ଗୋବିନ୍ଦପାଲି, ୧୮ା୧୧(କାର୍ତ୍ତିକ ରଥ): ମାଲକାନଗିରି ଜିଲା ଖଇରପୁଟ ବ୍ଲକର ଗୁମାଝରନ ଜଳପ୍ରପାତ ଏକ ଆକର୍ଷଣୀୟ ଦର୍ଶନୀୟ ସ୍ଥାନ। ଜିଲାର ପ୍ରବେଶ ଦ୍ୱାର ଗୋବିନ୍ଦାପଲିଠାରୁ ୧୮ କି.ମି. ଦୂରରେ ଅବସ୍ଥିତ ଏହି ଜଳପ୍ରପାତକୁ ବୁଲିବାକୁ ପ୍ରତି ବର୍ଷ ବିଭିନ୍ନ ଋତୁରେ ଓଡ଼ିଶାର ବିଭିନ୍ନ ସ୍ଥାନରୁ ପର୍ଯ୍ୟଟକମାନେ ଆସିଥାନ୍ତି। ଏଠାକାର ପ୍ରାକୃତିକ ପରିବେଶ ସାଙ୍ଗକୁ ପାହାଡ଼ି ବଗିଚାର ସୌନ୍ଦର୍ଯ୍ୟ ଆକୃଷ୍ଟ କରେ। ସ୍ଥାନୀୟ ସରପଞ୍ଚ ଡମ୍ବୁରୁ ଶିସା ଓ ବ୍ଲକ୍ ପ୍ରଶାସନ ଉଦ୍ୟମରେ ଗତବର୍ଷ ଏଠାରେ କିଛି ଉନ୍ନୟନମୂଳକ କାର୍ଯ୍ୟ ହେଇଛି। ଗୋବିନ୍ଦପାଲି-ମହୁଲପୁଟ ରାସ୍ତାର ବାହାଦୁରଗୁଡା ଛକରୁ ମହୁଲପୁଟ ପର୍ଯ୍ୟନ୍ତ ରାସ୍ତା କାମ ଗ୍ରାମାଞ୍ଚଳ ଉନ୍ନୟନ ବିଭାଗ ଟେଣ୍ଡର ପ୍ରକ୍ରିୟାରେ ଠିକାଦାର ମାଧ୍ୟମରେ କରାଯାଇଛି। ଏବେ ଏହି ରାସ୍ତାର ଅବସ୍ଥା କହିଲେ ନ ସରେ। ମହୁଲପୁଟ ରାସ୍ତାର ଶେଷ ଆଡ଼କୁ ଥିବା ଗୁମାଝରନ ଗ୍ରାମ ରାସ୍ତା ନିର୍ମାଣର ଅଳ୍ପଦିନ ମଧ୍ୟରେ ନଷ୍ଟ ହୋଇଯାଇଛି। ଏହା ମରାମତି ହେଉନାହିଁ। ଏବେ ଏହି ରାସ୍ତାର ନୁନଖାରି ଗ୍ରାମ ନିକଟରେ ଥିବା କଲଭର୍ଟ ଅବସ୍ଥା ବିପଦସଙ୍କୁଳ ଅବସ୍ଥାରେ ରହିଛି। କଲଭର୍ଟର ଗୋଟିଏ ପାର୍ଶ୍ୱ ମାଟି ଭୁଶୁଡି ରାସ୍ତା ଖାଇଯାଇଛି। ଦୁଇଚକିଆ ଗାଡ଼ିକୁ ଛାଡ଼ି ଦେଲେ ଉକ୍ତ ରାସ୍ତାରେ ଅନ୍ୟ କୌଣସି ଗାଡି ଯାତାୟାତ କରିପାରୁନାହିଁ। ଖାଲ ଢିପ ମରାମତି ହେଉ ନ ଥିବା ଏହି ରାସ୍ତାରେ ଯାତାୟାତ ବେଳେ ଲୋକେ ବହୁ ସମସ୍ୟାର ସମ୍ମୁଖୀନ ହେଉଥିବା ଅଭିଯୋଗ କରିଛନ୍ତି। ନୁନଖାରି,ତୋଟାଗୁଡା, ଶୁକ୍ରିପୁଟ, ବିଜାପଦର,ମହୁଲପୁଟ,ଦୋରା ସାହି, ଡକମ୍ଗୁଡା ଆଦି ଗ୍ରାମର ଲୋକେ ନାହିଁ ନ ଥିବା ହଇରାଣ ହେଉଛନ୍ତି। ଅସୁସ୍ଥ ରୋଗୀ ଓ ଗର୍ଭବତୀ ମହିଳାଙ୍କୁ ଡାକ୍ତରଖାନା ନେବାକୁ ରାସ୍ତା ଦୁରବସ୍ଥା ଯୋଗୁ ଗ୍ରାମରେ ଆମ୍ବୁଲାନ୍ସ ପହଞ୍ଚତ୍ପାରୁନାହିଁ। ବିପଦ ସମୟରେ ଦମକଳ ଗାଡ଼ି ମଧ୍ୟ ଗ୍ରାମକୁ ଆସିପାରୁନହିଁ। ଉତ୍ପାଦିତ ପନିପରିବା ମଧ୍ୟ ଆଖପାଖ ବଜାର ହାଟକୁ ନେଇ ବିକ୍ରି କରିବା ଚାଷୀଙ୍କ ପାଇଁ କଷ୍ଟକର ହୋଇପଡୁଛି। ଏଥିପ୍ରତି ଜିଲା ପ୍ରଶାସନ ଦୃଷ୍ଟିଦେଇ ପଦକ୍ଷେପ ନେବାକୁ ସାଧାରଣରେ ଦାବି ହେଉଛି।
