ଦିଗପହଣ୍ଡି,୧୬|୫(ଅଶେଷ ନାଥ ମିଶ୍ର): ଗଞ୍ଜାମ ଜିଲା ସାନଖେମୁଣ୍ଡି ବ୍ଲକ କଉଡ଼ିଆ ଗ୍ରାମରେ ପରକୀୟା ପ୍ରୀତିକୁ କେନ୍ଦ୍ରକରି ଶୁକ୍ରବାର ସନ୍ଧ୍ୟାରେ ଗ୍ରାମର ବଳରାମ ପ୍ରଧାନ(୨୬)ଙ୍କ ବେକକୁ କାତିରେ ଚୋଟ ପକାଇ ହତ୍ୟା ଉଦ୍ୟମ କରାଯାଇଥିବା ଅଭିଯୋଗ ହୋଇଥିଲା। ବଳରାମଙ୍କ ମା ନିବାସିନି ପ୍ରଧାନ ଏନେଇ ପାଟପୁର ଥାନାରେ ଏତଲା ଦେବାପରେ ଆଇଆଇସି ଦୀପ୍ତି ରଞ୍ଜନ ବେହେରା ମାମଲା ନଂ.୧୩୧/୨୬ ଭାରତୀୟ ନ୍ୟାୟ ସଂହିତା ର ଦଫା – ୧୨୬(୨)/୧୧୮(୨)/୧୦୯(୧)/୨୯୬/୧୧୫(୨)/୩୫୧(୩) ଅନୁଯାୟୀ ମକଦ୍ଦମା ରୁଜୁ କରିଥିଲେ। ତଦନ୍ତକାରୀ ପୋଲିସ ଅଧିକାରୀ ଆଇଆଇସି ଘଟଣାରେ ସମ୍ପୃକ୍ତ ସେହି ଗ୍ରାମର ଗନ୍ଧି ଓରଫ ଅନନ୍ତରାମ ଦଳାଇଙ୍କ ଠାରୁ ହତ୍ୟା ଉଦ୍ୟମରେ ବ୍ୟବହୃତ କାତିକୁ ଜବତ କରି ତାଙ୍କୁ ଥାନାକୁ ଉଠାଇ ଆଣି ତଦନ୍ତ ଚଳାଇଥିଲେ।
ଶନିବାର ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିଲା। ଜାମିନ ଆବେଦନ ଖାରଜ ହେବାରୁ ତାଙ୍କୁ ଦିଗପହଣ୍ଡି ସବ୍ ଜେଲ ହାଜତକୁ ପଠାଇ ଦିଆଯାଇଛି। ଗ୍ରାମର ଜଣେ ଯୁବତୀଙ୍କ ସହ ବିବାହ ପୂର୍ବରୁ ଗନ୍ଧିଙ୍କ ପ୍ରେମ ସମ୍ପର୍କ ରହିଥିଲା। ଯୁବତୀ ଜଣକ ଗ୍ରାମର ଅନ୍ୟଜଣେ ଯୁବକଙ୍କୁ ବିବାହ କରିଥିଲେ। ବିବାହିତ ମହିଳାଙ୍କ ସ୍ବାମୀ ଅନ୍ୟ ରାଜ୍ୟରେ କାମ କରୁଥିବା ବେଳେ ସେ ଘରେ ଅନୁପସ୍ଥିତ ରହୁଥିବାରୁ ମହିଳାଙ୍କ ସହ ଗନ୍ଧିଙ୍କ ପୂର୍ବଭଳି ସମ୍ପର୍କ ରହିଥିଲା। ସେ ତାଙ୍କ ଘରକୁ ନିୟମିତ ବ୍ୟବଧାନରେ ଯା ଆସ କରୁଥିଲେ। ଯୁବତୀଙ୍କ ଭାଇ ସହ ଗ୍ରାମର ବଳରାମଙ୍କ ନିବିଡ଼ ସମ୍ପର୍କ ରହିଥିବାରୁ ସେ ତାଙ୍କ ଘରକୁ ସବୁବେଳେ ଯାଉଥିଲେ । ଗନ୍ଧିଙ୍କ ସହ ସାଙ୍ଗର ଭଉଣୀ ଅନୈତିକ ସମ୍ପର୍କ ରଖିଥିବା ବଳରାମ ଜାଣିବା ପରେ ସେ ତାଙ୍କ ସାଙ୍ଗ ଏବଂ ମହିଳାଙ୍କ ସ୍ବାମୀଙ୍କୁ ଜଣାଇ ଦେଇଥିଲେ। ମହିଳା ଜଣକ ଏନେଇ ଗନ୍ଧିଙ୍କୁ ଜଣାଇଥିଲେ ଏବଂ ତାଙ୍କ ସହ ଆଉ କୌଣସି ସମ୍ପର୍କ ନ ରଖିବାକୁ ଅନୁରୋଧ କରିଥିଲେ। ପୂର୍ବରୁ ଏନେଇ ଗନ୍ଧି ଓ ବଳରାମଙ୍କ ମଧ୍ୟରେ ଯୁକ୍ତିତର୍କ ହୋଇ ଝଗଡା ହୋଇଥିଲା। ବଳରାମଙ୍କ ଯୋଗୁଁ ହିଁ ମହିଳା ଜଣକ ତାଙ୍କ ସହ ସମ୍ପର୍କ ତୁଟାଇ ଦେଇଥିବା ସନ୍ଦେହ ଗନ୍ଧିଙ୍କ ମୁଣ୍ଡ ମୁଣ୍ଡରେ ବସା ବାନ୍ଧିଥିଲା । ଶୁକ୍ରବାର ସନ୍ଧ୍ୟାରେ ବଳରାମ ଗାଁର ଦଣ୍ଡ ପୋଖରୀରେ ଗାଧୋଇ ଘରକୁ ଫେରୁଥିବା ବେଳେ ଗନ୍ଧି ତାଙ୍କ ଘର ସମ୍ମୁଖରେ ଅଟକାଇ ଗାଳି କରିଥିଲେ।ପ୍ରତିବାଦ କରିବାରୁ ସେ ହାତରେ ଧରିଥିବା କାତି ରେ ତାଙ୍କ ବେକକୁ ଚୋଟ ପକାଇବାରୁ ବଳରାମ ରକ୍ତାକ୍ତ ଅବସ୍ଥାରେ ତଳେ ପଡ଼ିଯାଇଥିଲେ। ଖବର ପାଇ ପରିବାର ଲୋକେ ସ୍ଥାନୀୟ ଲୋକଙ୍କ ସହାୟତାରେ ବଳରାମଙ୍କୁ ନିକଟସ୍ଥ ଆଡ଼ପଡ଼ା ଗ୍ରାମ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ସେଠାରେ ପ୍ରାଥମିକ ଚିକିତ୍ସା ପରେ ତାଙ୍କୁ ସଙ୍କଟାପନ୍ନ ଅବସ୍ଥାରେ ବ୍ରହ୍ମପୁର ବଡ଼ ଡାକ୍ତରଖାନା କୁ ସ୍ଥାନାନ୍ତର କରାଯାଇଥିଲା। ସେଠାରେ ସେ ଚିକିତ୍ସାଧୀନ ଥିବା ତଦନ୍ତକାରୀ ଅଧିକାରୀ କହିଛନ୍ତି। ଗ୍ରାମରେ ଦୁଇ ପରିବାର ମଧ୍ୟରେ ଘଟଣାକୁ ନେଇ ଚାପା ଉତ୍ତେଜନା ଲାଗିରହିଛି।
