ରୂପସା (ବାଞ୍ଛାନିଧି ଦେ)/ବସ୍ତା (ହରିଶଙ୍କର ପାଢୀ), ୯।୮: ବାଲେଶ୍ୱର ଜିଲା ରୂପସା ଥାନା ଅଧୀନ ୬୦ ନମ୍ବର ଜାତୀୟ ରାଜପଥର ଥାନା ନିକଟରେ ପୋଲିସ ଚଢାଉ କରି ଓଡ଼ିଶାରୁ ପଶ୍ଚିମବଙ୍ଗକୁ ଯାଉଥିବା ଏକ ପିଡିଏସ୍ ଚାଉଳ ବୋଝେଇ ଟ୍ରକ୍କୁ ଜବତ କରିଛି। ଟ୍ରକ୍ ସହ ସେଥିରେ ଥିବା ୧୭.୮ ଟନ୍ ଅର୍ଥାତ୍ ୧୭୮ କୁଇଣ୍ଟାଲ ପିଡ଼ିଏସ୍ ଚାଉଳ ଜବତ କରାଯାଇଛି। ଟ୍ରକ ଡ୍ରାଇଭର ଭଦ୍ରକ ଜିଲା ଧାମରା ଅଞ୍ଚଳର କିଶୋର ଗିରିଙ୍କୁ ଗିରଫ କରାଯାଇଛି। ଏ ସଂକ୍ରାନ୍ତରେ ଏକ ମାମଲା (ନଂ. ୭୯/୨୩) ରୁଜୁ ହୋଇ ତଦନ୍ତ ଜାରି ରହିଛି। ଗିରଫ ଅଭିଯୁକ୍ତଙ୍କୁ କୋର୍ଟଚାଲାଣ କରାଯାଇଛି। ଟ୍ରକ୍ ମାଲିକ ଫେରାର ହୋଇଯାଇଥିବା ପୋଲିସ କହିଛି।
ସୋମବାର ସନ୍ଧ୍ୟାରେ ଟ୍ରକ୍ (ନଂ. ଓଆର୍୦୧କେ-୩୭୩୫)ରେ ପଶ୍ଚିମବଙ୍ଗକୁ ଉକ୍ତ ପିଡ଼ିଏସ୍ ଚାଉଳ ଚୋରାଚାଲାଣ ହେଉଥିଲା। ଘଟଣା ସମ୍ପର୍କରେ ବାଲେଶ୍ୱର ଏସ୍ପି ସାଗରିକା ନାଥ ସୂଚନା ପାଇଥିଲେ। ଏସ୍ପିଙ୍କ ନିର୍ଦ୍ଦେଶକ୍ରମେ ରୂପସା ଥାନା ପୋଲିସ ରାଜପଥ ନିକଟରେ ଜଗି ରହିଥିଲେ। ଏହି ପିଡିଏସ୍ ଚାଉଳ ବାଲେଶ୍ୱରର ରେମୁଣା ରାଇସ ରିସିଭିଂ ସେଣ୍ଟରରୁ ଲୋଡ଼ିଂ ହୋଇ ଖନ୍ତାପଡ଼ା ଥାନା କୁଳିଗାଁ ପଞ୍ଚାୟତରେ ଥିବା ରିଟେଲରଙ୍କ ନିକଟକୁ ଯିବାର ଥିଲା। ମାତ୍ର ଟ୍ରକ୍ ମାଲିକ ଓ ଡ୍ରାଇଭରଙ୍କ ସଲାସୁତୁରାରେ ଉକ୍ତ ଚାଉଳ ଟ୍ରକ ସେଠାକୁ ଯିବା ପରିବର୍ତ୍ତେ ପଶ୍ଚିମବଙ୍ଗକୁ ଚୋରାଚାଲାଣ କରାଯାଉଥିଲା। ଖବର ପାଇ ରୂପସା ଆଇଆଇସି ପ୍ରଫୁଲ୍ଲ ମଲ୍ଲିକଙ୍କ ନେତୃତ୍ୱରେ ଏକ ଟିମ୍ ରାଜପଥରେ ଚଢ଼ାଉ କରି ଉକ୍ତ ଟ୍ରକ ସମେତ ପିଡ଼ିଏସ ଚାଉଳକୁ ଜବତ କରିବାରେ ସମର୍ଥ ହୋଇଥିଲେ। ଟ୍ରକ୍ ମାଲିକ ରାଜେଶ ଚାନ୍ଦଙ୍କ ଘର ବସ୍ତା ଥାନା ପୁନସିତା ଗ୍ରାମରେ ବୋଲି ପୋଲିସ କହିଛି। ଏହି ଚାଉଳ ଚାଲାଣ ଘଟଣାରେ ସମ୍ପୃକ୍ତ ଥିବା ସମସ୍ତ ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଆଇଆଇସି ମଲ୍ଲିକ କହିଛନ୍ତି।
