ବ୍ରହ୍ମପୁର,୧୪।୧(ସୁବାସ ଚନ୍ଦ୍ର ପାଢ଼ୀ)ମହାରାଜା କୃଷ୍ଣଚନ୍ଦ୍ର ଗଜପତି (ଏମ୍କେସିଜି) ମେଡିକାଲ ପରିସରରେ ଥିବା ରକ୍ତଭଣ୍ଡାରରେ ରକ୍ତର ଅଭାବ ପରିଲକ୍ଷିତ ହୋଇଛି। ସ୍ଥିତି ଏଭଳି ହୋଇଛି ଯେ ନେଗେଟିଭ ଗ୍ରୁପ ପୂରା ଖାଲି ହୋଇଯାଇଛି। ଫଳରେ ଜରୁରୀ ପରିସ୍ଥିତିରେ ରୋଗୀ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଶୀତ ଦିନରେ ଏଭଳି ରକ୍ତ ଅଭାବ ଲୋକଙ୍କୁ ଚକିତ କରିଛି। ରକ୍ତଭଣ୍ଡାରରେ ମୋଟ ରକ୍ତ ୟୁନିଟ ସଂଖ୍ୟା ୧୦୦ ମଧ୍ୟରେ ସୀମିତ ରହିଛି। ଫଳରେ ରୋଗୀ ଠିକ୍ ସମୟରେ ରକ୍ତ ନ ପାଇ ହନ୍ତସନ୍ତ ହେଉଛନ୍ତି। ପୂର୍ବରୁ ଶିବିର ଜରିଆରେ ଯେଭଳି ରକ୍ତ ସଂଗ୍ରହ ହେଉଥିଲା, ସେଥିରେ ହ୍ରାସ ଘଟିଥିବାରୁ ରକ୍ତ ଅଭାବ ସମସ୍ୟା ଦେଖାଦେଉଛି ବୋଲି ଜଣେ ଅଧିକାରୀ କହିଛନ୍ତି। ଏବେ ସମସ୍ତଙ୍କ ପାଇଁ ରକ୍ତ ମାଗଣାରେ ପ୍ରଦାନ କରାଯାଉଛି। ଯେଉଁମାନେ ରକ୍ତ ନେଉଛନ୍ତି, ସେମାନଙ୍କର ସମ୍ପର୍କୀୟଙ୍କୁ ଗୋଟିଏ ୟୁନିଟ ରକ୍ତଦାନ କରିବାକୁ କୁହାଯାଉଛି। ଯେଉଁମାନେ ରକ୍ତଦାତା ଯୋଗାଡ କରିପାରୁ ନାହାନ୍ତି, ସେମାନଙ୍କ ମଧ୍ୟରେ ରକ୍ତ ପ୍ରଦାନ କରାଯାଉଛି। ସେପଟେ ପ୍ରତିମାସରେ ୫ଶହରୁ ଊଦ୍ଧର୍ବ ଥାଲାସେମିଆ, ସିକିଲସେଲ ଓ ହେମୋଫିଲିଆ ରୋଗୀ ମଧ୍ୟ ରକ୍ତଭଣ୍ଡାରରୁ ରକ୍ତ ନେଇଥାନ୍ତି। ରକ୍ତଭଣ୍ଡାରରେ ଅଭାବ ପରିଲକ୍ଷିତ ହେଲେ ଏହି ରୋଗୀମାନେ ମଧ୍ୟ ଠିକ ସମୟରେ ରକ୍ତ ପାଇବାରୁ ବଞ୍ଚିତ ହୋଇଥାନ୍ତି। ଶନିବାର ରେକର୍ଡ ଅନୁସାରେ ଏମକେସିଜି ରକ୍ତଭଣ୍ଡାରରେ ମୋଟ ଶହେ ୟୁନିଟ ରକ୍ତ ଗଚ୍ଛିତ ରହିଛି। ଏ- ପଜିଟିଭ ରକ୍ତ ୨୩ ୟୁନିଟ ରହିଥିବା ବେଳେ ବି- ପଜିଟିଭ ୧୩ ୟୁନିଟ, ଏବି-ପଜିଟିଭ ୧ୟୁନିଟ ଓ ଓ-ପଜିଟିଭ ୩୯ ୟୁନିଟ ରହିଛି। ସେହିପରି ଏ- ନେଗେଟିଭ ଏବଂ ଓ -ନେଗେଟିଭ ଗ୍ରୁପ ରକ୍ତ ଖାଲି ରହିଛି। ସେହିପରି ବି-ନେଗେଟିଭ ଓ ଏବି -ନେଗେଟିଭ ମଧ୍ୟ ଖାଲି ରହିଥିବା ରକ୍ତ ଭଣ୍ଡାର କର୍ତ୍ତୃପକ୍ଷଙ୍କ ତରଫରୁ ଜାରି ହୋଇଥିବା ତଥ୍ୟରୁ ଜଣାପଡିଛି। ଅନ୍ୟପଟେ ରକ୍ତଭଣ୍ଡାରରେ ପ୍ଲାଟଲେଟ ମଧ୍ୟ ଅଭାବ ରହିଛି। ସାଧାରଣତଃ ଖରାଦିନ ଆସିଲେ ରକ୍ତ ଅଭାବ ସମସ୍ୟା ଦେଖା ଦେଇଥାଏ। ଖରାଦିନରେ ଶିବିର ସଂଖ୍ୟା କମିବାରୁ ଏଭଳି ସମସ୍ୟା ହୋଇଥାଏ। ଏବେ ଜାନୁଆରୀରୁ ରକ୍ତ ଅଭାବ ସମସ୍ୟା ଦେଖାଦେଲାଣି। ଖରା ବଢ଼ିଲେ ଶିବିର ସଂଖ୍ୟା ଆହୁରି ହ୍ରାସ ପାଇବ। ତେଣୁ ବିଭିନ୍ନ ସମୟରେ ସ୍ବେଚ୍ଛାକୃତ ରକ୍ତଦାତା ରକ୍ତଦାନ କରି ରକ୍ତ ଅଭାବ ପୂରଣ କରିବାକୁ ଆହ୍ବାନ ଦିଆଯାଇଛି। ଏ ସମ୍ପର୍କରେ ଏମକେସିଜି କର୍ତ୍ତୃପକ୍ଷ ସୂଚନା ଦେଇଛନ୍ତି ଯେ, ରୋଗୀଙ୍କ ଆବଶ୍ୟକତା ଅନୁସାରେ ରକ୍ତ ଦିଆଯାଉଛି। ବର୍ତ୍ତମାନ ବିଭିନ୍ନ ବର୍ଗର ୭୬ ୟୁନିଟ ରକ୍ତ ଗଚ୍ଛିତ ରହିଛି। ଜରୁରୀ ସମୟରେ ଯଦି ନେଗେଟିଭ ଗ୍ରୁପ ରକ୍ତ ଆବଶ୍ୟକ ପଡ଼େ ତେବେ ରକ୍ତଭଣ୍ଡାର ତରଫରୁ ସ୍ବେଚ୍ଛାସେବୀଙ୍କୁ ଯୋଗାଯୋଗ କରି ରକ୍ତ ଯୋଗାଡ଼ କରାଯାଇଥାଏ ବୋଲି କର୍ତ୍ତୃପକ୍ଷ କହିଛନ୍ତି।
