ୍ଥାନରୁ ଜଳ ଉତ୍ତୋଳନ ପାଇଁ ବିଭିନ୍ନ ସ୍ଥାନରେ ୮୫୦୪ ଅଶ୍ୱଶକ୍ତି କ୍ଷମତା ସମ୍ପନ୍ନ ୩୦୮ଟି ବୃହତ୍ ପାଣିପମ୍ପ ଖଞ୍ଜା ଯାଇଛି। ବିଶୋଧିତ ଜଳ ସଂରକ୍ଷଣ ଓ ବିତରଣ ପାଇଁ ସହରର ବିଭିନ୍ନ ସ୍ଥାନରେ ୧୬.୪୫ ମେଗା ଲିଟର ଜଳଧାରଣ କ୍ଷମତା ବିଶିଷ୍ଟ ୪୧ଟି ଉଚ୍ଚ ପାଣିଟାଙ୍କି ଓ ୩୬.୦୨ ମେଗା ଲିଟର ଜଳଧାରଣ କ୍ଷମତା ବିଶିଷ୍ଟ ୭୫ଟି ଭୂତଳ ଜଳାଶୟ ରହିଛି। ଯାହା ଚଳିତ ଗ୍ରୀଷ୍ମରେ ସମ୍ବଲପୁର ମହାନଗରବାସୀଙ୍କ ଜଳକଷ୍ଟ ଦୂର କରିବାରେ ସହାୟକ ହେବ ବୋଲି କୁହାଯାଇଛି। ସମ୍ପୃକ୍ତ ବିଭାଗ ପକ୍ଷରୁ କୁହାଯାଇଛି ଯେ, ବର୍ତ୍ତମାନ ସହରର ବିଭିନ୍ନ ସ୍ଥାନରେ ନୂତନ ପାଇପ୍ ଲାଇନ୍ ବିଛା ସହିତ ପୁରୁଣା ପାଇପ୍ ପରିବର୍ତ୍ତନ ପ୍ରକ୍ରିୟା ମଧ୍ୟ ଜାରି ରହିଛି। ତେଣୁ ସହରର କେତେକ ସ୍ଥାନକୁ ପାଇପ୍ ଜଳ ଠିକ୍ ଭାବେ ପହଞ୍ଚତ୍ପାରୁ ନାହିଁ। ଏଥିପାଇଁ ବ୍ୟବସ୍ଥା ସ୍ବରୂପ ଉକ୍ତ ଅଞ୍ଚଳକୁ ଟ୍ୟାଙ୍କର ଯୋଗେ ପାନୀୟ ଜଳ ଯୋଗାଣକୁ ନିଶ୍ଚିତ କରାଯାଇଛି ବୋଲି ଏସ୍ଡିଓ ଗୁରଲସନ ସାହୁ କହିଛନ୍ତି।
