ଦଶରଥପୁର,୬।୭(ମନୋଜ ପୃଷ୍ଟି):ପଲିଥିନ୍, ଜରି, ପ୍ଲାଷ୍ଟିକ୍ରେ ନିର୍ମିତ କପ୍ ଓ ଚାମଚ ଆଦିର ବ୍ୟବହାର ଉପରେ ସରକାର କଟକଣା ଜାରି କରିଛନ୍ତି। ଏପରିକି ୪୦ ମାଇକ୍ରୋନ୍ ମୋଟେଇରୁ କମ୍ ଏବଂ ରିସାଇକେଲିଂ ପଲିଥିନ୍ ବ୍ୟାଗ୍ ବ୍ୟବହାରକୁ ନିଷିଦ୍ଧ କରାଯାଇଛି। ସରକାରଙ୍କ ଏହି ଆଇନକୁ ଯଦି କୌଣସି ବ୍ୟବସାୟିକ ଅନୁଷ୍ଠାନ କିମ୍ବା ସାଧାରଣ ଲୋକ ଭଙ୍ଗକରନ୍ତି ପରିବେଶ ପ୍ରଦୂଷଣ ସୁରକ୍ଷା ଆଇନ ବଳରେ ସମ୍ପୃକ୍ତ ବ୍ୟବସାୟୀ ହୁଅନ୍ତୁ ଅବା ସାଧାରଣ ଲୋକ ୫ ବର୍ଷ ଜେଲଦଣ୍ଡ ସହ ୧ ଲକ୍ଷ ଟଙ୍କା ପର୍ଯ୍ୟନ୍ତ ଜରିମାନା ବ୍ୟବସ୍ଥା ରହିଛି। କେତେକ ବଡ଼ ବଡ଼ ସହରରେ ସରକାରଙ୍କ ଏହି ନିୟମ କଡ଼ାକଡ଼ି ପାଳନ କରାଯାଉଥିବାବେଳେ ଛୋଟ ସହର ଏବଂ ଗ୍ରାମାଞ୍ଚଳରେ ଏହା କାର୍ଯ୍ୟକାରୀ ହେଉ ନ ଥିବା ଅଭିଯୋଗ ହୋଇଛି। ସେହିପରି ଗ୍ରାମାଞ୍ଚଳର ଲୋକଙ୍କୁ ପଲିଥିନ୍ ଓ ପ୍ଲାଷ୍ଟିକ୍ର ପରିବେଶ ପ୍ରତି ଅପକାରିତା ସମ୍ପର୍କରେ ମଧ୍ୟ ସଚେତନ କରାଯାଉନାହିଁ। ଫଳରେ ଅଞ୍ଚଳରେ ପଲିଥିନ୍ ବିଷ ଗ୍ରାସୁଛି ବୋଲି ଅଭିଯୋଗ ହେଉଛି।
ଯାଜପୁର ଜିଲା ଦଶରଥପୁର ବ୍ଲକ୍ ଅଞ୍ଚଳରେ ଛୋଟବଡ଼ ୨୫ରୁ ଊର୍ଦ୍ଧ୍ୱ ଛକବଜାର ରହିଥିବାବେଳେ ଦୈନିକ ଏହି ଛକବଜାରରୁ କୁଇଣ୍ଟାଲ କୁଇଣ୍ଟାଲ ବର୍ଜ୍ୟବସ୍ତୁଭାବେ ପଲିଥିନ୍, ପ୍ଲାଷ୍ଟିକ୍ କପ୍ ଓ ଚାମଚ ଆଦି ବାହାରୁଛି। ଏହା ପରିବେଶ ଲାଗି ବିଷ ସଦୃଶ ବୋଲି ସ୍ଥାନୀୟ ଅଞ୍ଚଳର ଯୁବ ପରିବେଶବିତ୍ ବ୍ରହ୍ମାନନ୍ଦ ପଣ୍ଡା ମତ ଦିଅନ୍ତି। ଏହି ବଜ୍ୟବସ୍ତୁର ପ୍ରଦୂଷଣ ମଣିଷକୁ ମହାମାରୀ ଆଡ଼କୁ ଠେଲିନେଉଛି। ଏହା ଉପରେ ସଚେତନ କରା ନ ଯିବା ଓ ଏହାର ବ୍ୟବହାର ଉପରେ ଅଙ୍କୁଶ ନ ଲଗାଯିବା ଆଗାମୀ ଦିନ ଲାଗି ଭୟଙ୍କର ପରିସ୍ଥିତିକୁ ମଣିଷ ସାମ୍ନାକରିବାକୁ ବାଧ୍ୟ ହେବ ବୋଲି ସ୍ଥାନୀୟ ଅଞ୍ଚଳର ଅବସରପ୍ରାପ୍ତ ଡାକ୍ତର ଗୋପାଳ ମିଶ୍ର ମତଦେଇଛନ୍ତି। ବ୍ଲକ୍ ଅଞ୍ଚଳରେ କେତେକ ଦେବ ଓ ଶକ୍ତିପୀଠରେ ବାର୍ଷିକ ଉତ୍ସବ ସମୟରେ ମେଳା ଯାତ୍ରା ଆଦି ପଡୁଥିବାବେଳେ ଏଠାରେ ଦୈନିକ ବଜ୍ୟବସ୍ତୁ ବାହାରିଥାଏ। ମେଳା,ମହୋତ୍ସବ ସରିବା ପରେ ମଧ୍ୟ ସମ୍ପୃକ୍ତ ଅନୁଷ୍ଠାନ ପକ୍ଷରୁ ସଫେଇ ହୋଇ ନ ଥାଏ। ସେହିସବୁ ବସ୍ତୁ ପବନରେ ଉଡ଼ି ବର୍ଷାପାଣିରେ ପୋଖରୀ ନାଳ, ଚାଷଜମିରେ ପ୍ରବେଶ କରିଥାଏ। ଉଦାହରଣ ସ୍ବରୂପ ବ୍ଲକ୍ ଅଞ୍ଚଳରେ ଥିବା କୁଅଁାଶ ମଙ୍ଗଳା ପୀଠ, ମା’ଜାଡୁଆଦେବୀ ପୀଠ, ସିଦ୍ଧେଶ୍ୱର ପୀଠ, ବାଘୁଆଶୁଣୀ ପୀଠ। ଏହାକୁ ଛାଡ଼ିବାପରେ ମଙ୍ଗଳପୁର ବଜାର ସଂଲଗ୍ନ ବିଜୁ ଗ୍ରାମୀଣ ବଜାର ପଡ଼ିଆଠାରେ ୧୨ମାସରେ ୧୩ ପର୍ବ ହୋଇଥାଏ। କେତେବେଳେ ରାଜନୈତିକ ଦଳଗୁଡ଼ିକର ସଭାସମିତି ତ କେତେବେଳେ ମିନାବଜାର ଆଉ କେତେବେଳେ ଅପେରା ପାର୍ଟି ସରିବାପରେ ଏଠାରେ ଜରି ପଲିଥିନ୍, ଚା’ କପ, ୱାନ୍ ଚାନ୍ସ ଗ୍ଲାସ୍ ଆଦି ପଡ଼ିଥାଏ। ବ୍ଲକ୍ର ପ୍ରମୁଖ ବ୍ୟବସାୟିକ ପେଣ୍ଠସ୍ଥଳ କୁହାଯାଉଥିବା ମଙ୍ଗଳପୁର ବଜାର ଏବଂ ଝୁମ୍ପୁରୀ ବଜାରଠାରେ ବଜ୍ୟବସ୍ତୁ ନିଷ୍କାସନ ଲାଗି କୌଣସି ବ୍ୟବସ୍ଥା ନ ଥିବାରୁ ଦୈନିକ ବଜ୍ୟବସ୍ତୁକୁ ବ୍ୟବସାୟୀ ଓ ସାଧାରଣ ଜନତା ଏଣେତେଣେ ପକାଇବା ଲାଗି ବାଧ୍ୟ ହେଉଛନ୍ତି। ଫଳରେ ଅଞ୍ଚଳରେ ପ୍ରଦୂଷଣ ବଢୁଛି। ଏହାଦ୍ୱାରା ଅଞ୍ଚଳରେ କ୍ୟାନ୍ସର ରୋଗୀଙ୍କ ସଂଖ୍ୟା ବୃଦ୍ଧି ପାଉଛି। ପୂର୍ବ ସଂଖ୍ୟାକୁ ଅନୁଧ୍ୟାନକଲେ ୧୦ ବର୍ଷ ମଧ୍ୟରେ କ୍ୟାନ୍ସର ରୋଗୀଙ୍କ ସଂଖ୍ୟା ୧୦ ଗୁଣ ଅତିକ୍ରମ କରିଥିବା ଯାଜପୁର ମୁଖ୍ୟ ଚିକିତ୍ସାଳୟର କ୍ୟାନ୍ସର ରେକର୍ଡ ରୁମ୍ ସୂଚନାରୁ ଜଣାଯାଇଛି। ତେଣୁ ଜିଲା ପ୍ରଶାସନ ଏ ଦିଗରେ ପଦକ୍ଷେପ ନେବାକୁ ଅଞ୍ଚଳର ସାମାଜିକ କର୍ମୀ ଶରତ ଚନ୍ଦ୍ର ସେଠୀ, ଭରତ ମଲ୍ଲିକ, ସୌଭାଗ୍ୟ ରଞ୍ଜନ ପୃଷ୍ଟି, ଦିବାକର ଦଳାଇ ଓ କାହ୍ନୁଚରଣ ସାହୁ ପ୍ରମୁଖ ଦାବି କରିଛନ୍ତି। ଏ ସମ୍ପର୍କରେ ପ୍ରଶାସନିକ ଅଧିକାରୀଙ୍କ ପ୍ରତିକ୍ରିୟା ମିଳିପାରିନାହିଁ।
